ލާމަރުކަޒީ އުސޫލުން ފުލުހުންގެ ހިދުމަތްތައް ބައްޓަން ކުރުމަށް މުހިންމުކަންދެން: ސީޕީ ހަމީދު
1 ސެޕްޓެމްބަރު 2020 | އަންގާރަ 05:45އަމާޒަކީވަސީލަތްތައް އެންމެ ފުރިހަމަގޮތުގައި ފޯރުކޮށްދީ ރައްޔިތުންނަށް ފުލުހުން ފޯރުކޮށްދޭ ހިދުމަތްތައް ފުރިހަމަކުރުން
ކޮމިޝަނަރު އޮފް ޕޮލިސް މުހައްމަދު ހަމީދު
ދިވެހި ފުލުހުންގެ ހިދުމަތް ލާމަރުކަޒީކޮށް، ފުލުހުންގެ ހިދުމަތް ހުރިހާ ރައްޔިތުންނަށް ހަމަހަމަކަމާއި އެކު އެންމެ ފުރިހަމަ އަށް ފޯރުކޮށްދިނުމަށް ވަރަށް ބޮޑު މުހިންމު ކަމެއްދޭ ކަމެއް ކަމަށް ކޮމިޝަނަރު އޮފް ޕޮލިސް، މުހައްމަދު ހަމީދު ވިދާޅުވެއްޖެއެވެ.
ހުޅުމާލެ ޕޮލިސް ސްޓޭޝަންގެ އައު އިމާރާތް ހުޅުވުމުގެ ރަސްމިއްޔާތުގައި ވާހަކަދައްކަވަމުން ސީޕީ ހަމީދު ވިދާޅުވީ، 2019 ވަނަ އަހަރުން 2024 ވަނަ އަހަރަށް އެކުލަވާލެވިފައިވާ ފުލުހުންގެ ސްޓްރެޓެޖިކް ޕްލޭންގެ އެންމެ މުހިންމު އެއް އަމާޒަކީ ރައްޔިތުންނަށް ހިދުމަތް ދިނުމުގެ އެންމެ ކުރީސަފުގައި ހަރަކާތްތެރިވާ ފުލުހުންނާއި ބޭނުންކުރާ އިމާރާތްތަކާއި ވަސީލަތްތައް އެންމެ ފުރިހަމަގޮތުގައި ފޯރުކޮށްދީ ރައްޔިތުންނަށް ފުލުހުން ފޯރުކޮށްދޭ ހިދުމަތްތައް ފުރިހަމަކުރުން ކަމަށެވެ. އަދި ފުލުހުންގެ ވާޖިބު އަދާކުރުމުގައި ކުރިމަތިވާ ގޮންޖެހުންތަކާއި ތަކުލީފުތައް ނައްތާލައި ފުލުހުންގެ ހިދުމަތް އެެންމެ އެކަށީގެންވާ ގޮތުގައި ފޯރުކޮށްދިނުމަށްޓަކައި ރައްޔިތުންނާ ވީހާވެސް ގާތުން ހިދުމަތް ފޯރުކޮށްދެވޭނެ ނިޒާމްތައް ގާއިމްކުރުމަށް އިސްކަންދޭކަމަށް ސީޕީ ވިދާޅުވިއެވެ.
ސީޕީ އިތުރަށް ވިދާޅުވީ، ކުރިއަށް އޮތް ފަސް އަހަރަށް އެކުލަވާލާފައިވާ ޕްލޭންގެ ތެރެއިން ލޯކަލް ޕޮލިސިން އަކީ ކާމިޔާބުކުރަން ބޭނުންވާ އެއް ލަނޑުދަނޑި ކަމަށް ވާތީ މާލެ އާއި އަތޮޅު ތެރޭގައި ފުލުހުންގެ ހިދުމަތް ފޯރުކޮށްދިނުމަށް މިިހާރު ހިންގަމުންދާ ނިޒާމު އިތުރަށް ވަރުގަދަކޮށް، ޕޮލިސިންގެ މަސައްކަތްތައް ރޭވިފައިވާ ދާއިރާތައް އިތުރަށް ބާރުވެރިކޮށް ލާމަރުކަޒީ އުސޫލަކުން ފުލުހުންގެ ހިދުމަތްތައް ހުރިހާ ރައްޔިތުނަށް ފޯރުކޮށްދެވޭނެ ގޮތަކަށް ނިޒާމު ބައްޓަން ކުރުމަކީ ހާއްސަ އަހައްމިޔަތުކަމެއް ދޭ ކަމެއް ކަމަށެވެ.
ފުލުހުންގެ ހިދުމަތް ފޯރުކޮށްދިނުމުގައި ރައްޔިތުންގެ ބައިވެރިވުން އިތުރުކޮށް ރައްޔިތުންނާއި ގާތުން ހިދުމަތް ފޯރުކޮށްދީ، އިޖުތިމާއީ މައްސަލަތަކުގެ ތެރެއިން ކުށްކުށަށް އަރައިގަތުން މަގުފަަހިވިޔަ ނުދިނުމަށްޓަކައި މައްސަލަ ދެނެގަނެ ހައްލުކުރުމުގެ އަމާޒުގައި މިހާރު ޕްރެކްޓިސް ކުރަން ފާށާފައިވާ ނެއިބާހޫޑް ޕޮލިސިންގެ މޮޑެލް އަކީ މިހާރު ހުޅުމާލެ ސިޓީގައިވެސް ގާއިމް ކުރެވިފައިވާ ހިދުމަތެއްކަން ސީޕީ ފާހަގަކުރެއްވިއެވެ. އަދި މިކަމުގެ އިންތިޒާމުތައް ދުވަހެއް ދުވަހަކަށް ހަރުދަނާ ކުރަމުންދާ ކަމަށްވެސް ސީޕީ ވިދާޅުވިއެވެ.
ކުރިއަށް އޮތްތަނުުގައި ހުޅުމާލޭގައި ފުލުހުންގެ ދައުރު އިތުރުވަމުން ދާނެތީ އެކަމަށް ވާންޖެހޭ ތައްޔާރީތައްވެސް ވަމުން އަންނަ ކަމަށް ސީޕީ ހަމީދު ވަނީ ވިދާޅުވެފައެވެ.
