ޕީއެސްޖީގައި މަޑުކޮށް، ޗެމްޕިއަންސް ލީގު ކާމިޔާބުކުރަން ބޭނުން: ނޭމާ

ޕީއެސްޖީ ދޫކޮށްލަން ނުވިސްނާ ކަމަށާއި، އަމާޒަކީ އަންނަ ސީޒަނުގައި ޕީއެސްޖީއާއެކު ޔުއެފާ ޗެމްޕިއަންސް ލީގު ކާމިޔާބުކުރުން ކަމަށް ބްރެޒިލްގެ ތަރި ނޭމާ ބުނެފިއެވެ.

ބާސެލޯނާ ދޫކޮށް 2017 ވަނަ އަހަރު ދުނިޔޭގެ އެންމެ އަގު ބޮޑު ކުޅުންތެރިޔާގެ ގޮތުގައި ޕީއެސްޖީއަށް ނޭމާ ބަދަލުވީ 222 މިލިޔަން ޔޫރޯއަށެވެ. އެކަމަކު އަނިޔާގެ ސަބަބުން ނޭމާއަށް ޕީއެސްޖީގައި ހޭދަކުރި ފުރަތަމަ ދެ ސީޒަނުގައި އެންމެ އެދެވޭ ކުޅުމެއް ދެއްކިފައެއް ނުވެއެވެ. އެކަމަކު މިދިޔަ ސީޒަނުގެ ޗެމްޕިއަންސް ލީގު ފައިނަލަށް ޕީއެސްޖީ ފުރަތަމަ ފަހަރަށް ދަތުރުކުރިއިރު، ނޭމާ ވަނީ މޮޅު ކުޅުމެއް ދައްކާފައެވެ.

ދާދި ފަހުން މީޑިއާއަށް ދިން އިންޓަވިއުއެއްގައި ނޭމާ ބުނީ ޔޫރަޕްގެ ބޮޑެތި ކުލަބުތަކުން އޭނާ ހޯދުމަށް މަސައްކަތް ކުރަމުން އަންނަކަން އެނގޭ ކަމަށާއި، އެކަމަކު އަންނަ ސީޒަނުގައި ޕީއެސްޖީގައި މަޑުކުރަން ނިންމާފައިވާ ކަމަށެވެ. އަދި މި ނިންމުން ނިންމީ ޕީއެސްޖީ މެނޭޖުމަންޓާ ބައްދަލުކުރުމަށްފަހު ކަމަށާއި، އުންމީދަކީ އަންނަ ސީޒަނުގެ ޗެމްޕިއަންސް ލީގު ޕީއެސްޖީއާއެކު ކާމިޔާބުކުރުން ކަމަށްވެސް ބުންޏެވެ.

އަދި ޕީއެސްޖީއަށް މިހާރު ކާމިޔާބުނުކުރެވިވާ ހަމައެކަނި މުބާރާތަކީ ޗެމްޕިއަންސް ލީގު ކަމަށާއި، އެކަން ބަދަލުކޮށް ފުރަތަމަ ފަހަރަށް ޕީއެސްޖީއަށް ޗެމްޕިއަންސް ލީގު ކާމިޔާބުކޮށްދީ، ޕީއެސްޖީގެ ތާރީޚުގައި އޭނާގެ ނަން ފެވުމަށް ބޭނުންވާ ކަމަށްވެސް ނޭމާ ވަނީ ބުނެފައެވެ.

މިފަހަރުގެ ޗެމްޕިއަންސް ލީގުގެ ފައިނަލުން ޕީއެސްޖީ ބަލިވީ ޖަރުމަންގެ ބަޔާން މިޔުނިކާ ވާދަކޮށް 1-0 ގެ ނަތީޖާއަކުންނެވެ. އެކަމަކު ޕީއެސްޖީން ވަނީ މިދިޔަ ސީޒަނުގެ ފްރެންޗް ލީގާއި، ފްރެންޗް ކަޕްގެ އިތުރުން ފްރެންޗް ލީގު ކަޕް ކާމިޔާބުކޮށްފައެވެ.

ޕީއެސްޖީގައި މަޑުކުރަން ނޭމާ ނިންމިއިރު، މީގެ ކުރިން މިދިޔަ ސީޒަނުގައި އޭނާ ކުރީގެ ކުލަބު ބާސާއިން ވަނީ ނޭމާ އަނބުރާ ގެންދިޔުމަށް މަސައްކަތް ކޮށްފައެވެ. އަދި އޭރު ނޭމާވެސް ބާސާއަށް ބަދަލުވާން ބޭނުންވާ ކަމަށް ރިޕޯޓުކުރިއެވެ. އެކަމަކު ޕީއެސްޖީން ނޭމާ ވިއްކާލަން ކަނޑައެޅި އަގުކަމަށްވާ 150 މިލިއަން ޔޫރޯ، އަގުބޮޑު ކަމަށް ނިންމާ ބާސާއިން ފަހުން ވަނީ ނޭމާ އަނބުރާ ގެނައުމުގެ މަސައްކަތުގައި ބަލި ގަބޫލުކޮށްފައެވެ.

މިދިޔަ ސީޒަނުގައި ނޭމާ ޕީއެސްޖީގައި ރަނގަޅު ކުޅުމެއް ދެއްކިއިރު، އޭނާ ވަނީ މިހާތަނަށް ޕީއެސްޖީއަށް ކުޅެދިން 85 މެޗުގައި ވަނީ 70 ލަނޑު ކާމިޔާބުކޮށްފައެވެ. އަދި ވަނީ ޕީއެސްޖީއާއެކު ފްރެންޗު ލީގު ތިން ފަހަރު ކާމިޔާބުކޮށްފައެވެ.