ލަންކާއަށް މަސް އެކްސްޕޯޓު ނުކުރެވިދާނެތީ ކަންބޮޑެއްނުވޭ: ފިޝަރީޒް މިނިސްޓަރ
ރާއްޖޭގެ އަމާޒުހުރީ އަގުބޮޑު ބާޒާރަށް މަސް އެކްސްޕޯޓު ކުރުމަށް ކަމަށް ޒަހާ ވިދާޅުވި
ނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަޙީދު
ރާއްޖޭގެ މަސްވެރިން ބާނަ މަސް ލަންކާގެ ބާޒާރަށް އެކްސްޕޯޓު ނުކުރެވުމަކީ ކަންބޮޑުވާކަމެއް ނޫން ކަމަށް މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަޙީދު ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ހޯމަ ދުވަހުގެ ޖަލްސާގައި ހޯރަފުށި ދާއިރާގެ މެމްބަރު އަހުމަދު ސަލީމް ކުރެއްވި ސުވާލަށް ޖަވާބު ދެއްވަމުންނެވެ. މެމްބަރު މިނިސްޓަރާއި ކުރެއްވި ސުވާލަކީ ސްރީލަންކާއަށް އެހެން ގައުމުތަކުން މަސް އެތެރެކުރުން ހުއްޓާލައިފިނަމަ ރާއްޖެއިން އަޅާނީ ކޮން ފިޔަވަޅުތަކެއްތޯއެވެ.
މި ސުވާލަށް ޖަވާބު ދެއްވަމުން ޒަހާ ވިދާޅުވީ ސްރީލަންކައިން އެގައުމަށް މަސް އިމްޕޯޓު ކުރުމަށް ހުރަސް އެޅުމަކީ ކަންބޮޑުވާކަމެއް ނޫން ކަމަށެވެ. އެގޮތުން ރާއްޖޭގެ އަމާޒު ހުރީ އަގުބޮޑު ބާޒާރަށް މަސް އެކްސްޕޯޓު ކުރުމަށް ކަމަށާއި މަސައްކަތް ކުރައްވާނީ ރައްޔިތުންނަށް ވީހާވެސް ބޮޑު މަންފާއެއް ލިބޭ ގޮތަކަށް ކަމަށެވެ.
މީގެއިތުރުން ހިކި ކަނޑުމަހަކީ މާބޮޑު އަގެއް ލިބޭ އެއްޗެއް ނޫން ކަން ފާހަގަކުރައްވާ ޒަހާ ވިދާޅުވީ އެއަށްވުރެ ބޮޑު އަގުތަކުގައި ބޮޑެތި ބާޒާރުތަކަށް މަސް ވިއްކޭނެ ކަމަށެވެ. މިހެން ފާހަގަކުރައްވާ ޒަހާ ވިދާޅުވީ ގަނޑުކުރި މަސް ތައިލެންޑު ބާޒާރަށް އަދި ލަންކާ ބާޒާރަކަށް ވެސް އެކްސްޕޯޓު ކުރަން ބޭނުންނުވާ ކަމަށެވެ.
ސްރީލަންކާގެ ވިޔަފާރިތައް ހިމާޔަތްކޮށް އިގްތިޞާދު ރަނގަޅު ކުރުމަށް އެގައުމުގެ އައު ސަރުކާރުން އަޅަމުން ގެންދާ ފިޔަވަޅުތަކުގެ ތެރެއިން އެ ގައުމަށް އެހެން ގައުމުތަކުން މަސް އެތެރެކުރުން ހުއްޓާލަންޖެހޭ ކަމަށް އެގައުމުގެ ރައީސް ގޮތަބާޔާ ރާޖަޕަކްސަ ވަނީ ދާދިފަހުން އެގައުމުގައި ބޭއްވި އާންމު އިންތިޚާބު ކާމިޔާބު ކުރެއްވުމަށްފަހު މަގާމާއި ހަވާލުވެވަޑައިގެންފަހުން ޕާލިމަންޓުގައި ބޭއްވި ފުރަތަމަ ބައްދަލުވުމުގައި ވިދާޅުވެފައެވެ. މިހާރުވެސް ލަންކާގައި ވަނީ އެގައުމަށް އެތެރެކުރާ މުދާ ކޮންޓްރޯލްކޮށް، ދަނޑުވެރިންގެ ވިޔަފާރިތައް ހިމާޔަތްކު ރުމަށް ފިޔަވަޅުތައް އަޅާފައެވެ. އަދި އެގައުމަށް އެތެރެ ކުރާ މުދާ ބޭރުކުރުން ވެސް ވަނީ މަނާކޮށްފައެވެ.
މޯލްޑިވް ފިޝްގެ ނަމުގައި ސްރީލަންކާއިން މަސް އެކްސްޕޯޓު ކުރާ މައްސަލައާޢި ގުޅިގެން ސަލީމް ކުރެއްވި ސުވާލުގެ ޖަވާބުގައި މިނިސްޓަރ ވިދާޅުވީ ދިވެހި ރާއްޖޭގެ ޕޭޓެންޓިންގް ގާނޫނެއް އަދި ވުޖޫދުގައި ނެތް ކަމަށެވެ. އަދި 'މޯލްޑިވް ފިޝް' ބްރޭންޑް ކުރެވޭނީ މި ގާނޫނު ވުޖޫދުވުމުން ކަމަށެވެ. ޒަހާ ވަނީ އެފަދަ ގާނޫނެއް އެކުލަވާލުމަށް ރައްޔިތުންގެ މަޖިލީހުގައި އެދިވަޑައިގެންފައެވެ.
