"މި ސަރުކާރުން ކޯޓު ޙުކުމަކުން ބޭރުން ބަދަލެއް ދޭން ނިންމާފައިވާނީ ހަމައެކަނި ނޫމަޑިއަށް"
ނޫމަޑި މައްސަލައިގައި ކުރީ ސަރުކާރުން އަމަލު ކޮށްފައިވާ ގޮތުން ދައުލަތަށް ގެއްލުންވި
ފިނޭންސް މިނިސްޓަރ އިބްރާހީމް އަމީރު- ރާއްޖެޓީވީގެ ފަލަސުރުޙީ ޕްރޮގްރާމުގައި ވާހަކަ ދައްކަވަނީ
މި ސަރުކާރުން ކޯޓު ޙުކުމަކުން ބޭރުން ބަދަލެއް ދޭން ނިންމާފައިވަނީ ހަމައެކަނި ނޫމަޑި ރިސޯޓްސް އެންޑް ރެސިޑެންސް އޭޖީ (ނޫމަޑި) މައްސަލައިގައި ކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
އާދިއްތަ ދުވަހުގެރޭ ރާއްޖެޓީވީގެ ފަލަސުރުޙީ ޕްރޮގްރާމްގައި ވާހަކަ ދައްކަވަމުން މިނިސްޓަރ ވިދާޅުވީ، މި ސަރުކާރުން ބަދަލު ދިނުމުގައި ނާއިންސާފުން އެއްވެސް ކަމެއް ކޮށްފައި ނުވާނެ ކަމަށެވެ. އެގޮތުން ބަދަލުގެ ގޮތުގައި ދީފައިވަނީ ކޯޓުގެ ޙުކުމެއްގެ ދަށުން ކަމަށާއި، އޭގެ ބޭރުން ނޫމަޑި މައްސަލައިގައި ސެޓެލްމެންޓް އެގްރީމަންޓަކަށް އާދެވިފައިވާނެ ކަމަށެވެ. އަދި އެއީ އޭރު މަސައްކަތް ކުރި ތަޖުރިބާކާރު ވަކީލުންނާއި ޤާނޫނީ ޓީމުގެ ލަފާގެ މަތިން ކޮށްފައިވާ ކަމެއް ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ، ނޫމަޑި މައްސަލަ ފިޔަވައި ކޯޓުން ބޭރުން އެއްވެސް ފަރާތަކަށް އެފަދައިން ބަދަލެއް ދިނުމަށް ނުވަތަ ސެޓެލްމަންޓަކަށް އައުމަށް ނިންމާފައި ނުވާނެ ކަމަށެވެ. އަދި ނޫމަޑި މައްސަލައިގައި ކުރީ ސަރުކާރުން އަމަލު ކޮށްފައިވާ ގޮތުން 200 މިލިއަން ޑޮލަރު ސަރުކާރުން ދޭން ޖެހިދާނެ ކަމަށްޓަކައި، އެކަމުގައި އެއްބަސްވުމަކަށް އައިކަަން މިނިސްޓަރ ފާހަގަ ކުރެއްވިއެވެ.
ނޫމަޑި ރިސޯޓްސް އެންޑް ރެސިޑެންސް އޭޖީ (ނޫމަޑި) އިން ދިވެހި ސަރުކާރުގެ މައްޗަށް ހުށަހެޅި އާރބިޓްރޭޝަން މައްސަލައިގައި އޭރުގެ ހައުސިންގ މިނިސްޓަރ ޑރ މުޙައްމަދު މުއިއްޒު ދޮގު ބަޔާން ދެއްވުމާއި ގުޅިގެން ދައުލަތަށް ވަނީ ބޮޑެތި ގެއްލުންތަކެއް ކުރިމަތިވެފައެވެ. އަދި އެކަމާ ގުޅިގެން މުއިއްޒުގެ މައްޗަށް ވަނީ ދައުވާ ވެސް އުފުލާފައެވެ.
ރައީސް ޔާމީނުގެ ސަރުކާރުން ބާޠިލު ކުރި ދެ އެއްބަސްވުމެއްގެ މައްސަލައިގައި އޭރު ނޫމަޑިން، އާބިޓްރޭޝަނަށް ހުށަހެޅީ 155 މިލިއަން ޑޮލަރު (2.3 ބިލިއަން ރުފިޔާ) ހޯދުމަށެވެ. ކޯޓުގައި މި މައްސަލަ ހިނގަމުން ދަނިކޮށް އެ ކުންފުންޏާއި ވާހަކަ ދައްކައި ބަދަލުގެ ގޮތުގައި 55 މިލިއަން ޑޮލަރު ދިނީ، ރައީސް އޮފީހުގައި އޮންނަ ސެޓްލްމެންޓް ކޮމިޓީން ނިންމައިގެންނެވެ. އެގޮތުން ނޫމަޑިއާއި އެއްކޮށް ނެގޯޝިއޭޓް ކުރުމަށްފަހު ރައިސުލްޖުމްހޫރިއްޔާގެ ހުއްދައާއި އެކު ނޫމަޑިއާއި އެކު ސެޓްލްމެންޓް އެގްރީމެންޓެއްގައި ސޮއިކޮށްފައި ވަނީ 24 އޮގަސްޓް 2019 ގައެވެ.
