އަބްދުއްސަމަދު މެމޯރިއަލް ހޮސްޕިޓަލުން ކާމިޔާބުކަމާއެކު ކަކުލު ހުޅުގެ އޮޕަރޭޝަނެއް ކޮށްފި
މިއީ ތިނަދޫގައި ތިބި ޑޮކްޓަރުންގެ ޓީމުން މިފަދަ އޮޕަރޭޝަނެއް ކުރި ފުރަތަމަ ފަހަރު
ޑރ. އަބްދުއްސަމަދު މެމޯރިއަލް ހޮސްޕިޓަލުން ކުރިއަށްގެންދިޔަ ކަކުލު ހުޅުގެ އޮޕަރޭޝަންގެ ތެރެއިން
ޑރ. އަބްދުއްސަމަދު މެމޯރިއަލް ހޮސްޕިޓަލްގައި ކާމިޔާބުކަމާއެކު ކަކުލު ހުޅުގެ އޮޕަރޭޝަނެއް ކޮށްފިއެވެ.
ބުދަ ދުވަހު އެ ހޮސްޕިޓަލުން ކުރި މި އޮޕަރޭޝަނަކީ މިހަތާނަށް އެ ރަށުގައި ކުރެވުނު ފަސްވަނަ އޮޕަރޭޝަނެވެ. ނަމަވެސް މިއީ ތިނަދޫގައި ތިބި ޑޮކްޓަރުންގެ ޓީމުން މިފަދަ އޮޕަރޭޝަނެއް ކުރި ފުރަތަމަ ފަހަރެވެ.
ބުދަ ދުވަހު އެ ހޮސްޕިޓަލުން ކަކުލުގެ އޮޕަރޭޝަން ކޮށްފައިވަނީ ތިނަދޫ އަށް އުފަން އުމުރުން 75 އަހަރުގެ ފިރިހެނެކެވެ.
ރާއްޖެ.އެމްވީއަށް މައުލޫމާތު ދެއްވަމުން ޑރ. އަބްދުއްސަމަދު މެމޯރިއަލް ހޮސްޕިޓަލްގެ މެނޭޖަރ އަހުމަދު ސައީދު ވިދާޅުވީ އެ ހޮސްޕިޓަލުގެ ޑޮކްޓަރުންގެ ޓީމުން ކޮށްފައިވަނީ ވަރަށް އަގުހުރި މަސައްކަތެއް ކަމަށެވެ. އެގޮތުން ގދ އަދި ގއ ގެ ރައްތަކުގެ ރައްޔިތުންގެ ވަރަށް ބޮޑު ޑިމާންޑެއް މިކަމުގައި އޮތްކަން އޭނާ ފާހަގަކުރެއްވިއެވެ.
އަހުމަދު ސައީދު ވިދާޅުވީ މީގެ ކުރިން އެ ހޮސްޕިޓަލުގައި ކުރެވުނު އޮޕަރޭޝަންތަކުގައި މާލެއިން ޑޮކްޓަރުންނާއި އޮޕަރޭޝަނަށް ބޭނުންވާ ޓޫލްސް ގެނެސްފައިވާނެ ކަމަށެވެ.
ސައީދު އިތުރަށް ވިދާޅުވީ މި އޮޕަރޭޝަނާއެކު ކުރިއަށް އޮތްތަނުގައި އެ ހޮސްޕިޓަލުން ތަފާތު އެކި ބަލިތަކަށް ކުރަންޖެހޭ އޮޕަރޭޝަންތަކާއި ކުދި ކުދި ސާޖަރީތައް ކުރުމުގެ މަސައްކަތް ފެށިގެންދާނެ ކަމަށެވެ. އެގޮތުން ރާއްޖޭގެ ފަސް ސަރަހައްދެއްގައި ޓާޝިއަރީ ފެންވަރުގެ ހޮސްޕިޓަލްތައް ހެދުމަށް ސަރުކާރުން ގެންގުޅޭ ސިޔާސަތުގެ ދަށުން މިހާރު ވެސް ބައެއް މެނިޝަރީޒް ލިބިފައިވާ ކަމަށް އޭނާ ވިދާޅުވިއެވެ. އެއާއެކު ކައިރި މުސްތަގުބަލެއްގައި ގިނަ ހިދުމަތްތަކެއް ޑރ. އަބްދުއްސަމަދު މެމޯރިއަލް ހޮސްޕިޓަލުން ލިބޭނެ ކަމަށް ސައީދު ވަނީ ވިދާޅުވެފައެވެ.
މިފަހަކަށް އައިސް ރާއްޖޭގެ ގިނަ ހޮސްޕިޓަލް ތަކެއްގައި ސިއްޙީ ނިޒާމު ރަނގަޅުވަމުން އަންނައިރު، އެ ހޮސްޕިޓަލުތަކުން އަންނަނީ ހިތުގެ އޮޕަރޭޝަނާއި ނާރުގެ އޮޕަރޭޝަން ކަށީގެ ބޮޑެތި އޮޕަރޭޝަންތައް ކާމިޔާބުކަމާއެކު ކުރަމުންނެވެ.
