އޮންލައިން ވިޔަފާރިތަކަށް ފަހި މާހައުލެއް ގާއިމުކޮށް ދިނުމަށް ''ލިސްޓިންގ ވެބްސައިޓެއް'' ޑިވެލޮޕް ކުރުމުގެ މަސައްކަތް ފަށައިފިއެވެ.

ބިޒްނަސް ސެންޓަރ ކޯޕަރޭޝަން ލިމިޓެޑުން ބުނީ މިނިސްޓްރީ އޮފް އިކޮނޮމިކް ޑިވެލޮޕްމަންޓާއި ޔޫ.އެން.ޑީ.ޕީ މޯލްޑިވްސް އާއި ބިޒްނަސް ސެންޓަރ ކޯޕަރޭޝަނާއި ގުޅިގެން ކޮވިޑް-19 ޕްންޑެމިކްގައި ކުދި އޮންލައިން ވިޔަފާރިތަކަށް އަމާޒުކޮށްގެން އަދި އެފަދަ ވިޔަފާރިތަކަށް ފަހި މާހައުލެއް ގާއިމުކޮށްދިނުމުގެ މަގުސަދުގައި ގިނަ މަސައްކަތްތަކެއް ކުރަމުންދާ ކަމަށެވެ.

އެ މަސައްކަތްތަކުގެ ތެރެއިން އަޒަބައިޖާންގެ މިނިސްޓްރީ އޮފް ޓްރާންސްޕޯޓް، ކޮމިއުނިކޭޝަންސް އެންޑް ހައި ޓެކްނޮލޮޖީޒް އާއި ޔޫ.އެން.ޑީ.ޕީ އަޒަބައިޖާންއާއެކު ވެވުނު ޕާޓްނަޝިޕެއްގެ ދަށުން އޮންލައިންކޮށް ޚިދުމަތް ފޯރުކޮށްދޭ ވިޔަފާރިތަކަށް އަމާޒުކޮށްގެން ލިސްޓިންގ ވެބްސައިޓެއް ޑިވެލޮޕް ކުރުމުގެ މަސައްކަތް ކުރަމުންދާ ކަމަށް އެ ކޯޕަރޭޝަނުން ބުނެއެވެ.

ބިޒްނަސް ސެންޓަރ ކޯޕަރޭޝަނުން ބުނީ މި ވެބްސައިޓްގެ ޒަރިއްޔާއިން އެފަދަ ވިޔަފާރިތަކަށް ވެބްސައިޓްގައި ހިލޭ ލިސްޓް ކުރުމުގެ ފުރުސަތު ލިބިގެންދާނެ ކަމަށެވެ.

އެގޮތުން ތައުލީމާއި، ސިއްހަތާއި، މުނިފޫހިފިލުވުމާއި، ކެއިންބުއިމުގެ ޚިދުމަތްތަކާއި އަދި މިނޫން ވެސް ގިނަގުނަ ޚިދުމަތްތައް ހިމެނޭ ކަމަށް އެ ކޯޕަރޭޝަނުން ބުނެއެވެ.

މީގެ އިތުރުން ބިޒްނަސް ސެންޓަރ ކޯޕަރޭޝަނުން ބުނީ އާންމު ވިޔަފާރީގެ މާހައުލުގައި އުޅޭއިރު، ގަނެ ވިއްކުމުގައި، އިޖްތިމާއީ ގައިދުރުކަން ބެހެއްޓުމާއި ވިޔަފާރީގެ މުއާމަލާތްތައް ހިންގާއިރު ސަމާލުކަން ދޭންޖެހޭ ކަންކަމާއި ގުޅޭގޮތުން އަގުހުރި މައުލޫމާތު ފޯރުކޮށްދިނުމަކީ ވެސް އެ ވެބްސައިޓްގެ އެއް މަގުސަދު ކަމަށެވެ. އަދި ޑިޖިޓަލް ވިޔަފާރިއެއް ފަށައިގަތުމާއި ގޭގައި ތިބެގެން ވިޔަފާރިއެއް ހިންގަން ކަންކުރަންވީ ގޮތުގެ އިރުޝާދުތަކާއި މައުލޫމާތުތައް ބަދަލުވަމުންދާ މާހައުލާއި، ގާނޫނާއި ގަވާއިދުތަކަށް ރިއާޔަތް ކުރުމަށްފަހު މި ވެބްސައިޓްގެ ޒަރިއްޔާއިން ފޯރުކޮށްދޭނެ ކަމަށް އެ ކޯޕަރޭޝަނުން ބުނެއެވެ.

ބިޒްނަސް ސެންޓަރ ކޯޕަރޭޝަނުން ބުނީ މިވެބްސައިޓްގައި ލިސްޓު ކުރަން ބޭނުންވާ އެންމެހާ އޮންލައިން ވިޔަފާރިތަކުން ގޫގުލް ރެޖިސްޓްރޭޝަން ލިންކް:https://forms.gle/cbtEw23RwfYSMNUt5މެދުވެރިކޮށް ރަޖިސްޓްރީ ކުރުމަށް އެދޭ ކަމަށެވެ.

ވެބްސައިޓް ލޯންޗް ކުރުމަށް ހަމަޖެހިފައިވަނީ ސެޕްޓެންބަރ މަހުގެ ތެރޭގައިއެވެ. އަދި ވެބްސައިޓް ލޯންޗް ކުރުމަށްފަހު ވެބްސައިޓް މެދުވެރިކޮށް ވެސް އެފަދަ ވިޔަފާރިތަކަށް ރަޖިސްޓަރ ކުރެވޭނެ ކަމަށާއި، ފުރަތަމަ ބެޗްގައި ރެޖިސްޓަރ ކުރުމުގެ ސުންގަޑި އަކީ 3 ސެޕްޓެންބަރ 2020 ވާ ބުރާސްފަތި ދުވަހުގެ މެންދުރު 3 ކަމަށް އެ ކޯޕަރޭޝަނުން ބުނެއެވެ.