މާލެ ސިޓީގައި ކޮވިޑް-19ގެ ކޭސްތައް ވަރަށް ބޮޑަށް އިތުރުވަމުން ދިއުމާއެކު ރާއްޖެޓީވީގެ މުވައްޒަފުން ދެވަނަ ފަހަރަށް ސްޓޭޝަންގައި ލޮކްޑައުންވެއްޖެއެވެ.

ލޮކްޑައުން ވެފައިވަނީ ބުރާސްފަތި ދުވަހުގެ ރޭ 12:00 ގައި، 14 ދުވަހުގެ މުއްދަތަކަށެވެ.

މިކަމާއި ގުޅިގެން ރާއްޖެޓީވީގެ ޑެޕިއުޓީ ސީއޯއޯ ނާޒްމީ ސައީދު ވިދާޅުވީ، ހާލަތު ބަދަލު ވަމުން ދާލެއް އަވަސް ވުމާއެކު، މި ފިޔަވަޅު އަޅަން ނިންމީ ރާއްޖެޓީވީގެ ނޫސްވެރިން ރައްޔިތުންނަށް މި މުހިންމު ދަނޑިވަޅުގައި ދެމުންދާ ޚިދުމަތަށް ބުރުލެއް އެރިޔަ ނުދިނުމާއެކު، މުވައްޒަފުންގެ ސަލާމަތާ ރައްކާތެރިކަމަށް ކަމަށެވެ.

ސްޓޭޝަންއަށް އާންމުކޮށް ވަދެ ނުކުތުން ވެސް މަނާކޮށްފައިވާއިރު، ބޭރުން ގެނެވޭ ކާބޯތަކެތި ވައްދަނީ ޑިސްއިންފެކްޓްކޮށް، ރައްކާތެރިކަމުގެ ގޮތުން އަޅަންޖެހޭ ފިޔަވަޅުތަކާއެކުއެވެ.

މިގޮތުން ސްޓޭޝަންގައި ތިބޭ މުވައްޒަފުން ނޫން މުވައްޒަފުން މަސައްކަތް ކުރަމުންދާނީ ގޭގައި ތިބެގެންނެވެ. އަދި މި މުއްދަތުގެ ތެރޭގައި ރާއްޖެޓީވީގެ އިމާރާތް އާއްމުކޮށް ބަންދުކޮށްފައި ބެހެއްޓުމަށް ވެސް ވަނީ ކަނޑައަޅާފައެވެ.

ކޮވިޑް-19 އަށް ރައްޔިތުން ހޭލުންތެރިކަން އިތުރު ކުރުމުގެ ގޮތުން ޚާއްސަ ކަވަރޭޖެއް އެންމެ ފުރަތަމަ ރާއްޖޭގައި ފަށާފައިވަނީ ރާއްޖެޓީވީންނެވެ.

ރާއްޖެޓީވީގެ މުއައްޒަފުން ދެވަނަ ފަހަރަށް ސްޓޭޝަންގައި ލޮކްޑައުންވާން ނިންމާފައިވާއިރު، މީގެ ކުރިން ވެސް 30 ދުވަހުގެ މުއްދަތަށް މުއައްޒަފުން ސްޓޭޝަންގައި ލޮކްޑައުން ވެފައިވެއެވެ.