މިދިޔަ އަހަރު ކުޑަކުދިންނާ ގުޅޭ މަސްތުވާތަކެތީގެ 119 މައްސަލައެއް
27 އޯގަސްޓު 2020 | ބުރާސްފަތި 12:36މިއީ ހުށަހެޅުނު މައްސަލަތަކުގެ 35 އިންސައްތަ
ޖުވެއިނަލް ޖަސްޓިސް ޔުނިޓް އިން ކުރިޔަށް ގެންދިޔަ ޕްރޮގްރާމެއްގެ ތެރެއިން
މިދިޔަ އަހަރު ޖުވެއިނަލް ޖަސްޓިސް ޔުނިޓް (ޖޭޖޭޔޫ) އަށް ކުޑަކުދިންނާ ގުޅޭ ގޮތުން އެންމެ ގިނައިން ހުށައެޅިފައިވަނީ މަސްތުވާތަކެތި މައްސަލަތައް ކަމަށާއި އޭގެ ތެރޭގައި 119 މައްސަލައެއް ހިމެނޭ ކަމަށް ޖުވެއިނަލް ޖަސްޓިސް ޔުނިޓް އިން ބުނެފިއެވެ.
2018 ވަނަ އަހަރާއި 2019 ވަނަ އަހަރު ހުށައެޅުނު މައްސަލަތަކުގެ ތަފްސީލު ރިޕޯޓު ވަނީ ހަމަކޮށްފައެވެ. އެ އިދާރާއިން ހާމަކޮށްފައިވާ ގޮތުން 119 މައްސަލަ އަކީ މަސްތުވާތަކެތި ބޭނުން ކުރުމާއި ގެންގުޅުމާއި އަތުގައި ބެހެއްޓުމާއި، މަސްތުވާތަކެތި އެތެރެ ކުރުމާއި ވިއްކުމާއި، ބަނގުރާ ބޭނުން ކުރުމާއި އަތުގައި ބެހެއްޓުން ފަދަ މަސްތުވާތަކެއްޗާ ގުޅޭ މައްސަލަތަކެވެ. އެ މައްސަލަ ތަކަކީ ހުށަހެޅުނު މައްސަލަތަކުގެ 35 އިންސައްތައެވެ.
މި މައްސަލަތަކުގެ ތެރޭގައި ހިމެނޭ ފިރިހެން ކުދިން ކުރާ ކުށްތަކުގެ ބާވަތްތަކަށް ބަލާއިރު، 2017 ވަނަ އަހަރު އެންމެ ގިނައިން ހުށަހެޅުނު މައްސަލަތަކުގެ ތެރޭގައި ހިމެނެނީ މަސްތުވާތަކެތި ބޭނުންކޮށް ގެންގުޅުމާއި، ވައްކަން ކުރުމާއި، މާރާމާރީ (ޖެހުން)ގެ މައްސަލަތައް ކަމަށް ޖޭޖޭޔޫ އިން ބުންޏެވެ.
މިދިޔަ އަހަރު ބޮޑެތި ނުވަތަ އަނިޔާވެރިކަން ހިމެނޭ މައްސަލަތަކުގައި ތޫނު ހަތިޔާރު ގެންގުޅުމާއިތޫނު ހަތިޔާރު ބޭނުންކޮށްގެން މާރާމާރީ ހިންގުމުގެ ހަތް މައްސަލަ އެއް ޖޭޖޭޔޫ އަށް ހުށައެޅެނެވެ.
ވޭތުވެދިޔަ އަށް އަހަރާ އަޅާބަލާއިރު މާރާމާރީގެ މައްސަލަތައް ހުށައެޅުނު އަދަދު ގިނަކަމުގައި ވިޔަސް މިދިޔަ އަހަރު 18 އަހަރުން ދަށުގެ ކުދިން ހިމެނޭ ބޮޑެތި ނުވަތަ އަނިޔާވެރި އަމަލު ހިމެނޭ މައްސަލަތައް ވަރަށް ބޮޑުތަން މަދުވެފައިވާކަން ރިޕޯޓުގައި ވަނީ ފާހަގަކޮށްފައެވެ.
ޖޭޖޭޔޫ އިން މިދިޔަ އަހަރު ހުށައެޅުނު މައްސަލަތަކުގެ އެންމެ ގިނައިން ހުށައެެޅިފައިވަނީ އަތޮޅުތަކުންނެވެ. އެއީ ހުށައެޅުނު މައްސަލަތަކުގެ 52 އިންސައްތައެވެ. މާލެ ފިޔަވައި އަތޮޅު ތެރެއިން އެންމެ ގިނައިން މައްސަލަ ހުށައެޅިފައިވަނީ ސ، ހއ، ރ، އަދި ގދ އަތޮޅުންނެވެ.
