ފަރިތަކުރުންތައް ފެށުމުގެ ހުއްދަ މާޒިޔާ، ޓީސީ އަދި ގައުމީ ފުޓްބޯޅަ ޓީމަށް ދީފި

އޭއެފްސީ ކަޕްގައި ވާދަކުރާ މާޒިޔާ ސްޕޯޓްސް އެންޑް ރެކްރިއޭޝަނާއި، ޓީސީ ސްޕޯޓްސް ކުލަބު އަދި ގައުމީ ފުޓްބޯޅަ ޓީމަށް ފަރިތަކުރުންތައް ފެށުމުގެ ހުއްދަ ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ދީފިއެވެ.

މާލެ ސަރަހައްދުގައި ކޮވިޑް-19 ފެތުރުން އިތުރުވަމުން ދާތީ، މި މަހުގެ ކުރީކޮޅު ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ވަނީ ރައްކާތެރިކަމުގެ ފިޔަވަޅެއްގެ ގޮތުން މި ދުވަސްވަރު ކުޅިވަރު ހަރަކާތްތަކާއި ޓީމުތަކުގެ ފަރިތަކުރުންތައް ކުރިއަށް ނުގެންދަން ލަފާ ދީފައެވެ. އެއާއެކު ގައުމީ ފުޓްބޯޅަ ޓީމުގެ ފަރިތަކުރުންތައް މެދުކަނޑާލިއެވެ.

އޮކްޓޯބަރު މަހު މާލޭގައި ފަށާ އޭއެފްސީ ކަޕްގެ ދެކުނު އޭޝިއާގެ ގްރޫޕް މެޗުތަކަށް ތައްޔާރުވާން މާޒިޔާއިން މީގެ ކުރިން ވަނީ ވީ އެންމެ އަވަހަށް ފަރިތަކުރުންތައް ފެށޭނެ ގޮތެއް މަގުފަހިކޮށްދިނުމަށް އެދެފައެވެ. އެއާއެކު އަންގާރަ ދުވަހު އެޗްޕީއޭއިން ވަނީ މާޒިޔާ އާއި، ޓީސީ އަދި ގައުމީ ފުޓްބޯޅަ ޓީމުގެ ފަރިތަކުރުންތައް ފެށުމުގެ ހުއްދަ ދީފައެވެ.

އެޗްޕީއޭއިން މައުލޫމާތުދޭ ގޮތުގައި ޓީމުތަކުން ފަރިތަކުރުންތައް ކުރިއަށް ގެންދަންޖެހޭނީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އެކުލަވާލާފައިވާ އުސޫލުތަކާ އެއްގޮތަށެވެ.

އޭއެފްސީ ކަޕްގެ ދެކުނު އޭޝިއާއަށް ހާއްސަ ގްރޫޕްގެ ހުރިހާ މެޗެއް މާލޭގައި ކުރިއަށްދާއިރު، މެޗުތައް ކުޅޭނީ އޮކްޓޯބަރު މަހުގެ 23ން ނޮވެމްބަރު ހަތަރަކާ ދެމެދުއެވެ. މީގެ ކުރިން މެޗުތައް ބޭއްވުމުގައި އަމަލު ކުރަންވީ ގޮތުގެ ލަފާ ހޯދުމަށް އެފްއޭއެމް އާއި ކުޅިވަރާ ބެހޭ ވުޒާރާއިން ވަނީ އެޗްޕީއޭއާ ބައްދަލުކޮށް މަޝްވަރާ ކޮށްފައެވެ.

އޭއެފްސީ ކަޕްގެ ދެކުނު އޭޝިއާގެ ޓީމުތަކުގެ ގްރޫޕްގައި ރާއްޖޭގެ މާޒިޔާ އާއި ޓީސީ ވާދަކުރަމުން އަންނައިރު، މީގެ ކުރިން ގްރޫޕް ސްޓޭޖުގެ ފުރަތަމަ މެޗުގައި މި ދެ ޓީމު ވަނީ މާޗު މަހު 12 ވަނަ ދުވަހު ވާދަކޮށްފައެވެ. އެ ދުވަހު ބަންގްލަދޭޝްގައި އެ ގައުމުގެ ބަޝުންދުރާ ކިންގްސްއާ ދެކޮޅަށް ޓީސީ ކުޅުނު މެޗުން އެޓީމު ވަނީ 5-1 ން ބަލިވެފައެވެ. އަދި އިންޑިއާގައި މާޒިޔާ ވަނީ އެ ގައުމުގެ ޗެންނާއީ ސިޓީ އެފްސީއާ 2-2 ން އެއްވަރުކޮށްފައެވެ.

މީގެ އިތުރުން ގައުމީ ފުޓްބޯޅަ ޓީމުގެ ފަރިތަކުރުންތައް ފެށުމުގެ ހުއްދަ ދީފައިވީ ނަމަވެސް، މިއަހަރުގެ އޮކްޓޯބަރު މަހާއި ނޮވްމެބަރު މަހަށް މީގެ ކުރިން ތާވަލުކުރި ފީފާ ވޯލްޑް ކަޕް އަދި އޭއެފްސީ އޭޝިއަން ކަޕްގެ ޖޮއިންޓް ކޮލިފައިންގ މެޗުތައް އަންނަ އަހަރަށް މިހާރު ވަނީ ފަސްކޮށްފައެވެ. އެކަމަކު ގައުމީ ފުޓްބޯޅަ ޓީމުން ޔުނައިޓެޑް އަރަބި އެމިރޭޓްސް (ޔޫއޭއީ) އާއެކު އެކުވެރިކަމުގެ މެޗުތަކެއް މާލޭގައި އާއި ޔޫއޭއީގައި ކުޅުމަށް ތައްޔާރުވަމުންދާ ކަމަށް މައުލޫމާތުލިބެއެވެ.