ގެސްޓް ހައުސްތައް ހުޅުވަންވެއްޖެ: ޓޫރިޒަމް މިނިސްޓަރ
ރާއްޖެ އަންނަ ފަތުރުވެރިންގެ އަދަދު އިތުރުވާނެ ކަމަށް ބެލެވޭ
ޓޫރިޒަމް މިނިސްޓަރ ޑރ. ޢަބްދުﷲ މަޢުޞޫމް، ރައީސް އޮފީހުން ނިކުންނަވާ ހިންގަވާފަ ވަޑައިގަންނަވަނީ
ފަތުރުވެރިކަމުގެ ސިނާއަތުގެ ތެރެއިން ގެސްޓުހައުސް ވިޔަފާރިތަކަށް އަލުން ހުއްދަދޭންވާ ވަގުތު ޖެހިއްޖެކަމަށް ސަރުކާރަށް ޤަބޫލު ކުރެވޭކަމަށް ޓޫރިޒަމް މިނިސްޓަރ ޑރ. ޢަބްދުﷲ މަޢުޞޫމް ވިދާޅުވެއްޖެއެވެ.
ބުދަ ދުވަހުގެރޭ ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުން މިނިސްޓަރ ވިދާޅުވީ، ގެސްޓްހައުސް ވިޔަފާރިތައް ހިނގައި ނުގަނެވުމަކީ މިވަގުތުގެ ބޮޑު ކަންބޮޑުވުމެއް ކަމަށެވެ. އެގޮތުން ގެސްޓްހައުސް ސިނާއަތަކީ ފަތުރުވެރިކަމުގެ މުހިއްމު ސިނާއަތެއްކަން ފާހަގަކުރައްވައި މިނިސްޓަރ ވިދާޅުވީ، އަވަސް މުއްދަތެއްގައި ގެސްޓްހައުސް ވިޔަފާރިތައް އަލުން ހުޅުވާލެވޭނެ ދުވަހެއް ކަނޑައެޅިގެން ދާނެކަމަށް އުއްމީދު ކުރައްވާކަމަށެވެ.
މިނިސްޓަރ ވިދާޅުވީ، އެ މަޝްވަރާތަކުގައި މިހާރު ކުރިއެރުންތަކެއްވެސް ލިބިފައިވާ ކަމަށެވެ. އަދި ގެސްޓްހައުސްތައް އަލުން ހުޅުވާލުމުގެ ހުއްދަ ދޭންވާ ވަގުތު ޖެހިއްޖެކަން ސަރުކާރަށްވެސް ޤަބޫލު ކުރެވޭކަމަށް މިނިސްޓަރ ވިދާޅުވިއެވެ.
މިނިސްޓަރ އިތުރަށް ވިދާޅުވީ، ފަތުރުވެރިންގެ ޕީސީއާރް ޓެސްޓް ހެދުމުގައިވެސް ކުރިން ދަތިތަކެއް ހުރި ނަމަވެސް، މިހާރު އެކަމަށްވެސް ލުއިފަސޭހަ ގޮތްތަކެއް ހެދުމަށް ކަމާބެހޭ ފަރާތްތަކުން މަސައްކަތްތައް ކުރަމުންދާ ކަމަށެވެ. އެގޮތުން ރަށްރަށުން ސާމްޕަލް ގެނައުމާއި، ޓެސްޓު ހެދޭނެ އިންތިޒާމުތައް މިހާރު ހަމަޖެހިފައިވާކަން ފާހަގަކުރައްވައި މިނިސްޓަރ ވިދާޅުވީ، މިއަހަރުގެ ޑިސެމްބަރު މަހުގެ ތެރޭގައި ރާއްޖޭގެ ޙާލަތު ރަނގަޅުވާނެ ކަމަށް އުއްމީދު ކުރެއްވޭ ކަމަށެވެ. އެގޮތުން ރާއްޖެ އަންނަ ފަތުރުވެރިންގެ އަދަދު އިތުރުވާނެ ކަމަށް ބެލެވޭކަމަށް މިނިސްޓަރ ވިދާޅުވިއެވެ.
އޭގެ އިތުރުން، ގެސްޓްހައުސްތަކާއި، ސަފާރީތަކާއި، ރިސޯޓުތަކުގެ އިތުރުން، އެހެނިހެން ފަތުރުވެރިކަމާ ގުޅޭ ސިނާއަތްތައްވެސް މިވަގުތު އޮތީ ބޮޑު ކަންބޮޑުވުމެއްގައިކަން ފާހަގަކުރައްވައި މިނިސްޓަރ އިތުރަށް ވިދާޅުވީ، ރާއްޖޭގެ ބޯޑަރުތައް އަލުން ހުޅުވާލާފައިވަނީވެސް އެ ކަންކަމަށް ރިއާޔަތް ކުރެއްވުމަށް ފަހު ކަމަށެވެ.
މިހާރުވެސް ފެންނަމުންދާ ކޭސްތައް މަދުކުރުމަކީ ދިވެހިންގެ އަތްމަތީގައި އޮތް ކަމެއްކަން ފާހަގަ ކުރައްވައި މިނިސްޓަރ ވިދާޅުވީ، އެކަމަށްޓަކައި ހެލްތް ޕްރޮޓެކްޝަން އޭޖެންސީ (އެޗްޕީއޭ) ގެ އިރުޝާދުތަކަށް ބޯލެނބުމަކީ މުހިއްމު ކަމެއް ކަމަށެވެ. އޭގެއިތުރުން، މިނިސްޓަރ ވަނީ ވައިރަސްގެ ކޮމިއުނިޓީ ސްޕްރެޑެއް ފެނިފައިނުވާ ރަށްރަށަށް ވައިރަސް ފެތުރިގެން ދިއުމަށް މަގުފަހިވެދާނެ ކަންކަމުން ދުރުވުމުގެ މުހިއްމުކަމަށްވެސް އަލިއަޅުވާލައްވާފައެވެ.
