ސްޕޯޓްސް ކޯޕަރޭޝަން އުވާލުމަށް ވަރަށް ހަރުކޮށް ވަކިގޮތެއް ނިންމައިގެނެއް ނޫން މިތިބީ: މަޙްލޫފް

މޯލްޑިވްސް ސްޕޯޓްސް ކޯޕަރޭޝަން އުވާލާ ވާހަކަ ދައްކާފައިވަނީ އަމިއްލަ ތަޖުރިބާގެ އަލީގައި ކަމަށާއި، ސްޕޯޓްސް ކޯޕަރޭޝަން އުވާލުމަށް ވަރަށް ހަރުކޮށް ވަކިގޮތެއް ނިންމައިގެން ނުތިބޭ ކަމަށް ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވެއްޖެއެވެ.

މީގެ ކުރިން މިދިޔަ ޖުލައި މަހު ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒަސް ކޮމިޓީއަށް ހާޒިރުވެ، މެންބަރުންގެ ސުވާލުތަކަށް ޖަވާބު ދެއްވަމުން ވަޒީރު ވަނީ މިހާރު އެކުލަވާލާފައިވާ ކުޅިވަރު ޤާނޫނަށް އިސްލާހު ގެނެސް، ސްޕޯޓްސް ކޯޕަރޭޝަން އުވާލަން ނިންމާފައިވާ ކަމަށް ވިދާޅުވެފައެވެ. އެފަހަރު ވަޒީރު ވިދާޅުވީ ސްޕޯޓްސް ކޯޕަރޭޝަނަކީ އަމިއްލައަށް ކަމެއް ކުރުމުގެ ކެޕޭސިޓީއެއް ނެތް ގެއްލުމުގައި ކުރިއަށްގެންދާ ކުންފުންޏެއް ކަމަށާއި، އެހެން ކަމުން ފިނޭސް މިނިސްޓްރީ އާއެކު ކުރެވުނު މަޝްވަރާތަކަށްފަހު ސްޕޯޓްސް ކޯޕަރޭޝަން އުވާލަން އެއީ އެންމެ ރަނގަޅު ގޮތް ކަމަށް ނިންމާފައިވާ ކަމަށެވެ.

އެކަމަކު ހޯމަ ދުވަހު އޮތް ރައްޔިތުންގެ މަޖިލީހިގެ ޖަލްސާގައި ބިލެތްދޫ ދާއިރާގެ މެންބަރު އަޙްމަދު ޙަލީމް ކުރެއްވި ސުވާލަކަށް ޖަވާބު ދެއްވަމުން ވަޒީރު ވިދާޅުވީ ސްޕޯޓްސް ކޯޕަރޭޝަން އުވާލާ ވާހަކަ މީގެ ކުރިން ދައްކާފައިވަނީ އަމިއްލަ ވިސްނުމުގައި ކަމަށާއި، ކޯޕަރޭޝަން އުވާލުމުގެ ވިސްނުމަކީ ސްޕޯޓްސް ކައުންސިލްގެވެސް ވިސްނުމެއް ކަމަށެވެ.

ތަޖުރިބާއަށް ބަލާފައި އެ ވާހަކަ ދެއްކި ނަމަވެސް، ސްޕޯޓްސް ކޯޕަރޭޝަނާ ގުޅޭގޮތުން އަމަލުކުރަންވީ ގޮތުގެ ލަފަޔަކަށް ރައީސް އޮފީހުގައި އެދިފައިވާނެ ކަމަށާއި، ކޯޕަރޭޝަނާ މެދު ސީދާ ގޮތެއް ނިންމަވާނީ ރައީސުލްޖުމުހޫރިއްޔާ ކަމަށް މަޙްލޫފް ވިދާޅުވިއެވެ. ރައީސް ވަކިގޮތެއް ނިންމުމާއެކު ކުޅިވަރު ޤާނޫނަށް ހުށަހަޅާ އިސްލާހުތަކާއެކު، އެ އިސްލާހުވެސް ހުށަހަޅާނެ ކަމަށާއި، ސްޕޯޓްސް ކޯޕަރޭޝަނަކީ ސީދާ އުވާލަންޖެހޭ ތަނެއްގެ ގޮތުގައި ދެކި، އެގޮތައް މަސައްކަތް ނުކުރާ ކަމަށް މަޙްލޫފް ވިދާޅުވިއެވެ.

މިހާރު އެކުލަވާލާފައިވާ ކުޅިވަރު ޤާނޫނަށް އިސްލާހު ގެނެސް، ސްޕޯޓްސް ކޯޕަރޭޝަން އުވާލަން ނިންމާފައިވާ ކަމަށް މަޙްލޫފް މީގެ ކުރިން ވިދާޅުވެފައިވާ ވިދާޅުމަށް ރާއްޖެޓީވީގެ "ކުޅިވަރު ފައިލް" ޕްރޮގްރާމުގައި ވާހަކަ ދައްކަވަމުން ސްޕޯޓްސް ކޯޕަރޭޝަންގެ މެނޭޖިންގ ޑިރެކްޓަރު އަޙްމަދު މައުރޫފް (މާއްޓޭ) ވިދާޅުވީ އެ ކޯޕަރޭޝަނަކީ ކުޅިވަރުގެ އިންފްރާސްޓްރަކްޗާ ގާއިމުކުރުމަށްޓަކައި ވަރަށް މުހިންމު ކޯޕަރޭޝަނެއް ކަމަށާއި، އެ ކޯޕަރޭޝަން ދެމި އޮންނަން ޖެހޭ ކަމަށް ވިދާޅުވެފައެވެ.

ސްޕޯޓްސް ކޯޕަރޭޝަނުން މިހާރުވެސް މަސައްކަތް ކުރަމުން ދަނީ ކުންފުނި އުވާލާނެ ކަމަށް ދެކިގެން ނޫން ކަމަށާއި، ކޯޕަރޭޝަންގެ ބޯޑުން ދުރު މުސްތަގުބަލަށް ވިސްނައިގެން މަސައްކަތް ކުރަމުންދާއިރު، މާއްޓޭ ވިދާޅުވީ ފިނޭންސް މިނިސްޓްރީގެ އެދުމުގެ މަތިން މިހާރު ކޯޕަރޭޝަނުން ފަސް އަހަރު ދުވަހުގެ މަގުޗާޓެއް އެކުލަވާލައި، އޭގައި ބޮޑެތި އިންވެސްޓްމަންޓްތަކާއި ފަންނީ ގޮތުން ކުރާނެ މަސައްކަތްތައް ހިމަނާފައިވާނެ ކަމަށެވެ.

އަދި ރިކަރަންޓް ޚަރަދުތަކުގެ އިތުރުން އަހަރުން އަހަރަށް ކުރިއަށްގެންދާ މަޝްރޫއުތަކަށް އެދުމަށް ފިނޭސުން އަންގާފައިވާ ކަމަށާއި، އެގޮތުން އިންޑޯ ވޮލީބޯޅަ ކޯޓަކާއި، ފުޓްބޯޅަ ދަނޑަކަށް ބޭނުންވާ ފައިސާ ހޯދުމަށް އެދިފައިވާއިރު، ކުރިޔަށް އޮތް ތިން އަހަރުގެ ތެރޭގައި އަމިއްލަ ފައި މައްޗަށް ތެދުވުމަށް ކޯޕަރޭޝަންގެ ވިސްނުން ހުރީ އަތޮޅުތެރޭގައި ކުޅިވަރުގެ ވަސީލަތް ގާއިމުކޮށްގެން ކަމަށް މާއްޓޭ ވިދާޅުވިއެވެ.

ކުޅިވަރުގެ ޤާނޫނުގެ ދަށުން އުފައްދާފައިވާ ސްޕޯޓްސް ކޯޕަރޭޝަން އުވާލަން މަސައްކަތް ކުރަމުން އަންނައިރު، އެ ކޯޕަރޭޝަނުގެ މަގުސަދުތަކުގެ ތެރޭގައި ރާއްޖޭގައި ކުޅިވަރުގެ އިންފްރާސްޓްރަކްޗާ ކުރިއެރުވުމާއި، ސްޕޯޓްސް ޗެނަލް ތަރައްގީކުރުމާއި، ކުޅިވަރު ކުޅޭ ފަރާތްތަކުގެ ގާބިލުކަން ކުރިއެރުވޭނެ ޕްރޮގްރާމުތައް ރާވައި ހިންގުމާއި، ކުޅިވަރު ދާއިރާގައި ހަރަކާތްތެރިވާ ފަރާތްތައް އިތުރަށް ކުރިއަރުވާ ތަމްރީނު ހޯދާނެ މަގު ފަހިކޮށްދިނުން ހިމެނެއެވެ.

މީގެ އިތުރުން އެ ކުންފުނީގެ ބެލުމުގެ ދަށުފައިވާ ކުޅިވަރު ވަސީލަތްތަކުގެ ބޭނުން ކުލަބުތަކާއި އެސޯސިއޭޝަންތަކަށް ބޭނުން ހިފޭނެ މަގުފަހިކޮށްދީ އެނޫން ފަރާތްތަކަށް އެ މުދަލުން މުއާމަލާތްކޮށް ވިޔަފާރި އުސޫލުން މަންފާ ހޯދުންވެސް ހިމެނެއެވެ.