އާދީއްތަ ދުވަހުގެ ރޭގެ 8:00ން ފެށިގެން ފަތިހު 5:00އާ ހަމައަށް ކޮންމެ ރެއަކު ވެސް އެއްގަމު އުޅަނދު ދުއްވުން މަނާ ވާނެ ކަމަށް ހެލްތް އެމަރޖެންސީ އޮޕަރޭޝަން ސެންޓަރުން ބުނެފިއެވެ.
ހޮނިހިރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެ ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވި މާދަމާ ރެއިން ފެށިގެން އެގޮތަށް އަމަލުކުރަމުން ނިންމާފައިވާއިރު މިހާރު ވެސް އަމަލު ކުރަމުން އަންނަ ގޮތަށް ރޭގަނޑު 10:00ން ފަތިހު 5:00ށް ބޭރަށް ނުކުމެ އުޅުން މަނާވާނެ ކަމަށެވެ.
އަލަށް އެޅި ފިޔަވަޅުތަކާއި ގުޅޭ ގޮތުން ޑރ. ނަޒްލާ ވިދާޅުވީ ގިނަ އަދަދަކަށް ޕޮޒިޓިވް ކޭސްތައް އިތުރުވެފައިވާ ކަމަށާއި، ކުރިން ދުވަހަކު ގިނަ އަދަދެއްގެ ޕޮޒިޓިވް ކޭސްތަކެއް އަނެއްކާ ވެސް ފެނިފައިވާ ކަމަށެވެ. އަދި މިއާއެކު ބަލި ކޮންޓްރޯލް ކުރުމަށް އެއްވެއުޅުމާއި އެހެނިހެން ކަންތައްތަކަށް ކޮންކަހަލަ ބަދަލުތަކެއްތޯ ގެނެވޭނީ ބެލުމަށްފަހު އަދި މަޝްވަރާ ކުރުމަށްފަހު ނިމިފައި އޮތީ މާދަމާ (އާދީއްތަ ދުވަސް) ރެއިން ފެށިގެން މާލެ ހުޅުމާލެ އަދި ވިލިމާލޭގައި ރޭގަނޑު 8:00ން ފެށިގެން ފަތިހު 5:00އާ ހަމައަށް އެއްގަމު އުޅަނދު ފަހަރު ދުއްވުން މަނާކުރުމަށް ކަމަށެވެ.
އެނގިވަޑައިގަންނަވާނެ މިހާރު ވެސް ރޭގަނޑު 10:00ން ފެށިގެން ފަތިހު 5:00އާ ހަމައަށް ހާއްސަ ހުއްދަ ލިބިފައިވާ ފަރާތްތައް ފިޔަވައި އެހެން އެއްވެސް ފަރާތެއް ބޭރުގައި އުޅުމަކީ މަނާކަމެއް. މި ރެސްޓްރިކްޝަން އަޅުގަނޑުމެން އިތުރަށް އެކްސްޓެންޑް މިކުރަނީ ރޭގަނޑު 8:00ން ފެށިގެން 10:00ށް ދުއްވުން މަނާކުރުމަށް. މީގެ ބޭނުމަކީ ބޭރުގައި އުޅޭ މީހުން ވީހާވެސް މަދުކުރުން،އެންއީއޯސީގެ ތަރުޖަމާނު ޑރ. ނަޒްލާ ރަފީގު
އުޅަނދު ދުއްވުން މަނާކުރަން ނިންމުމާއި ގުޅިގެން ނޫސްވެރިންގެ ބައްދަލުވުމުގައި ވާހަކަ ދައްކަވަމުން ހެޑް އޮފް މާލެ ސިޓީ ޕޮލިސް އަބްދުﷲ ޝަރީފް ވިދާޅުވީ ކޮވިޑުން ސަލާމަތް ވުމަށްޓަކައި އަޅާ ފިޔަވަޅުތަކުގެ ތެރޭގައި މީގެ ކުރިން އިއުލާންކޮށްފައި ހުރި ފިޔަވަޅުތަކުގެ އިތުރަށް އާދީއްތަ ދުވަހުގެ ރޭގެ 8:00ން ފަތިހު 5:00ށް މާލެ ހުޅުމާލެ އަދި ވިލިމާލޭގައި ސަރަހައްދުގައި އެއްގަމު އުޅަނދު ދުއްވުން މަނާކުރުމާއި ގުޅިގެން ފުލުހުން މިކަން ތަންފީޒު ކުރުމަށްޓަކައި ފިޔަވަޅުތަކެއް އަޅާނެ ކަމަށެވެ. އެގޮތުން ރޭގަނޑު 8:00ން ފެށިގެން ފަތިހު 5:00އާ ދެމެދުގައި އެއްވެސް އުޅަނދެއް ދުއްވާނަމަ ފުރަތަމަ ފަހަރަށް ނަސޭހަތްތެރިވާނެ ކަމަށެވެ. އަދި ދެވަނަ ފަހަރު އެ އުޅަނދެއް ޗެކްކުރެވިއްޖެ ނަމަ ޖޫރިމަނާ ކުރާނެ ކަމަށާއި، އިތުރު ފިޔަވަޅެއްގެ ގޮތުން މިގޮތަށް ތަކުރާރުވާނަމަ އެ އުޅަނދެއް ޓޯ ކުރާނެ ކަމަށެވެ.
ޓޯކުރުމަށްފަހު އެ އުޅަނދެއް ދޫކުރެވޭނީ ޖޫރިމަނާ ދެއްކުމަށްފަހުގައި. އަޅުގަނޑުމެން އެހެނިހެން ކަންތައްތަކުގައި ޖޫރިމަނާ ކުރާ އުސޫލުން އަޅުގަނޑުމެން ޖޫރިމަނާ ކުރާނީ 1000 ރުފިޔާގެ މަގުން ކޮންމެ ފަހަރަކު ނަސޭހަތް ދިނުމަށްފަހުގައި. ދެން މީގައި ފާހަގަކޮށްލަން ބޭނުންވާ ކަމަކީ ނުވަތަ އާންމު ރައްޔިތުން ވިސްނަން ޖެހޭ ކަމަކީ ރޭގަނޑު 8ން ފެށިގެން ފަތިހު 5 އާއި ދޭތެރޭގައި އެއްވެސް އުޅަނދެއް ދުއްވުމަކީ މަނާކަމެއް ކަމާއި، އެހެންނަމަވެސް ކުރިން ނެރެފައި އޮތް ގައިޑްލައިންގައި ހިމެނޭ ގޮތަށް ރޭގަނޑު 8:00 ގެ ފަހުން މަގުމަތީގައި އުޅުން މަނާވަނީކީ ނޫން. އެހެންނަމަވެސް މަނާ ވާނެ ރޭގަނޑު 10:00ގެ ފަހުން މަގުމަތީގައި އުޅުން،ހެޑް އޮފް މާލެ ސިޓީ ޕޮލިސް އަބްދުﷲ ޝަރީފް
އެއްގަމު އުޅަނދު ދުއްވުން ރޭގަނޑު 8:00ން ފަތިހު 5:00ށް މަނާކުރި ނަމަވެސް ޓެކްސީ ކުރާ އުޅަނދުތައް ދުއްވުމުގެ ހުއްދަ އޮންނާނެ ކަމަށް އެޗްއީއޯސީން ބުނެއެވެ. ޖުލައި މަހުގެ 1ން ފެށިގެން ލޮކްޑައުން އަށް ދިން ލުއިތަކާ އެކު، މާލެ ސަރަހައްދުން ކޮވިޑް-19 ޖެހޭ މީހުންގެ އަދަދު ވަނީ ވަރަށް ބޮޑަށް އިތުރުވާން ފަށާފައެވެ. އެގޮތުން މި ހަފްތާގައި އެކަނި ވެސް 1000 މީހުން ޕޮޒިޓިވްވެ 4 މީހަކު ވަނީ ނިޔާވެފައެވެ.
