އޭސް ޓްރެވެލްސް އިން ފުލައިޓް ޗާޓާ ކުރި އިރު ކާގޯއަށް އެދިފައި ނުވޭ: މޯލްޑިވިއަން

މެލޭޝިއާ އަށް އަނބުރާ ނުދެވިފައި ތިބި 50 ދިވެހި ދަރިވަރަކު އެ ޤައުމަށް ފޮނުވައިދިނުމަށް އޭސް ޓްރެވަލްސް އިން ފުލައިޓް ޗާޓާ ކުރި އިރު ކާގޯއަށް އެދިފައި ނުވާ ކަމަށް ގައުމީ އެއަރލައިން، މޯލްޑިވިއަނުން ބުނެފިއެވެ.

މޯލްޑިވިއަނުން މިހެން ބުނެފައިވަނީ އޭސް ޓްރެވަލަސް އިން ޗާޓާ ކުރި ފުލައިޓުން ގެންދިޔަ ކާގޯއަށް އަގު ނަގާފައިވާ ކަމަށް ބުނެ އެ އެޖެންސީން ކަންބޮޑުވުން ފާޅުކޮށް ސޯޝަލް މީޑިއާގައި އެ ވާހަކަތައް ހާމަކޮށްފައިވަނިކޮށެވެ.

މޯލްޑިވިއަނުން ބުނީ ފުލައިޓް ޗާޓާ ކުރާއިރު ފުލައިޓް ޗާޓާ ކުރާ ފަރާތަށް އޮޕްޝަންސްތަކެއް ދީފައިވާނެ ކަމަށާއި، އެގޮތުން ފުލައިޓް ޗާޓާކުރި އިރު ކާގޯއަށް އެދިފައި ނުވާ ކަމަށެވެ. އެހެންކަމުން އޮންނަ އުސޫލުގެ މަތިން ފުލައިޓުގައި ކާގޯ ގެންދާ ނަމަ އެއަށް ޗާޖް ކުރާނެ ކަމަށެވެ.

މޯލްޑިވިއަނުން ބުނީ މެލޭޝިޔާގެ ކުއާލާލަމްޕޫރަށް އެ ކުންފުނީގެ ބޯޓެއް ޗާޓަރުކޮށްގެން ދަތުރުކޮށްފައިވަނީ ޗާޓަރު ކުރި ކުންފުންޏާ ދެމެދު ވެވުނު އެއްބަސްވުމެއްގެ ދަށުން ހަމައެކަނި ފަސިންޖަރުންނާއި ބެގޭޖް އުފުލުމަށް ކަމަށެވެ. އަދި ފުރަތަމަ މުޢާމަލާތުން ފެށިގެން ދަތުރުގައި ކާގޯ ގެނައުމުގެ ހުއްދަ ޗާޓަރު ކުރި ކުންފުންޏަށް ދީފައިނެތް ކަމަށާއި، ކާގޯ ގެނައުމާގުޅިގެން އިތުރު އެއްވެސް ޗާޖެއް ޗާޓަރާއަތުން ނަގާފައެއްވެސް ނުވާނެ ކަމަށެވެ.

މި މައްސަލައިގައި މޯލްޑިވިއަން ފުލައިޓް ޗާޓާކުރި އޭސް ޓްރެވަލްސްގެ މެނޭޖިންގ ޑިރެކްޓަރ މުހައްމަދު ފިރާގު ބުނެފައިވަނީ ފުލައިޓް ޗާޓާ ކުރި އިރު ކާގޯއަށް ވެސް އެދިފައިވާނެ ކަމަށާއި، މޯލްޑިވިއަނުން ކާގޯއަށް ޗާޖްކޮށް ފައިސާ ނަގާފައިވަނީ އޮޅުވާލައިގެން ކަމަށެވެ.

ފިރާގު ކޮށްފައިވާ ޓުވީޓެއްގައި ބުނެފައިވަނީ 50 ދަރިވަރުން ގޮވައިގެން ކުއަލާލަމްޕޫރަށް ދަތުރުކުރި ފުލައިޓުގައި ގެންދިޔަ ކާގޯގެ ލާރިކޮޅު އައިލެންޑް އޭވިއޭޝަނުން ވަގަށް ކާލާފައިވާ ކަމަށެވެ.