އެޗްޕީއޭއަކީ ''ސިކްލީވް''ގެ ލިޔުން ދޫކުރާ އެޖެންސީއެއް ނޫން: ޑރ. އަފްޒަލް
16 އޯގަސްޓު 2020 | އާދީއްތަ 07:55ރޯގާގެ އަމާލާތެއް ހުރެ އޮފީހަށް ނުކުތުމަކީ ރައްކާތެރި ގޮތެއް ނޫން
ނޫސްވެރިންގެ ބައްދަލުވުމުގައި އެޗްޕީއޭގެ އެޕިޑަމޮލޮޖިސްޓް ޑރ. އިބްރާހިމް އަފްޒަލް ވާހަކަދައްކަވަނީ
ހެލްތް ޕްރޮޓެކްޝަން އެޖެންސީ (އެޗްޕީއޭ) އަކީ ''ސިކްލީވް''ގެ ލިޔުން ދޫކުރާ އެޖެންސީއެއް ނޫން ކަމަށް އެޗްޕީއޭގެ އެޕިޑަމޮލޮޖިސްޓް ޑރ. އިބްރާހިމް އަފްޒަލް ވިދާޅުވެއްޖެއެވެ.
ހޮނިހިރު ދުވަހުގެރޭ ހެލްތް އިމަރޖެންސީ އޮޕަރޭޝަންސް ސެންޓަރު (އެޗްއީއޯސީ) ބޭއްވި ނޫސްވެރިންގެ ބައްދަލުވުމުގައި ޑރ. އަފްޒަލް ވިދާޅުވީ ކޮވިޑް-19ގެ މިދަނޑިވަޅުގައި ހުން އައުމާއި، ރޯގާގެ އަމާލަތްތައް ފެންނަ މުއައްޒަފުން ވަޒީފާއެއް ނުކުތުމަކީ ރައްކާތެރި ގޮތެއް ނޫން ކަމަށެވެ.
ޑރ. އަފްޒަލް ވިދާޅުވީ ކޮވިޑް-19 އަށްނުވި ކަމުގައި ވިޔަސް ބަލިވާ މުއައްޒަފުން ސިކްލީވް އަށް ދިއުމުން އެމުއައްޒަފުން ވަޒީފާ އަދާކުރަމުންދާ އޮފީސް ނުވަތަ މުއައްސަސާތަކުން އެޗްޕީއޭއިން ލިޔުން ހޯދުމަށް އެމުއައްޒަފުންނަށް އަންގަމުންދާ ކަމަށެވެ. ނަމަވެސް އެޗްޕިއޭއަކީ ސިިކްލީވްގެ ލިޔުންތައް ދޫކުރާ އެޖެންސީއެއް ނޫން ކަމާށް ޑރ. އަފްޒަލް ވިދާޅުވިއެވެ.
ޑރ. އަފްޒަލް ވިދާޅުވީ ސިކްލީވްގެ ލިޔުން ހޯދަން ޖެހޭނީ ހޮސްޕިޓަލުން ނުވަތަ ޑޮކްޓަރަށް ދައްކާ ކްލިނިކަކުން ކަމަށެވެ. އަދި އެލިޔުން ހޯދުމަކީ އެމީހެއްގެ އަމިއްލަ ޒިންމާއެއް ކަމަށް ޑރ. އަފްޒަލް ވިދާޅުވިއެވެ.
ޑރ.އަފްޒަލް ވިދާޅުވީ ކޮވިޑް-19ގެ އާލާމާތްތައް ފެނި ކަރަންޓީންވާ ފަރާތެއް ނުވަތަ ޓެސްޓު ކޮށްގެން ޕޮޒިޓިވްވެގެން އައިސޮލޭޝަންއަށް ދާ ފަރާތްތަކަށް ދޭން ޖެހޭ ލިޔުންތައް އެޗްޕީއޭއިން ދެމުންދާނެ ކަމަށެވެ.
