ލެއިޕްޒީގާ ދެކޮޅަށް ނުކުންނައިރު، ލިވަޕޫލް އަތުން ލިބުނު މޮޅު ނުގުނާނެ: ސިމިއޯނީ

ޔުއެފާ ޗެމްޕިއަންސް ލީގުގެ ކުއާޓާފައިނަލްގައި އާރްބީ ލެއިޕްޒީގާ ދެކޮޅަށް ނުކުންނައިރު، މީގެ ކުރިން ލިވަޕޫލް އަތުން ލިބުނު މޮޅު ނުގުނާނެ ކަމަށް އެތުލެޓިކޯ މެޑްރިޑްގެ ކޯޗު ޑިއޭގޯ ސިމިއޯނީ ބުނެފިއެވެ.

މުބާރާތުގެ ކުއާޓާއިން އެތުލެޓިކޯ ފުރުސަތު ހޯދީ ދެވަނަ ބުރުގައި އެންމެ ފަހުގެ ޗެމްޕިއަން ލިވަޕޫލް ކަޓުވާލުމަށްފަހުއެވެ.

ލެއިޕްޒީގާ ދެކޮޅަށް ކުޅޭ މެޗުގެ ކުރިން ސިމިއޯނީ ބުނީ އެޓީމު ލިވަޕޫލް އަތުން މޮޅުވި މެޗަށް 100 ށްވުރެން ގިނަ ދުވަސް ވެފައިވާ ކަމަށާއި، އެއީ މާޒީވެ ގޮސްފައި އޮތް ކަމެއް ކަމަށެވެ. އެހެންކަމުން އެ މެޗުގެ ފައިދާ ލެއިޕްޒީގް މެޗަށް ނުކުރާނެ ކަމަށް ވަނީ ބުނެފައެވެ.

ސިމިއޯނީ އިތުރަށް ބުނީ އެތުލެޓިކޯ އަކީ މި ފަހަރުގެ ޗެމްޕިއަންސް ލީގުގެ ތަށި އުފުލާލެވޭނެ ފެންވަރުގެ ޓީމެއްގެ ގޮތުގައި ދެކި، މުބާރާތުގެ ފެވަރިޓުންގެ ލިސްޓުގައި އެޓީމު ހިމެނޭ ކަމަށް ގިނަ ބަޔަކު ބުނާތީ އެކަމާ އުފާކުރާ ކަމަށެވެ.

އެކަމަކު މިހާރު މި އޮތް ފޯމެޓުން އެންމެ މެޗެއް ގޯސްކޮށް ދިޔަސް މުބާރާތުން ކަޓާނެ ކަމަށާއި، އެއް ލެގު އޮތުމުން އޮންނާނީ މެޗު ފުރިހަމަ ވަގުތުގައި ރަނގަޅަށް ކުޅެ ނަތީޖާ ނެރުން ކަމަށްވެސް ސިމިއޯނީ ބުންޏެވެ.

މި މެޗާ ކުރިމަތިލާއިރު، ދާދި ފަހުން އެތުލެޓިކޯގެ ދެ ކުޅުންތެރިއަކު ވަނީ ކޮވިޑް-19 އަށް ޕޮޒިޓިވް ވެފައެވެ. އެއީ ސީމް ވިސާލްކޯ އާއި އެންހެލް ކޮރެއާއެވެ.

ކުއާޓާއިން ފަށައިގެން ޗެމްޕިއަންސް ލީގުގެ މެޗުތައް ޕޯޗުގަލްގެ ލިޒްބަންގައި ކުރިއަށްދާއިރު، ކުއާޓާގެ ދެވަނަ މެޗުގައި އެތުލެޓިކޯ އާއި ލެއިޕްޒީގް ބައްދަލުކުރާ މެޗު ފަށާނީ ބުރާސްފަތި ދުވަހުގެރޭ ރާއްޖެ ގަޑިން 00:00 ގައެވެ.