ސިލްވާ ލާޒިއޯއަށް ބަދަލުވަނީ

މެންޗެސްޓާ ސިޓީއަށް ކުޅެމުން އަންނަ ތަޖުރިބާކާރު މިޑްފީލްޑަރު ޑޭވިޑް ސިލްވާ ލާޒިއޯއަށް ބަދަލުވުމަށް އެއްބަސްވެފައިވާ ކަމަށް ރިޕޯޓުތައް ބުނެފިއެވެ.

ސިޓީގައި 10 އަހަރު ހޭދަކުރުމަށްފަހު ސިލްވާ ވަނީ މި ސީޒަން ނިމުމުން ސިޓީ ދޫކޮށްލަން ނިންމާފައެވެ. އުމުރުން މިހާރު 34 އަހަރުގެ ސިލްވާ ސިޓީ ދޫކޮށްލާއިރު، އޭނާ މިހާރު ލާޒިއޯއަށް ބަދަލުވުމަށް އެއްބަސްވެފައިވާ ކަމަށް ވަނީ ރިޕޯޓުކޮށްފައެވެ. އަދި ލާޒިއޯއާއެކު ސިލްވާ ތިން އަހަރުގެ އެއްބަސްވުމެއް ހަދާނެ ކަމަށްވެސް ވަނީ ރިޕޯޓުކޮށްފައެވެ.

ވެލެންސިއާއިން 2010 ވަނަ އަހަރު ސިޓީއަށް ބަދަލުވި މިޑްފިލްޑަރު ސިޓީ ދޫކޮށް ލާޒިއޯއަށް ބަދަލުވާއިރު، އޭނާ ވަނީ ސިޓީގައި ގިނަ ކާމިޔާބީތަކެއް ހޯދައިފައެވެ. ސިޓީއަށް މިހާތަނަށް ކުޅެދިން 435 މެޗުގައި 77 ލަނޑު ކާމިޔާބުކޮށްފައިވާ ސިލްވާ ވަނީ ސިޓީއާއެކު އިނގިރޭސި ޕްރިމިއާ ލީގުގެ ޗެމްޕިއަންކަން ހަތަރު ފަހަރު ހޯދުމުގެ އިތުރަށް އެފްއޭ ކަޕް ދެ ފަހަރު ކާމިޔާބުކޮށްފައެވެ.

އުމުރުން 16 އަހަރުން ފަށައިގެން ސްޕެއިންގެ ގައުމީ ޓީމުތަކަށް ކުޅެމުން އަންނަ ސިލްވާ ވަނީ ސްޕެއިންގެ ސީނިއާ ޓީމަށް ކުޅުނު 125 މެޗުގައި 35 ލަނޑު ކާމިޔާބުކޮށްފައެވެ. އޭނާ ވަނީ ސްޕެއިން ގައުމީ ޓީމާއެކު ފީފާ ވޯލްޑް ކަޕް އެއް ފަހަރު އަދި ޔޫރޯ ފުޓްބޯޅަ މުބާރާތް ދެ ފަހަރު ކާމިޔާބުކޮށްފައެވެ.

ސިލްވާ ލާޒިއޯއާ ގުޅޭއިރު، ރިޕޯޓުތައް ބުނާ ގޮތުން އަންނަ ސީޒަނުގެ ޔުއެފާ ޗެމްޕިއަންސް ލީގުން ޖާގަ ހޯދާފައިވާ ލާޒިއޯއިން އަންނަނީ އެޓީމުގެ ސްކޮޑު ވަރުގަދަ ކުރުމަށް މަސައްކަތް ކުރަމުންނެވެ. އެގޮތުން ސިލްވާގެ އިތުރަށް ފެނަބާޗޭއަށް ކުޅެމުން އަންނަ ވެޑަޓް މުރިގީ ހޯދުމަށްވެސް އެ ކްލަބުން އަންނަނީ މަސައްކަތް ކުރަމުންނެވެ. އޭގެ އިތުރަށް މި ސީޒަނުގެ ޔޫރަޕްގެ ރަން ބޫޓި ހޯދި ޗީރޯ އިމޮބިލޭގެ އެއްބަސްވުން އާކުރަންވެސް ލާޒިއޯއިން މަސައްކަތް ކުރަމުން އަންނަ ކަމަށް ރިޕޯޓުތައް ބުނެއެވެ.