ބަޖެޓުން ހަތް މިލިއަން ރުފިޔާ ކަނޑާލުމާ ގުޅިގެން ތަހުގީގުތަކަށް ހުރަސްއެޅޭ: އޭސީސީ

އެންޓި ކޮރަޕްޝަން ކޮމިޝަން (އޭސީސީ) ގެ މި އަހަރުގެ ބަޖެޓުން މިހާތަނަށް ހަތް މިލިއަން ރުފިޔާ ކަނޑާލުމާ ގުޅިގެން އިންވެސްޓިގޭޓިވް މައްސަލަތައް ތަހުގީގު ކުރުމަށް ހުރަސް އެޅޭ ކަމަށް އެ ކޮމިޝަނުން ބުނެފިއެވެ.

އަންގާރަ ދުވަހު ބޭއްވި މިނިވަން މުއައްސަސާތަކުގެ ކޮމިޓީގައި އޭސީސީގެ ރައީސް މަރިޔަމް ޝިއުނާ ވިދާޅުވީ މަގާމާ ހަވާލުވި ހިސާބުން ޖުމްލަ 1201 ޝަކުވާ ބަލާ ނިންމާފައިވާ ކަމަށާއި، 1139 މައްސަލަ އިވިލުއޭޓް ކޮށް ނިންމާފައިވާ ކަމަށެވެ. 62 ކޭސް ތަހުގީގުކޮށް ނިންމާފައިވާ ކަމަށް ޝައުނާ ވިދާޅުވިއެވެ. ލޮކްޑައުންގައި ވެސް 196 ކޭސްއެއް އިވެލުއޭޓްކޮށް ނިންމާފައިވާކަން ޝިއުނާ ފާހަގަކުރެއްވިއެވެ.

ކޭސްތައް ތަހުގީގު ކުރުމުގައި ލަސްވާ ސަބަބުތަކަށް އަލިއަޅުއްވާލައްވާ ޝިއުނާ ވިދާޅުވީ ތަހުގީގު ކުރަމުންދާ 839 ކޭސް އޮތްއިރު މީގެ ތެރެއިން 152 ކޭސްއަކީ އެކި އަތޮޅުތަކަށް ދަތުރުކޮށް ބަލަން ޖެހޭ ރަށްތަކާ ގުޅުން ހުރި ކޭސް ކަމަށެވެ.

ޝިއުނާ ވިދާޅުވީ ލޮކްޑައުންގެ އިތުރުން ދިމާވި ބައެއް ކަންކަމުން ދަތުރުތައް ދެވޭ ގޮތް ނުވި ކަމަށާއި، ބަޖެޓުން މިއަހަރު މިހާތަނަށް ހަތް މިލިއަން ރުފިޔާ ކަނޑާލާފައިވާ ކަމަށެވެ.

އެގޮތުން އިންވެސްޓިގޭޝަން ދަތުރަށް ހުރި ބަޖެޓުން ބަރަށް ބޮޑު ބައެއް ކަނޑާލާފައިވާކަން ޝިއުނާ ފާހަގަކުރެއްވިއެވެ. އަދި ވިދާޅުވީ ޝިއުނާ މިއަހަރު ކުރެވެން އޮތް އޮތީ އެންމެ ދަތުރެއް ކަމަށާއި، ރަށަކަށް ކުރާ ދަތުރެއް ނަމަ އެއަތޮޅުގައި ހުންނަ ހުރިހާ ރަށަކަށް ނިސްބަވްތާ ކޭސްތަކުގެ ތަހުގީގުތަކާ ގުޅުން ހުރި މަސައްކަތްތައް ކުރާނެ ކަމަށެވެ.

ޝިއުނާ ވިދާޅުވީ އޭސީސީގައި ރިސޯސް މަދު ކަމަށާއި، މުއައްޒަފުން މަދު ކަމަށެވެ. އަދި ޒަމާނީ ނެކްނޮލޮޖީގެ ވަސީލަތްތައް ވެސް މަދު ނަމަވެސް ކޭސްތައް ހުށަހަޅާން މިންވަރު ގިނަކަން ޝިއުނާ ފާހަގަކުރެއްވިއެވެ. ޝިއުނާ ވިދާޅުވީ ހުށަހަޅާ މައްސަލަތަކުގެ ތެރޭގައި ކޮމިޝަންއާ ނުގުޅޭ މައްސަލަތައް ވެސް ހުށަހަޅާ ކަމަށާއި، ނިޒާމަށް ވެސް ބަދަލުތަކެއް ގެންނަން ޖެހޭ ކަމަށެވެ.

ޑިއުޓީ ޕްރޮސިކިއުޝަން މަރުހަލާގައި ހުރި މައްސަލަތަކާ ބެހޭ ގޮތުން ޝިއުނާ ވިދާޅުވީ ރިކޯޑު ތަކުން 18 ކޭސްއެއް ޑިއުޓީ ޕްރޮސިކިއުޝަން މަރުހަލާގައި އެބަ އޮތް ކަމަށެވެ. 18 ކޭސްއާ ގުޅިގެން ޕްރޮސެކިއުޓަރުންނާއި އެކި މަޝްވަރާ ބައްދަލުވުންތައް ވެސް ބާއްވާފައިވާ ކަަމަށް ޝިއުނާ ވިދާޅުވިއެވެ.

ޝިއުނާ ވިދާޅުވީ ދަތިތައް ހުރި ނަމަވެސް މައްސަލަތައް ކުރިއަށްދާ ކަމަށެވެ. މިއަހަރުގެ ބަޖެޓުން މިހާތަނަށް ހަތް މިލިއަން ރުފިޔާ ކަނޑާލުމާ ގުޅިގެން އިންވެސްޓިގޭޓިވް މައްސަލަތައް ތަހުގީގު ކުރުމަށް ހުރަސް އެޅޭ ކަމަށް އެކޮމިޝަނުން ބުނެފައިވާއިރު، މިއަހަރުގެ އޭސީސީއަށް ކަނޑައަޅާފައިވާ ޖުމްލަ ބަޖެޓަކީ 34,701,372ރ. އެވެ.