ކ. މާލެ
|
10 އޯގަސްޓް 2020 | ހޯމަ 18:52
ގްރޭޓަރ މާލެ އިންޑަސްޓްރިއަލް ޒޯން ލިމިޓެޑްގެ އެމްޑީ އިބްރާހިމް ރަޝީދު، ރައީސް އިބްރާހިމް މުހައްމަދު ސޯލިހާއެކު
ގްރޭޓަރ މާލެ އިންޑަސްޓްރިއަލް ޒޯން ލިމިޓެޑްގެ އެމްޑީ އިބްރާހިމް ރަޝީދު، ރައީސް އިބްރާހިމް މުހައްމަދު ސޯލިހާއެކު
ރައީސް އޮފީސް
ޖީއެމްއައިޒެޑްއެލް އެޗްޑީސީއާއި އެއްކޮލަނީ
ޖީއެމްއައިޒެޑްއެލް އެޗްޑީސީ އާ އެއްކޮށްލަން ސަރުކާރުން ނިންމައިފި
 
ދެ ކުންފުނި އެއްކޮށްލުމަށްފަހު ލީޑް ކުރާނީ އެޗްޑީސީން
 
ދެ ކުންފުނި އެއްކޮށްލަން ނިންމާފައިވަނި ހަރަދު ކުޑަކުރުމުގެ ގޮތުން

ގްރޭޓާ މާލެ އިންޑަސްޓްރިއަލް ޒޯން ލިމިޓެޑް (ޖީއެމްއައިޒެޑްއެލް) ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ) އާ އެއްކޮށްލުމަށް ސަރުކާރުން ނިންމައިފިއެވެ.

ޖީއެމްއައިޒެޑްއެލް އަކީ ކުރީގެ ރައީސް އަބްދުﷲ ޔާމީންގެ ސަރުކާރުގައި ތިލަފުއްޓާއި ގުޅިފަޅު މެނޭޖްކުރުމަށް އުފެއްދި ކުންފުންޏެކެވެ. އެޗްޑީސީއަކީ ހަމައެކަނި ހުޅުމާލޭގެ ކަންކަން މެނޭޖްކުރުމަށް އުފައްދާފައިވާ ކުންފުންޏެކެވެ.

ޖީއެމްއައިޒެޑްއެލް، އެޗްޑީސީއާއި އެއްކޮލުމަށް ނިންމާފައިވީ ނަމަވެސް މިކަމާއި ގުޅިގެން ފިނޭންސް މިނިސްޓްރީން ރަސްމީކޮށް އަދި ވަކި އެއްޗެއް ބުނެފައި ނުވެއެވެ. ނަމަވެސް ޖީއެމްއައިޒެޑްއެލް އާއި އެޗްޑީސީ އެއްކޮށްލުމުގެ ގޮތުން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)އިން ވަނީ ސިޓީއެއް ފޮނުވާފައެވެ.

ޖީއެމްއައިޒެޑްއެލް، އެޗްޑީސީއާއި އެއްކޮށްލުމަށްފަހު ލީޑް ކުރާނީ އެޗްޑީސީން ކަމަށް މިހާތަނަށް ވަނީ މައުލޫމާތު ލިބިފައެވެ. ސަރުކާރުން މިގޮތަށް ނިންމާފައިވާ އިރު، ކޮވިޑް-19 އާއި ގުޅިގެން ދައުލަތުގެ ހަރަދުތައް ކުޑަކުރުމަށް ވަނީ ނިންމާފައެވެ. އަދި މި ނިންމުމަކީ ވެސް ހަރަދު ކުޑަކުރުމުގެ ސިޔާސަތުގެ ދަށުން ނިންމާފައިވާ ނިންމުމެއް ކަމަށް މައުލޫމާތު ލިބެއެވެ.

ޖީއެމްއައިޒެޑްއެލް، އެޗްޑީސީއާއި އެއްކޮށްލުމަށް ނިންމާފައިވާ އިރު، އެ ކުންފުނީގެ އެމްޑީގެ މައްޗަށް ތުހުމަތު ކުރެވޭ ކޮރަޕްޝަންގެ މައްސަލަތަކެއް މީގެ ކުރިން ފެންމަތިވެފައިވެއެވެ. އިބްރާހީމް ރަޝީދުގެ މައްޗަށް ތުހުމަތު ކުރަނީ މަގާމުގެ ނުފޫޒު ބޭނުންކޮށްގެން ވަކި ބަޔަކަށް މަންފާ ލިބޭގޮތަށް ޖީއެމްއައިޒެޑްއެލްގެ އިހްތިސާސްތެރޭގައި ހިމެނޭ ތިލަފުށި ފަޅުތެރޭގައި ވެރިއަކު ނެތި އޮތް ބޯޓެއް ނައްތާލުމަށް ބަޔާކާ ހަވާލު ކުރި މައްސަލައެވެ. ނަމަވެސް އޭނާ އެކަން ދޮގު ކުރައްވައެވެ.

ރައްޔިތުންގެ މަޖިލީހުގެ މަޖިލީހުގެ ސްޓޭޓް އޯންޑް އެންޓަޕްރައިސަސް (އެސްއޯއީ) އިން ވަނީ މި މައްސަލަ ވެސް ބަލާފައެވެ. މި މައްސަލައަކީ ކ. ތިލަފުށި ފަޅުތެރޭގައި "އެމްވީ ސީ ހޯމް ސެފަޔާ" ނެގުމުގައި، ގްރޭޓަރ މާލޭ އިންޑަސްޓްރިއަލް ޒޯންގެ މެނޭޖިންގ ޑިރެކްޓަރު އިބްރާހީމް ރަޝީދު އެކަމުގައި ޢަމަލު ކޮށްފައިވާ ގޮތާއި، އެކުންފުނީގެ ބޯޑުގެ މައްޗަށް ތުހުމަތު ކުރެވޭ މައްސަލައެވެ. އެގޮތުން ތިލަފުށި ފަޅުން އެބޯޓު ނެގުމަށް ޕާރކަވަން އިންވެސްޓްމެންޓް ޕްރައިވެޓް ލިމިޓެޑް ނަމަކަށް ކިޔާ ކުންފުންޏަކާ ޙަވާލުކޮށްފައިވާ ގޮތާމެދު މަޖިލީހުގެ ސްޓޭޓް އޯންޑް އެންޓަޕްރައިސަސް (އެސްއޯއީ) ކޮމެޓީއަށް ލިބިފައިވާ މަޢުލޫމާތުތަކަށް ބަލާއިރު، ބޮޑެތި މައްސަލަތަކެއް ހުރިކަން ކޮމިޓީގެ މެންބަރުން ވަނީ ފާހަގަ ކޮށްފައެވެ.

ޕާކަވަން ކުންފުންޏަކީ އެބޯޓު އެތަނުން ނަގަން އިޢުލާން ކުރެވުނު ދުވަސްވަރު އުފައްދާފައިވާ ކުންފުންޏެއް ކަމަށްވާތީ ޝައްކު އުފެދޭ ކަންތައްތަކެއް ހިނގާފައިވާ ކަމަށް މެންބަރުން ވަނީ ފާހަގަ ކުރައްވާފައެވެ. އަދި ދަގަނޑު އެބޯޓު ކަފާލައިގެން ނައްތާލުމަށް މަސައްކަތް ކުރަމުންދާތީ، އެމައްސައްކަތް ގްރޭޓަރ މާލޭ ކުންފުންޏާ ޙަވާލުކުރި ފިނޭންސް މިނިސްޓްރީއާ ދެމެދުވެސް ވަނީ ދެބަސްވުންތަކެއް އުފެދިފައެވެ.

ފިނޭންސް މިނިސްޓްރީން ބުނަނީ، ގްރޭޓަރ މާލެ ކުންފުންޏަށް ހުއްދަ ދިނީ ފަޅު ތެރެއިން ބޯޓު ނަގަން ކަމަށެވެ. އޭގެ އިތުރަށް، ބޯޓު ކަފާލައި ނައްތާލަން ނުވަތަ ބާދަގަނޑުގެ ގޮތުގައި ވިއްކުމުގެ އެއްވެސް ހުއްދައެއް އެކުންފުޏަށް ނުދޭ ކަމަށް ފިނޭންސް މިނިސްޓްރީން ބުނެފައިވެއެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އަބުދުﷲ ނަސީރު އިބްރާހިމް
0%
100%
0%
0%
0%
0%
ކޮމެންޓް