އަންގާރަ ދުވަހުގެ ޖަލްސާއަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ހާޒިރު ކުރުމަށް އެޖެންޑާކޮށްފިއެވެ.
އަންގާރަ ދުވަހުގެ ޖަލްސާގައި ދެ މެމްބަރަކު އަސްލަމާއި ކުރުމަށް ހުށަހެޅި ސުވާލު އެޖެންޑާކޮށްފައިވެއެވެ. އެއީ ފުވައްމުލަކު އުތުރު ދާއިރާގެ މެންބަރު މުޙައްމަދު ރަޝީދު އާއި ފެލިދޫ ދާއިރާގެ މެންބަރު އިބްރާހީމް ފަޒުލް ރަޝީދެވެ.
މުޙައްމަދު ރަޝީދު މިނިސްޓަރާއި ކުރެއްވުމަށް ހުށައަޅުއްވާފައިވާ ސުވާލަކީ ފުވައްމުލަކު ގިރާ ސަރަޙައްދު ޙިމާޔަތްކުރުމަށް މިހާތަނަށް މި ސަރުކާރުން ކުރައްވާފައިވާ މަސައްކަތަކީކޮބައިތޯ އާއި މި މަޝްރޫޢުގެ ޢަމަލީ މަސައްކަތް ނުފެށި ލަސްވަނީ ކީއްވެގެންތޯ އެވެ. އަދި މި މަޝްރޫޢުގެ ޢަމަލީ މަސައްކަތް ފެށޭނެކަމަށް ލަފާކުރެވޭ ތާރީޚަކީ ކޮބައިތޯ ވެސް ސުވާލު ކުރައްވާނެއެވެ.
ފަޒުލް މިނިސްޓަރާއި ކުރެއްވުމަށް ހުށައަޅުއްވާފައިވާ ސުވާލަކީ ޕީ.އެސް.އައި.ޕީ ޕްރޮޖެކްޓްގެ ގޮތުގައި ވ. އަތޮޅު ފުލިދޫ، ފެލިދޫ އަދި ތިނަދޫގެ ފެނާއި ނަރުދަމާގެ ނިޒާމު ޤާއިމުކުރުމަށް ހިންގާ މަޝްރޫޢުގެ ޢަމަލީ އެއްވެސް މަސައްކަތެއް ފެށިފައި ނުވާތީ މި މަޝްރޫޢުގެ މަސައްކަތްތައް ކޮންޓްރެކްޓަރަކާ ޙަވާލުކުރެވޭނީ ކޮން ތާރީޚެއްގައިތޯއެވެ. އަދި މި މަސައްކަތަށް ބޭނުންވާސާމާނު ރަށްރަށަށް ފޮނުވާލެވޭނީ ކިހާ ހިސާބެއްގައިތޯއާއި މި މަޝްރޫޢަށް އެގްޒިމް ބޭންކުން ނަގާލޯނުގެ ކަންކަން މިހާރު ވަނީ މުޅިން ހަމަޖެހިފައިތޯއެވެ.
މީގެއިތުރުން ގަން އިންޓަރނޭޝަނަލް އެއަރޕޯޓްގެ ޙާލަތު ސްޓޭޓް އޯންޑް އެންޓަރޕްރައިސަސް ކޮމިޓީން ދިރާސާކޮށް ނިންމިގޮތުގެ ރިޕޯޓުގެ ބަހުސް ކުރިއަށް ގެންދިއުމަށްވެސް ވަނީ އެޖެންޑާކޮށްފައެވެ.
