ދަރަނީގެ މައްސަލާގައި 3 ފިނޭންސް މިނިސްޓަރުން މުޅި މަޖިލީހުގެ ކޮމިޓީއަށް ހާޒިރުކުރަނީ
ކޮމިޓީއަށް ފަސް ބޭފުޅުން ހާޒިރު ކުރެއްވުމަށް ފާސްކުރެވުނު
މިހާރުގެ ފިނޭންސް މިނިސްޓަރ އިބްރާހިމް އަމީރު، ރައީސް ޔާމީންގެ ސަރުކާރުގައި ދެ ބޭފުޅެއް ފިނޭންސް މިނިސްޓަރ ކަން ކުރެއްވި، އަހުމަދު މުނައްވަރު އަދި އަބްދުﷲ ޖިހާދު
ކުރީގެ ރައީސް އަބްދުﷲ ޔާމީންގެ ވެރިކަމުގައި ދައުލަތުގެ ނަމުގައި ގެރެންޓީ ދީފައިވާ ލޯނުތަކާއި 2013 ވަނަ އަހަރުން ފެށިގެން 2018 ވަނަ އަހަރާ ހަމައަށް ރާއްޖޭގެ ދަރަނީގެ މިންވަރު ހުރި މިންވަރު ސާފުނުވާތީ އެކަން ބެލުމަށްޓަކައި ކުރީ ދަރުކާރުގެ ފިނޭންސް މިނިސްޓަރުންނާއި މި ސަރުކާރުގެ ފިނޭންސް މިނިސްޓަރު މުޅި މަޖިލީހުގެ ކޮމިޓީއަށް ހާޒިރު ކުރުމަށް ނިންމައިފިއެވެ.
މަޖިލީހުގެ ރައީސްގެ މޭޒުން ހުށައަޅާ ކަންކަމުގެ ތެރެއިން ހުށައަޅުއްވާފައިވާ މި މައްސަލަގައި ވަނީ ގާނޫނާއި ގަވާއިދުތަކާއި އެއްގޮތަށް ކުރީ ސަރުކާރުން ޢަމަލުކޮށްފައިނުވާކަމާއި، އަދި މިހާރުގެ މިނިސްޓަރ ވެސް ޢަމަލުކުރައްވަމުން ނުގެންދަވާކަން ފާހަގަކުރެވިފައިވާ ކަމަށެވެ.
މުޅި މަޖިލީހުގެ ކޮމިޓީން މި މައްސަލަ ދިރާސާ ކުރަމުންދާއިރު މި މައްސަލައާއި ގުޅިގެން ފަސް ބޭފުޅެއް ކޮމިޓީއަށް ހާޒިރު ކުރުމަށް ވަނީ ފާސްކޮށްފައެވެ.
މި ބޭފުޅުން ކޮމިޓީއަށް ހާޒިރު ކުރުމަށް 56 މެމްބަރުން ވޯޓު ދެއްވިއެވެ. އެގޮތުން މަޖިލީހުގެ ރައީސް މުހައްމަދު ނަޝީދު ވިދާޅުވެފައިވަނީ އަންގާރަ ދުވަހުގެ މުޅި މަޖިލީހުގެ ކޮމިޓީއަށް މި ބޭފުޅުން ހާޒިރުވުމަށް އަންގަވާނެ ކަމަށެވެ.
