ރިޟްވާނުގެ ހަނދާނުގައި ބައޮގްރަފީއަކާއި ޚާއްސަ ލަވައެއް ނެރެފި
މި ލަވައިގެ ނަމަކީ "ވިންދު ދިޔައީ ގެއްލިގެން"
ރިޟްވާނުގެ ހަނދާނުގައި ޚާއްސަ ލަވައަކާއި ބައޮގްރަފީއެއް ނެރެފައިވަނީ ރާއްޖެޓީވީގެ ފަށާއިރު ޕްރޮގްރާމްގެ ތެރެއިން
ވަގަށް ނަގައިގެން ގޮސް މަރާލާފައިވާ މިނިވަން ނޫހުގެ ނޫސްވެރިޔާ އަހުމަދު ރިޟްވާންގެ ގެއްލުވާލިތާ 6 އަހަރު ފުރުމާ ގުޅިގެން އާއިލާގެ ފަރާތުން ރިޟްވާނުގެ ހަނދާނުގައި ބައޮގްރަފީއަކާއި ޚާއްސަ ލަވައެއް ނެރެފިއެވެ.
ރިޟްވާނުގެ ހަޔާތުގެ މައްޗަށް ބިނާކޮށް ތައްޔާރުކޮށްފައިވާ މި ބައޮގްރަފީއާއި، ޚާއްސަ ލަވަ ނެރެފައިވަނީ ހޮނިހިރު ދުވަހު ހެނދުނު ރާއްޖެޓީވީގެ "ފަށާއިރު" ޕްރޮގްރާމް ތެރެއިންނެވެ. ނެރެފައިވާ ލަވައިގެ ނަމަކީ "ވިންދު ދިޔައީ ގެއްލިގެން" އެވެ.
ރިޟްވާންގެ ހަނދާނުގައި ނެރެފައިވާ ބައޮގްރަފީ ''ގެއްލުވާލީ މައުސޫމް ދިވެހި ދަރިއެއް'' ފޮތާ ބެހޭ ގޮތުން "ރާއްޖެއެމްވީ" އަށް ރިޟްވާންގެ ދައްތަ ފާތިމަތު ޝެހެނާޒް ބުނެފައިވަނީ ބައޮގްރަފީގައި މައިގަނޑު ގޮތެއްގައި ހުންނާނީ ރިޟްވާނުގެ ދިރިއުޅުމުގެ އުސްއަލިތަކުގެ ވާހަކަ ކަމަށެވެ. އަދި ބައޮގްރަފީ އެންމެ ފުރަތަމަ ހަދިޔާ ކުރާނީ ރިޟްވާނުގެ މަންމަ އަށް ކަމަށް ބުނެފައިވެއެވެ. ޝެހެނާޒް ބުނީ ބައޮގްރަފީ ތައްޔާރު ކޮށްފައިވަނީ އެތައް ބައެއްގެ ދީލަތި އެހީތެރިކަމާއެކު ކަމަށެވެ.
ރިޟްވާނަށް އިންސާފު ހޯދައި ދިނުމަށް ކުރާ މަސައްކަތް ހުއްޓާ ނުލާ އާއިލާގެ ފަރާތުން ކުރަމުންދާއިރު، މި މަސައްކަތުގެ ކުރީ ސަފުގައި އޭނާގެ މަންމަ ވެސް ދަނީ ހަރަކާތްތެރި ވަމުންނެވެ. އަދި ރިޟްވާން ގެންގުޅެފައިވާ ހުރިހާ ސާމާނެއް އަދިވެސް ރައްކާތެރިކަމާއެކު ގެންގުޅެމުންދާ ކަމަށް ރިޟްވާނުގެ މަންމަ ބުނެފައިވެއެވެ.
ގަދަކަމުން ގެންގޮސް ރިޟްވާން ގެއްލުވާލާފައިވަނީ 2014 ވަނަ އަހަރުގެ އޮގަސްޓް މަހުގެ 8 ވަނަ ދުވަހުގެ ރޭ ހުޅުމާލެއިންނެވެ. ނަމަވެސް މަރު ކޮމިޝަނުން މިހާތަނަށް ހާމަކޮށްފައިވާ މައުލޫމާތުން އެނގޭ ގޮތުގައި ބަޔަކު ރިޟްވާނަށް ފާރަލާ ހުޅުމާލެއިން ކާރަކަށް ގަދަކަމުން އަރުވާފައިވެއެވެ. ރިޟްވާން ގަދަކަމުން ކާރަކަށް އަރުގައިވެގެން ދިޔަ ރޭގައި، އޭނާ ގެންދިޔައީ ހުޅުމާލޭގައި ފަޅުގައި އަޅާފައި އޮތް ޑިންގީ އަކަށް ކަމަށެވެ. އަދި އެ ޑިންގީގައި އޭނާ ގެންދިޔައީ ކަނޑުގައި އޮތް އުޅަނދަކަށް ކަމަށާ، އޭނާ މަރާލީ އުޅަނދުގައި ކަމަށް މަރު ކޮމިޝަނުން ބުނެފައިވެއެވެ.
އަދި ރިޟްވާން މަރާލުމުގެ ކުރިން އޭނާއަށް ޝަހާދަތް ލައިދިން ކަމަށާއި، އޭނާ މަރާލީ ކުފުރު ވުމުން ކަމަށް ބުނެ ކަމުގައި މިހާތަނަށް މައުލޫމާތު ލިބިފައިވާ ކަމަށް މަރު ކޮމިޝަނުން ވަނީ ބުނެފައެވެ. އަދި އޭނާ މަރާލުމަށް ފަހު ގައިގައި ދާ އޮޅުމަށްފަހު ކަނޑުފައްތާފައި ވާ ކަމަށް އިންޓެލް މައުލޫމާތު ލިބިފައި ވާކަމަށް މަރު ކޮމިޝަނުން ހާމަކޮށްފައިވެއެވެ.
