"މި ދަނޑިވަޅުގައި ކުޅިވަރު މުބާރާތްތައް ބާއްވަން ތާއިދެއް ނުކުރަން"

މާލެ ސިޓީގައި ކުޅިވަރު މުބާރާތްތައް މި ދަނޑިވަޅުގައި ބާއްވަން ތާއިދު ނުކުރާ ކަމަށް ޕޮލިސީ ޕްލޭނިންގެ އެންޑް އިންޓަނޭޝަނަލް ހެލްތުގެ ޑެޕިއުޓީ ޑިރެކްޓަރ ޖެނެރަލް އައިޝަތު ސާމިޔާ ވިދާޅުވެއްޖެއެވެ.

ހެލްތު އިމަރޖެންސީ އޮޕަރޭޝަން ސެންޓަރ (އެޗްއީއޯސީ) ން އަންގާރަ ދުވަހު ހަވީރު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ސާމިޔާ ވިދާޅުވީ މާލޭގައި ކުޅިވަރު ކުޅުމުގެ ހުއްދަ ދިނުމާއެކު ބައެއް ކަހަލަ މުބާރާތްތައް ކުރިއަށް ގެންދިޔަކަން ފާހަގަކުރެވިފައިވާ ކަމަށާއި، ހަލުވިކަމާއެކު ކޮވިޑް-19 ފެތުރެމުން އަންނައިރު މިފަދަ މުބާރާތްތައް ބޭއްވުމަށް ތާއިދު ނުކުރާ ކަމަށެވެ. އެގޮތުން އެންމެ ރަނގަޅު ގޮތަކީ ބަލި ފެތުރެމުން އަންނަ މި ދަނޑިވަޅުގައި އަޅާ ފިޔަވަޅެއްގެ ގޮތުން އެއްވެސް ކުޅިވަރެއްގެ ފަރިތަކުރުން ނުވަތަ މުބާރާތް ނުބޭއްވުން ކަމަށެވެ.

ސާމިޔާ އިތުރަށް ވިދާޅުވީ ކަސްރަތު ކުރުމުގައިވެސް ވަކިކަހަލަ ކަންކަމަށް ބަލަންޖެހޭ ކަމަށާއި، އެގޮތުން އެންމެ ގިނަވެގެން ވެސް ފަސް މީހުންނަށްވުރެ ގިނަ ނުވާގޮތަށް ކަސްރަތުކުރުން ކުރިއަށް ގެންދިޔުމަށް އެދޭ ކަމަށެވެ.

ކޮވިޑް-19 އާ ގުޅިގެން ކުޅިވަރުގެ ހަރަކާތްތައް މެދުކަނޑާލުމަށްފަހު، ކުޅިވަރު ކުޅުމުގެ ހުއްދަދީފައިވަނީ ޖުލައި މަހުގެ އެއްވަނަ ދުވަހުން ފެށިގެންނެވެ. އެއާއެކު ހާއްސަ އުސޫލުތަކެއްގެ ދަށުން ކުޅިވަރާ ބެހޭ ވުޒާރާއިން ވަނީ ކުޅިވަރު ދަނޑުތައް ހުޅުވާލާފައެވެ.

ކުޅިވަރު ކުޅުމުގައި އަމަލުކުރުމަށް ކުޅިވަރާ ބެހޭ ވުޒާރާ އާއި ހެލްތު ޕްރޮޓެކްޝަން އޭޖެންސީ (އެޗްޕީއޭ) ން އެކުލަވާލާފައިވާ، "ކުޅިވަރު ކުޅުމުގައި އަމަލުކުރާނެ އާންމު އުސޫލު" ށް އަމަލުކުރުމަށް އަންގާފައިވާއިރު، މީގެ ކުރިން ކުޅިވަރާ ބެޔހޭ ވުޒާރާއިން ވަނީ ކުޅިވަރު ކުޅުމުގެ ފުރުސަތު ހުޅުވާލެވިފައިވީ ނަމަވެސް، ކޮވިޑް-19 ގެ ހާލަތަށް ބަލައި ކޮންމެ ވަގުތެއްގައިވެސް ކުޅިވަރު ކުޅޭ ތަންތަން ބަންދު ކުރަންޖެހުމުގެ ފުރުސަތު އޮތްކަމަށް ބުނެފައެވެ.