އިނގިރޭސި ޕްރިމިއާ ލީގާއި އިޓާލިއަން ލީގުގެ ބައެއް ކްލަބުތަކުން ހުށަހެޅުންތަކެއް ލިބުނު ކަމަށް ޔުވެންޓަސްގެ 23 އަހަރުން ދަށުގެ ޓީމުގެ ކޯޗުގެ މަގާމާ ހަވާލުވި އަންދްރޭ ޕިރްލޯ ބުނެފިއެވެ.

ޔުވެންޓަސްގެ 23 އަހަރުން ދަށުގެ ޓީމުގެ ކޯޗުގެ މަގާމާ ޕިރްލޯ ހަވާލުވިއިރު، މިއީ 2017 ވަނަ އަހަރު ފުޓްބޯޅަ ކުޅުން ހުއްޓާލި ޔުވެންޓަސްގެ ކުރީގެ ކެޕްޓަން ޕިރްލޯ ކޯޗެއްގެ ގޮތުގައި ފެންނާނެ ފުރަތަމަ ފަހަރެވެ.

ބުރާސްފަތި ދުވަހުގެ ވަގުތެއްގައި ޕިރްލޯ ވަނީ ޔުވެންޓަސްގެ 23 އަހަރުން ދަށުގެ ޓީމުގެ ކޯޗުގެ މަގާމާ ރަސްމީކޮށް ހަވާލުވެފައެވެ.

އެއްބަސްވުމުގައި ސޮއިކުރުމަށްފަހު ޕިރްލޯ ބުނީ ޕްރިމިއާ ލީގާއި އިޓާލިއަން ލީގުގެ ބައެއް ކްލަބުތަކުން ކޯޗެއްގެ ގޮތުގައި މަސައްކަތް ކުރުމަށް ހުށަހެޅުންތަކެއް ލިބުނު ކަމަށާއި، އެކަމަކު ޔުވެންޓަސްގެ ޒުވާން ޓީމާ ހަވާލުވުމަށް ނިންމީ، މި ޓީމަކީ އޭނާގެ ކޯޗިންގ ކެރިއަރު ފަށަން އެންމެ ރަނގަޅު ޓީމު ކަމަށް ދެކޭތީ ކަމަށެވެ. އަދި ކޯޗިންގ ކެރިއަރު އަލަށް ފަށާއިރު، އޭނާއަށް މިހާތަނަށް ބައެއް ތަޖުރިބާކާރު ކޯޗުންގެ އެހީތެރިކަން ލިބިފައިވާ ކަމަށާއި، އުންމީދަކީ ޔުވެންޓަސްގެ ޒުވާން ޓީމާއެކު ރަނގަޅު ކާމިޔާބީތަކެއް ހޯދުން ކަމަށްވެސް ޕިރްލޯ ބުންޏެވެ.

ޔުވެންޓަސްގެ 23 އަހަރުން ދަށުގެ ޓީމުގެ ކޯޗުގެ މަގާމާ ޕިރްލޯ ހަވާލުވީ އެޓީމުގެ ކޯޗު ފަބިއޯ ޕެކިއާ މަގާމު ދޫކޮށްލުމާ ގުޅިގެންނެވެ. ކޮވިޑް-19 އާ ގުޅިގެން ފުޓްބޯޅަ ހަރަކާތްތައް މެދުކަނޑާލުމުގެ ކުރިން ޕެކިއާގެ ކޯޗުކަމުގައި ޔުވެންޓަސްގެ ޒުވާން ޓީމުން ވަނީ އިޓަލީގެ ތިންވަނަ ޑިވިޝަންގެ ކަޕް މުބާރާތް ކާމިޔާބުކޮށްފައެވެ.

ދުނިޔޭގައި އުފެދުނު އެންމެ އުފެއްދުންތެރި އެއް މިޑްފީލްޑަރު ކަމަށްވާ ޕިރްލޯ 22 އަހަރަށް ފަހު ފުޓްބޯޅަ ކުޅުން ހުއްޓާލީ 2017 ވަނަ އަހަރުއެވެ.

އިޓަލީގެ 21 އަހަރުން ދަށުގެ ޓީމާ އެކު 2000 ވަނަ އަހަރުގެ ޔޫރަޕިއަން ޗެމްޕިއަންޝިޕް ކާމިޔާބުކުރި ޕިރްލޯ ވަނީ އިޓަލީން 2006 ވަނަ އަހަރުގެ ފީފާ ވޯލްޑް ކަޕް ކާމިޔަބުކުރިއިރު މޮޅު ކުޅުމެއް ދައްކާއެވެ.

އިންޓަ މިލާނާއި، އޭސީ މިލާންގެ އިތުރުން ޔުވެންޓަސްއަށް ގިނަ ދުވަސްތަކެއް ވަންދެން ކުޅުނު ޕިރްލޯ ވަނީ ކްލަބު ކެރިއަރުގައި ގިނަ ކާމިޔާބީތަކެއް ހޯދާފައެވެ. އޭނާ އެންމެ ފަހުން ކުޅުނީ އެމެރިކާގެ މޭޖާ ލީގުގެ ނިއު ޔޯކް ސިޓީ އެފްސީއަށެވެ.