އައިލެންޑް އެކްސްޕަރޓް މައްސަލައިގައި ހިމެނޭ ބިދޭސީން ޑީޕޯޓްކޮށްލައިފި ކަމަށް ތުހުމަތުކޮށްފި
ކުންފުނީގެ ފަރާތުން އެނާއަށް ލިބެންޖެހޭ 44000 ރުފިޔާ ހުންނާނެ ކަމަށް ބަޔާނުގައިވޭ
ހަމަ ނުޖެހުން ހިންގި ބައެއް ބިދޭސީން
އައިލެންޑް އެކްސްޕާޓް ޕްރައިވެޓް ލިމިޑެޓް ކުންފުނީގައި މަސައްކަތް ކުރާ ބިދޭސީ މުވައްޒަފުންތަކެއް މުޒާހަރާކޮށް، ފުލުހުންނާ ކުރިމަތިލައި، ހިނގި ހަމަނުޖެހުންތަކާއި ގުޅިގެން ހައްޔަރު ކުރި ބިދޭސީން ޑީޕޯޓުކޮށްފައިވާ ކަމުގެ ތުހުމަތުކޮށްފިއެވެ.
މި މައްސަލައިގައި ހައްޔަރު ކުރެވުނު ބަންގްލަދޭޝް ރައްޔިތެއް ކަމަށްވާ އެމްޑީ ރޮނީގެ ގާނޫނީ ވަކީލްގެ ފަރާތުން ނެރެފައިވާ ބަޔާނުގައި ބުނެފައިވަނީ 14 ޖުލައި 2020 ގައި އޭނާގެ ބަންދަށް ގޮތެއް ނިންމުމަށް ހުޅުމާލެ މެޖިސްޓްރޭޓް ކޯޓުގައި ބޭއްވުނު އޮންލައިން މަޖްލީސްގައި 15 ދުވަހަށް ބަންދުގައި ބެހެއްޓުމަށް އަމުރުކުރެވުނު ކަމަށެވެ. އޭނާ ބަންދުގައި ބަހައްޓާފައި ހުރީ ދޫނިދޫ ޑިޓެންޝަން ސެންޓަރގައެވެ.
ބަޔާނުގައި އިތުރަށް ބުނެފައިވަނީ އޭނާގެ މުވައްލިކް (އެމްޑީ ރޮނީ) ގެ ފަރާތުން ލިބިފައިވާ މައުލޫމާތަށް އޭނާ ފުރަތަމަ ރާއްޖެ އައުމަށްފަހުވެސް މަސައްކަތް ކުރީ އައިލެންޑް އެކްސްޕަރޓްގައެވެ. އަދި އޭނާ އަތުން ފައިސާ ނެގިކަމަށާއި ކުންފުނީގެ ފަރާތުން އެނާއަށް ލިބެންޖެހޭ 44000ރ. އާއި ނުލިބިވާ މަސްމަހުގެ މުސާރަ ހުންނާނެ ކަމަށާއި، ހަމަ އެހެން މީހުންނަށް ވެސް މިގޮތަށް ލިބެންޖެހޭ ފައިސާ އެ ކުންފުނީގައި ހުންނާނެ ކަމަށެވެ.
ގާނޫނީ ވަކީލުންގެ ޓީމުން ނެރެފައިވާ ބަޔާނުގައި ވަނީ މިގޮތަށް ކަންތައްތައް އޮތުމާއި އެކު ކަމާބެހޭ މުއައްސަސާތަކަށް ހުށައެޅުމަށް ޕަވަރ އޮފް އެޓަރނީ ތައްޔާރުކޮށް މުވައްކިލު ލައްވާ ސޮއިކުރުމަށްޓަކައި އޭނާއާ ބައްދަލުކުރުމަށް ޖުލައި މަހުގެ 27 ވަނަ ދުވަހު ފުލުހަށް ހުށައެޅި ކަމަށެވެ. ނަމަވެސް، 25 ޖުލައިގައި އެމްޑީ ރޮނީ އިމިގްރޭޝަންއާއި ހަވާލުކޮށްފައިވާކަމަށް އެ ދުވަހު ކަސްޓޯޑިއަލްގެ ފަރާތުން މައުލޫމާތު ދިން ކަމަށެވެ. އަދި އޭނާ އިމިގްރޭޝަންއާއި ހަވާލުކޮށްފައިވަނީ ގާނޫނީ ވަކީލަށް އެނގުމެއް ނެތި ކަމަށާއި މިކަމުން ބެލެވެނީ ހައްޔަރުކުރެވުނު 40 މީހުންވެސް ޑީޕޯޓުކޮށްލަން އުޅޭ ކަމަށެވެ.
މި މައުލޫމާތު ލިބުމައި އެކު މުވައްކިލްއާ ބައްދަލުކުރުމަށް އެކި ގޮތް ގޮތުން މަސައްކަތް ކުރި ނަމަވެސް، އެ މަސައްކަތް ނާކާމިޔާބު ވެފައިވާކަމަށް ވިދާޅުވެ، ބަޔާނުގައި ވަނީ މި މައްސަލަ ހިއުމަން ރައިޓްސް ކޮމިޝަނަށް ހުށައެޅުމުން، މިމައްސަލަ ސީރިއަސް މައްސަލައެއްގެ ގޮތުގައި ބަލަމުން އަންނަ ކަމަށާއި އެހެންނަމަވެސް އެފަރާތަތއް އިމިގްރޭޝަންއާއި ހަވާލު ކުޔރި ކަމެއް ނުވަތަ ޑީޕޯޓުކުރިކަމެއް ޔަގީންކަމާއި އެކު ބުނަން ނޭނގޭ ކަމަށެވެ.
އެހެންނަމަވެސް މިހާތަނަށް ކުރި މަސައްކަތުން މި މައްސަލައިގައި ބަންދުކުރެވުނު މީހުން ޑީޕޯޓުކޮށްފައިވާކަން ސާފުވެފައިވާކަން ފާހަގަކޮށް ގަނޫނީ ވަކީލުންގެ ޓީމުން ވަނީ ކަންބޮޑުވުން ފާޅުކޮށްފައެވެ.
13 ޖުލައިގައި ހުޅުމާލޭގައި ބިދޭސީންތަކެއް ކުރި މުޒާހަރަ ހަމަނުޖެހުމަކަށް ބަދަލުވެ ގަލާއި އެހެނިހެން އެއްޗެހި އުކުމުގެ ތެރޭގައި ބައެއް ފުލުހުންނަށް ވަނީ އަނިޔާވެފައެވެ. މީގެ އިތުރުން ފުލުހުންގެ ވެހިކަލްގެ ބިއްލޫރިގަނޑެއް ތަޅައިގެން ގޮސްފައިވެއެވެ. އަދި އެ ސަރަހައްދުގައި ހުރ ފިހާރައެއްގެ ބިއްލޫރިގަނޑު ވެސް ތަޅައިގެން ގޮސްފައިވެއެވެ.މުޒާހަރާ ކުރި ބިދޭސީން ގޮވަމުން ދިޔައީ އެމީހުންގެ މުސާރަ ދިނުމަށާއި، އަނބުރާ ގައުމަށް ފޮނުވައިދިނުމަށެވެ. މުޒާހަރާގެ ބައިވެރިން ހިފައިގެން ތިބި ބޯޑުތަކުގައި ފަސް މަސް ވަންދެން މުސާރަ ނުދޭ ކަމަށް ވަނީ ބުނެފައެވެ.
