ފޮއްދޫ ރަށް ގިރުމުގެ މައްސަލަ ހައްލުވެއްޖެ
28 ޖުލައި 2020 | އަންގާރަ 08:37މި މަޝްރޫޢުގެ އަމަލީ މަސައްކަތް ފަށާފައިވަނީ 07 މާޗްގައި
ނ. ފޮއްދޫ ބަނދަރު ސަރަހައްދު
ނ. ފޮއްދޫ ގޮނޑުދޮއް ހިމާޔަތް ކުރުމުގެ މަޝްރޫޢުގެ މަސައްކަތް މި ހިނގާ ޖުލައި މަހުގެ 26ގައި ނިމިފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނެފިއެވެ.
އެމްޓީސީސީން ބުނީ މިނިސްޓްރީ އޮފް ނޭޝަނަލް ޕްލޭނިންގ ، ހައުސިންގ އެންޑް އިންފްރާސްޓްރަކްޗަރގެ ފަރާތުން އެ ކުންފުންޏާއި ހަވާލުކޮށްގެން ކުރިއަށްގެން ދިޔަ މި މަޝްރޫޢުގެ އެއްބަސްވުމުގައި އެކުންފުނީގެ ފަރާތުން ސޮއިކޮށްފައިވަނީ 25 ފެބްރުއައީ 2020 ގައެވެ.
ނ. ފޮއްދޫ ގޮނޑުދޮއް ހިމާޔަތްކުރުމުގެ މަޝްރޫޢުގެ ދަށުން 180 މީޓަރުގެ ސަރަހައްދެއްގައި ޖިއޯ ބޭގް އެތުރިފައިވެއެވެ.
މީގެ އިތުރުން 5000 އަކަ މީޓަރުގެ ސަރަހައްދެއް ގެ ބިންގަނޑު އެއްވަރު ކުރެވިފައިވެއެވެ.
މި މަޝްރޫޢު އަކީ ނ. ފޮއްދޫ އަށް ދިމާވެފައިވާ ރަށް ގިރުން ހުއްޓުވުމުގެ ގޮތުންނާއި، ލަފާފުރުމަށް ބޭނުންކުރާ ފާލަން ރަށާއި ވަކިވެފައިވުމާއެކު އެކަމަށް ހައްލެއް ހޯދުމުގެ ގޮތުން މިނިސްޓްރީ އޮފް ނޭޝަނަލް ޕްލޭނިންގ ، ހައުސިންގ އެންޑް އިންފްރާސްޓްރަކްޗަރގެ ފަރާތުން އެ ކުންފުންޏާއި ހަވާލުކޮށްގެން ކުރިއަށްގެން ދިޔަ މަޝްރޫއެކެވެ.
މި މަޝްރޫޢުގެ އަމަލީ މަސައްކަތް ފަށާފައިވަނީ 07 މާޗް 2020 ގައެވެ. އަދި މި މަޝްރޫޢުއަށް 6.7 މިލިއަން ރުފިޔާ ހަރަދު ވެފައިވެއެވެ.
އެމްޓީސީސީން ބުނީ ދިވެހި ރައްޔިތުންނަށް ބޭނުންވާ ޢުމްރާނީ ވަސީލަތްތައް ޤާއިމުކޮށްދީ ރަށްވެހި ތަހުޒީބު ދިވެހި ރައްޔިތުންނަށް ފޯރުކޮށް ދިނުމަށް މިދިޔަ ދޮޅު އަހަރެއްހާ ދުވަހުގެ ތެރޭގައި އެމްޓީސީސީން މުޅިން އަލަށް އެތައް މަޝްރޫޢެއް ފަށައި، އޭގެ ތެރެއިން ބައެއް މަޝްރޫޢުތައް މިހާރު ނިމިފައިވާ ކަމަށެވެ.
މި ގޮތުން މި އަހަރު ތެރޭގައި ނިމިފައިވަނީ 17 ރަށުގައި 19 މަޝްރޫޢުއެވެ. އަދި މި ޖުލައި މަހުގެ ތެރޭގައި ބަނދަރު ހެދުމުގެ 2 މަޝްރޫޢުއާއި އެއަރޕޯޓު އިތުރަށް ތަރައްޤީ ކުރުމުގެ މަޝްރޫޢުއެއް ވަނީ ނިމިފައެވެ.
އަދި މި ހަފްތާ ތެރޭގައި ވެސް އިތުރު ދެ މަޝްރޫޢުއެއް ނިންމައި ހަވާލުކުރުމަށް އެ ކުންފުނިން މެދުނުކެނޑި މަސައްކަތް ކުރަމުންދާ ކަމަށް އެމްޓީސީސީން މައުލޫމާތުދެއެވެ.
