މިނިވަން 50 އާގުޅޭ 83 މައްސަލައިގެ ތެރެއިން 37 މައްސަލަ ނިންމައިފި
27 ޖުލައި 2020 | ހޯމަ 10:32މިނިވަން ފަންސާހާ ގުޅޭ ބޮޑެތި މައްސަލަތަކެއް ވެސް އެބަހުރި
ކުރީގެ ރައީސް ޔާމީން އަދި ރައީސް އޮފީހުގެ ކުރީގެ މިނިސްޓަރ މުހައްމަދު ހުސައިން ޝަރީފް (މުންދު): މިނިވަން 50ގެ ޖާފަތް ބަޔަކަށް ދިނުމަށް ކޮރަޕްޝަން ހިންގާފައިވާ ކަމަށް ތުހުމަތު ކުރެވޭ
މިނިވަން 50 ގެ ހަރަކާތްތަކާއި ގުޅިގެން، އެންޓި ކޮރަޕްޝަން ކޮމިޝަން (އޭސީސީ)އަށް ހުށަހެޅިފައިވާ 83 މައްސަލައިގެ ތެރެއިން 37 މައްސަލަ ނިންމާފައިވާ ކަމަށް އެކޮމިޝަނުން ބުނެފިއެވެ.
"ރާއްޖެއެމްވީ"އަށް މައުލޫމާތު ދެއްވަމުން އޭސީސީގެ ރައީސް މަރިޔަމް ޝިއުނާ ވިދާޅުވީ، މިނިވަން ފަންސާހުގެ ހަރަކާތްތަކާއި ގުޅިގެން 83 މައްސަލައެއް އެ ކޮމިޝަނަށް ހުށަހެޅި ބަލަމުން ދިޔަ ކަމަށެވެ. އެގޮތުން، މިހާތަނަށް ތަހުގީގު ނިންމާލެވިފައިވަނީ 37 މައްސަލައެއް ކަމަށާއި، ބާކީ ހުރި މައްސަލަތަކުގެ ތަހުގީގުތައް ވެސް ނިންމުމަށް މަސައްކަތް ކުރައްވަމުން ގެންދަވާ ކަމަށެވެ.
މައްސަލަތަކުގެ އިތުރު ތަފްސީލެއް ޝިއުނާ ހާމަ ނުކުރައްވައެވެ.
މިނިވަން 50ގެ ހަރަކާތްތަކުގައި ކޮރަޕްޝަން ހިމެނޭކަން ހާމަކޮށްފައިވަނީ ވެސް ރައީސް ޔާމީންގެ ސަރުކާރުންނެވެ. އެގޮތުން 2015 ވަނަ އަހަރު ރިޔާސީ ލޯންޗްކޮޅުގައި އެއްޗެއް ގޮއްވާލި މައްސަލައިގެ ތެރެއިން، އެމްއެމްޕީއާރުސީގެ ހިޔާނާތާއި، މިނިވަން ފަންސާހުގެ ކޮރަޕްޝަނުގެ މައްސަލަތަކާއި، ރައީސް ޔާމީންގެ ސަރުކާރުން ހިންގާފައިވާ ގިނަ "ޖަރީމާ"ތައް ފެންމަތިވެ، އެމަނިކުފާނުގެ ސަރުކާރަށް، ރާއްޖެއިންނާއި ބޭރު ދުނިޔެއިން ވަރަށް ބޮޑަށް ފާޑު ކިޔުންތައްވެސް އަމާޒުވިއެވެ.
ރައީސް ޔާމީނަށް ވަފާތެރި، އޭރު އޭސީސީގެ ރައީސް ހަސަން ލުތުފީ އާއި އެކޮމިޝަނުން ވަނީ، މިނިވަން ފަންސާހާ ގުޅޭ ގިނަ މައްސަލަތަކެއް ބަލަމުންދާ ކަމަށް ވެސް ބުނެފަ އެވެ.
އެގޮތުން، މިނިވަން 50 ފާހަގަކުރުމަށް ބޭއްވި ރަސްމިއްޔާތުގެ ކޭޓަރިން ނިއުޕޯޓް ރެސްޓޯރެންޓާ ހަވާލުކުރި މައްސަލަ ވެސް އެ ކޮމިޝަނުން ބެލި އެވެ. ކޮރަޕްޝަނަށް މަގުފަހިވާ ގޮތަށް ނިއުޕޯޓް ރެސްޓޯރެންޓާ ޖާފަތުގެ މަސައްކަތް ހަވާލުކުރި މައްސަލައިގައި ރައީސް އޮފީހުގެ ކުރީގެ މިނިސްޓަރު މުހައްމަދު ހުސައިން ޝަރީފް (މުންދު) ގެ މައްޗަށް ދައުވާ ކުރުމަށް ޕްރޮސެކިއުޓަރ ޖެނެރަލްގެ އޮފީހަށް އޭސީސީން ފޮނުވި އެވެ.
މުންދުގެ މައްޗަށް މަގާމުގެ ނުފޫޒު ބޭނުންކުރުމުގެ ކުށުގެ ދައުވާ ކުރަން ފޮނުވުމުން، ހަފްތާއެއްގެ ތެރޭގައި، އޭރުގެ ޕްރޮސެކިއުޓަރ ޖެނެރަލް އާއިޝަތު ބިޝާމް ވަނީ އެކަށީގެންވާ ހެކި ނެތް ކަމަށް ބުނެ ދައުވާ ނުކުރަން ނިންމާފަ އެވެ.
އޭސީސީން ބުނެފައި ވަނީ ނިއުޕޯޓަކީ އެފަދަ ޖާފަތެއް ތައްޔާރުކުރުމުގެ އެއްވެސް ކަހަލަ ތަޖުރިބާއެއް ނެތް ބަޔަކަށް ވާއިރު އެ މީހުން ގާބިލްކަމަށް ވެސް ނުބަލާ އެ ޕްރޮޖެކްޓް އެފަރާތާ ހަވާލުކުރަން މުންދު އަންގާފައި ވަނީ، ރައީސް ވިދާޅުވެގެން ކަމަށް ބުނެ ދޮގު ހަދައިގެން ކަމަށެވެ. އަދި އެއީ މަގާމުގެ ނުފޫޒު ބޭނުން ކޮށްގެން ދައުލަތަށް ގެއްލުންވާނެ ގޮތަކަށް އަމަލު ކުރުން ކަމަށް އޭސީސީގެ ތަހުގީގުގައި ވަނީ ނިންމައިފަ އެވެ.
މުހައްމަދު ހުސައިން ޝަރީފް (މުންދު)ގެ ނުފޫޒުން ނިއުޕޯޓަށް މިނިވަން ފަންސާހުގެ ކޭޓަރިންގ އަށް 8 މިލިއަން ރުފިޔާ ސަރުކާރުން ޚަރަދުކޮށްފައި ވެއެވެ. އެއީ ބޮލަކަށް 8000ރ ގެ ރޭޓެކެވެ.
މިނިވަން ފަންސާހާއި ގުޅިގެން ހިންގުނު ޕްރޮޖެކްޓްތަކުގެ ތެރެއިން 2 ޕްރޮޖެޓަކުން ރައީސް ޔާމީނުގެ އެކައުންޓަށް ފައިސާ ވަތް މައްސަލަތަކެއްވެސް އޭސީސީން ދަނީ ތަޙުގީގުކުރަމުންނެވެ.
