ކަނޑުފަޅުގެ ނަފާ: މިއަހަރު އިތުރު 29 މިލިއަން ރުފިޔާގެ ލޯނު ދޫކުރަނީ
ޕްރޮގްރާމްގެ ދަށުން މިހާތަނަށް 3.4 މިލިއަން ރުފިޔާގެ ލޯނު ދޫކުރެވިފައިވޭ
މަސް ދޯނިތަކެއްގައި މަސްވެރިންތަކެއް ހަރަކާތްތެރިވަނީ
"ކަނޑުފަޅުގެ ނަފާ" ގެ ނަމުގައި މަސްދޯނި ފަހަރުގައި ލޮނު ފެނުން މަސްފިނި ކުރާ ނިޒާމް ޤާޢިމް ކުރުމަށްޓަކައި މިއަހަރު އިތުރު 29 މިލިއަން ރުފިޔާގެ ލޯނު ދޫކުރުމަށް ހަމަޖެހިފައިވާ ކަމަށް މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ޒަހާ ވަހީދު ވިދާޅުވެއްޖެއެވެ.
މަޖިލީހުގެ ސަރުކާރުގެ މައްސޫލިއްޔަތު އަދާކުރާ މިންވަރު ކޮމިޓީގައި ވާހަކަދައްކަވަމުން މިނިސްޓަރ ވަނީ މިހާތަނަށް އެ މިނިސްޓްރީން ކޮށްފައިވާ މަސައްކަތްތައް ހިއްސާ ކުރައްވާފައެވެ.
ކޮމިޓީގައި ވާހަކަ ދައްކަވަމުން ޒަހާ ވިދާޅުވީ ރެފްރިޖަރޭޓެޑް ވޯޓަރ ސިސްޓަމް (އާރުއެސްޑަބްލިއު) އެއް ގާއިމު ކުރުމަށް މަސްވެރިންނަށް ލޯނު ދޫކުރެވުމަކީ އެފަރާތްތަކަށް އައިސް ލިބުމުގައި ހުރި ދަތިތަށް ފިލުވާލުމަށް ފެށުނު މުހިއްމު މަސައްކަތެއް ކަމަށެވެ.
އެގޮތުން މި މަސައްކަތުގެ ތެރެއިން މަސްދޯނު ފަހަރުގައި ފެން ފިނި ކުރާ ނިޒާމު ގާއިމުކޮށް އައިސް ހޯދުމަށް ކިއުގައި ހޭދަކުރާ ވަގުތު މަދުކޮށް، މަސްވެރިންނަށް މަސްވެރިކަމުގައި އުޅޭނެ ވަގުތު އިތުރު ކުރެވުނު ކަމަށް ވެސް ވިދާޅުވިއެވެ. އޭނާ ވިދާޅުވީ، މި ޕްރޮގްރާމްގެ ދަށުން މިހާތަނަށް 3.4 މިލިއަން ރުފިޔާގެ ލޯނު ދޫކުރެވިފައިވާ ކަމަށާއި އަދި މިއަހަރުގެ ތެރޭގައި އިތުރު 29 މިލިއަން ރުފިޔާގެ ލޯނު ދޫކުރުމަށް ތައްޔާރުވަމުން އަންނަ ކަމަށެވެ.
"ކަނޑުފަޅުގެ ނަފާ" ޕްރޮގްރާމްގެ ދަށުން ދޫކުރާ ލޯނު ދޫކުރުމުގެ މަގްސަދަކީ މިހާރު ރާއްޖޭގެ އެކި އަތޮޅުތަކުގައި ޤާއިމްކޮށްފައި ހުރި އައިސް ޕްލާންޓްތަކުން މަސްވެރިން ބޭނުންވާ ވަރަށް އައިސް ނުލިބޭތީ އާއި އައިސް ހޯދުމަށް ކުރަންޖެހޭ ހޭދަ ކުޑަކޮށް މަސްވެރިކަމުގައި ބާނާ މަސް ގިނަ ވަގުތު ތާޒާކަންމަތީ ދޯނީގައި ރައްކާކުރުމަށް މަގުފަހި ކޮށްދިނުން ކަމަށެވެ. އަދި ކަނޑުމަތީގައި ގިނަ ވަގުތު ހޭދަކުރެވޭ ގޮތް މެދުވެރިކޮށް މަސްވެރިކަން އިތުރަށް ތަރައްޤީ ކުރުމަށް އެހީތެރިވެ މަގުފަހި ކޮށްދިނުން ކަމަށް މިނިސްޓްރީން ބުންޏެވެ.
