އެއަރޕޯޓް ކުންފުނި ހިންގުމާ ގޯޑަން ހަވާލުވެވަޑައިގެންފި

މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ސީއީއޯ އަދި މެނޭޖިން ޑިރެކްޓަރުގެ މަގާމާއި ރަސްމީކޮށް ގޯޑަން އެންޑްރޫ ސްޓުއާޓް ހަވާލުވެވަޑައިގެންފިއެވެ.

ގޯޑަން އެ މަގާމާއި ހަވާލުވެ ވަޑައިގެންފައިވާކަން އާދިއްތަ ދުވަހު، އެމްއޭސީއެލް އިން ވަނީ އެ ކުންފުނީގެ މުވައްޒަފުންނަށް ފޮނުވި ސާކިއުލާއެއްގައި ބުނެފައެވެ.

އެމްއޭސީއެލް ހިންގުމާ ގޯޑަން ހަވާލުވެވަޑައިގެންވިއިރު، އާދިއްތަ ދުވަހު ވަނީ އެކްޓިންގ މެނޭޖިން ޑިރެކްޓަރުކަން ކުރެއްވި، މޫސާ ސޯލިހު 39 އަހަރަށް ފަހު ހިދުމަތުން ރިޓަޔާ ކުރައްވާފައެވެ.

އެމްއޭސީއެލްގެ މެނޭޖިންގ ޑިރެކްޓަރގެ މަގާމާ ހަވާލުވެވަޑައިގެންނެވި ގޯޑަން އަކީ ޔޫރަޕް، މެދުއިރުމަތި، އުތުރު އެފްރިކާ، އޭޝިއާ އަދި އުތުރު އެމެރިކާގައި އޭވިއޭޝަން އިންޑަސްޓްރީގައި 30 އަހަރުގެ ތަޖުރިބާ ލިބިފައި ހުންނެވި ބޭފުޅެއް ކަމަށް އެމްއޭސީއެލް އިން ބުނެއެވެ. އޭގެ ތެރެއިން 20 އަހަރަށް ވުރެ ގިނަ ދުވަސް ގޯޑަން ހޭދަކުރައްވާފައިވަނީ އެގްޒެކެޓިވް އަދި ބޯޑު ފެންވަރުގެ މަގާމުތަކުގައި ކަމަށް އެމްއޭސީއެލް ވަނީ ހާމަކޮށްފައެވެ.