މެގުއާގެ އިންޒާރު އޭނާގެ ކުރީގެ ކްލަބު ލެސްޓާއަށް

އިނގިރޭސި ޕްރިމިއާ ލީގުގައި ލެސްޓާ ސިޓީއާ ދެކޮޅަށް މެންޗެސްޓާ ޔުނައިޓެޑް ކުޅޭ މެޗު އެއްވަރުވެގެން ނިމުމުގެ ފުރުސަތު ނުދޭނެ ކަމަށް ޔުނައިޓެޑްގެ ކެޕްޓަން ހެރީ މެގުއާ ބުނެފިއެވެ.

އާދީއްތަ ދުވަހުގެރޭ ކުޅޭ މެޗު އެއްވަރު ކޮށްލައިގެން ޔުނައިޓެޑަށް ގަދަ ހަތަރަކުން ޖާގަ ލިބޭނެއެވެ. އަދި މި މެޗުން ބަލިވެގެން ޔުނައިޓެޑަށް ގަދަ ހަތަރަކަށް ވަދެވޭނީ ޗެލްސީ އާއި ވުލްވްސް ބައްދަލުކުރާ މެޗުން ޗެލްސީ ބަލިވެއްޖެނަމައެވެ.

މެޗުގެ ކުރިން މެގުއާ ބުނީ ލެސްޓާގެ ދަނޑުގައި ކުޅޭ މެޗަށް ޔުނައިޓެޑުން ދާނީ މެޗު އެއްވަރުވާން ނޫން ކަމަށާއި، ޔުނައިޓެޑުން ދާނީ މޮޅަކާއެކު ތިން ޕޮއިންޓް ހޯދާ ގަދަ ހަތަރެއްގެ ޖާގަ ކަށަވަރުކުރުމަށް ކަމަށެވެ. އަދި ސީޒަން ފެށުނުއިރު ޔުނައިޓެޑްގެ އަމާޒަކަށްވީ ގަދަ ހަތަރެއް ކަމަށާއި، އެކަމަކު ޔުނައިޓެޑްގެ މިހާރުގެ އަމާޒަކީ ލީގުގެ ތިންވަނަ ކަމަށް މެގުއާ ބުންޏެވެ.

މެގުއާ އިތުރަށް ބުނީ އޭނާ ޔުނައިޓެޑާ ގުޅުނީ ބޮޑެތި ކާމިޔާބީތައް ހޯދުމުގެ އަޒުމުގައި ކަމަށާއި، ޔުއެފާ ޗެމްޕިއަންސް ލީގުގައި ކުޅުމަކީ ހާއްސަ ކަމެއް ކަމަށެވެ. އަދި ޔުނައިޓެޑްގެ އަމާޒަކީ ޗެމްޕިއަންސް ލީގު ފަދަ ބޮޑު މުބާރާތެއް ކާމިޔާބުކުރުން ކަމަށްވެސް މެގުއާ ބުންޏެވެ.

އާދީއްތަ ދުވަހުގެރޭ ކުޅޭ މެޗާ ގުޅޭ ގޮތުން ވާހަކަ ދައްކަމުން ޔުނައިޓެޑްގެ ކޯޗު އޮލެ ގުނަ ސޯލްޝެއާ ބުނީ ލީގުގައި ޔުނައިޓެޑުން މިހާރު ދައްކަމުން އަންނަ ކުޅުމާ އަޅާބަލާއިރު، ލީގުގައި ޔުނައިޓެޑް އޮންނަން ޖެހޭނީ ތިންވަނައިގައި ކަމާމެދު ޝައްކެއް ނެތް ކަމަށާއި، ބޭނުންވަނީ މޮޅަކާއެކު ގަދަ ހަތަރެއްގެ ޖާގަ ޔަގީންކުރަން ކަމަށެވެ.

މި މެޗަށް ނުކުންނައިރު ޔުނައިޓެޑުން ޕްރިމިއާ ލީގުގެ ތާވަލުގެ ތިންވަނައިގައި އޮތީ ކުޅުނު 37 މެޗުން ލިބުނު 63 ޕޮއިންޓާއިއެކުގައެވެ. ހަތަރުވަނައިގައި އޮތް ޗެލްސީއަށް ވެސް 37 މެޗުން 63 ޕޮއިންޓް ލިބިފައިވާއިރު، ގަދަ ހަތަރަކަށް އެރުމަށް މަސައްކަތް ކުރަމުން އަންނަ ލެސްޓާ ފަސްވަނައިގައި އޮތީ ކުޅުނު 37 މެޗުން 62 ޕޮއިންޓް ލިބިގެންނެވެ.

ލީގުގެ ފަހު މެޗުތައް ފެށުމަށް ހަމަޖެހިފައިވަނީ އާދީއްތަ ދުވަހުގެރޭ ރާއްޖެ ގަޑިން 20:00 ގައެވެ.