އާސެނަލްގެ ކުރީގެ ކޯޗު އެމެރީ ވިޔަރެއާލަށް

އާސެނަލަށް ކުރިން ކޯޗުކަން ކޮށްދިން އުނާއި އެމެރީ ސްޕެއިންގެ ވިޔަރެއާލްގެ ކޯޗުގެ މަގާމާ ހަވާލުވެއްޖެއެވެ.

އެމެރީ ވިޔަރެއާލާއެކު ހަދައިފައިވަނީ ތިން އަހަރުގެ އެއްބަސްވުމެކެވެ.

ކޯޗުގެ މަގާމާއި އެމެރީ ހަވާލުވިކަން ހާމަކޮށް ވިޔަރެއާލުން ބުނީ އެމަގާމު އެމެރީއާ ހަވާލުކުރީ އެމެރީއަކީ ސްޕެއިންގެ ފުޓްބޯޅައިގެ އިތުރުން ޔޫރަޕްގެ ފުޓްބޯޅަ ވަރަށް ރަނގަޅަށް ދަންނަ ކޯޗެއް ކަމަށް ވުމުގެ އިތުރަށް، މީގެ ކުރިން ޔޫރަޕްގެ ބޮޑެތި ކްލަބުތަކަށް އޭނާ ކޯޗުކަން ކޮށްދީ ނަތީޖާ ނެރިދީފައިވާތީ ކަމަށެވެ.

އެމެރީ އަކީ ސްޕެއިންގެ ފުޓްބޯޅައަށް އައު ކޯޗެއް ނޫނެވެ. އޭނާ ވަނީ މީގެ ކުރިން ސްޕެއިންގެ ވެލެންސިއާއަށް ކޯޗުކަން ކޮށްދީ، އެޓީމަށް ޔުއެފާ ޗެމްޕިއަންސް ލީގުން ޖާގަ ހޯދައިދީފައެވެ. އެއަށްފަހު 2013 ވަނަ އަހަރު ސެވިއްޔާ އާއެކު އެމެރީ ވަނީ ޔުއެފާ ޔޫރޮޕާ ލީގުވެސް ކާމިޔާބުކޮށްފައެވެ.

އެމެރީ އެންމެ ފަހުން އިރުޝާދު ދީފައިވަނީ އިނގިރޭސި ކްލަބު އާސެނަލަށެވެ. އެކަމަކު އާސެނަލާއެކު އެމެރީއަށް އެންމެ އެދެވޭ ނަތީޖާތަކެއް ނެރެދެވިފައެއް ނުވެއެވެ.

އެމެރީ ބޮޑަށް ފާހަގަވެގެންދިޔައީ ފްރާންސްގެ ޕީއެސްޖީންނެވެ. އެގޮތުން އެމެރީ އެޓީމަށް އިރުޝާދުދިން 114 މެޗުގެ ތެރެއިން 87 މެޗުން އެޓީމު ވަނީ މޮޅުކޮށްދީފައެވެ. އެމެރީގެ އިރުޝާދުގެ ދަށުން ޕީއެސްޖީން ވަނީ ފްރެންޗު ލީގުގެ އިތުރުން ފްރެންޗު ކަޕް ދެ ފަހަރު އަދި ފްރެންޗު ލީގު ކަޕް ދެ ފަހަރު ކާމިޔާބުކޮށްފައެވެ.