ކޮވިޑާއި ދެކޮޅަށް މަސައްކަތް ކުރުމަށް އެމެރިކާއިން 150،000 ޑޮލަރުގެ އެހީ ދީފި
މި ޕީޕީއީތަކަކީ ރައްޖެއަށް މިހާތަނަށް ދެވުނު ޖުމްލަ ތިންވަނަ ޕީޕީއީގެ އެހީ
އެމެރިކާއިން ރާއްޖެއަށް ދިން އެހީގެ ސާމާނާއި ކޮލަމްބޯގައި ހުންނަވާ ރާއްޖޭގެ ސަފީރު ހަވާލުވެވަޑައިގަންނަވަނީ
ކޮވިޑާއި ދެކޮޅަށް މަސައްކަތް ކުރުމަށް އެމެރިކާއިން 150،000 ޑޮލަރުގެ އެހީ ރާއްޖެއަށް ދީފިއެވެ.
ސްރީލަންކާ އާއި ދިވެހިރާއްޖެއަށް އެމެރިކާ އެންބަސީއިން ކަނޑައަޅުއްވައިފައި ހުންނަވާ ޑެޕިއުޓީ ޗީފް އޮފް މިޝަން، މާޓިން ކެލީ ވަނީ ދިވެހިރާއްޖެއިން ސްރީލަންކާއަށް ކަނޑައަޅުއްވައިފައި ހުންނަވާ ހައި ކޮމިޝަނަރު އުމަރު ރައްޒާގާއި ބައްދަލުކުރައްވާ ކޮވިޑް-19 އާއި ދެކޮޅަށް މަސައްކަތްކުރާ ކުރީ ސަފުގެ ޙިދުމަތްތެރިންނަށް ޕާސަނަލް ޕްރޮޓެކްޓިވް އިކުއިޕްމަންޓު (ޕީޕީއީ) ހަދިޔާ ކުރައްވާފައެވެ.
ޖުމްލަ އަގު 150،000 ޑޮލަރަށް އަރާ މި ހިލޭއެހީ އަކީ، ކޮވިޑް-19 އާއި ދެކޮޅައަށް ހަނގުރާމަ ކުރުމަށް އެމެރިކާއިން ގެންގުޅޭ ބައިނަލްއަގުވާމީ އުސޫލު ކަމުގައިވާ "އޯލް އޮފް އެމެރިކާ" ގެ ރަމްޒެކެވެ. އެމެރިކާގެ ޑިޕާޓްމަންޓް އޮފް ޑިފެންސްގެ މާލީ އެހީތެރިކަމުގެ ދަށުން ހަދިޔާ ކުރެވުނު މި ޕީޕީއީތަކަކީ ރައްޖެއަށް މިހާތަނަށް ދެވުނު ޖުމްލަ ތިންވަނަ ޕީޕީއީގެ އެހީއެވެ. ހަމައެއާއެކު އެކުވެރި މެދުގައި ކޮވިޑް-19 އާއި ދެކޮޅައަށް މަސައްކަތް ކުރުމުގެ ގާބިލުކަން އިތުރުކުރުމުގެ މަގްސަދުގައި ދެވުނު އެހީ އަކީ ފާއިތުވި މަހު ރާއްޖެއަށް ދެވުނު ދެވަނަ ތަކެތީގެ އެހީއެވެ.
ތަކެތީގެ އެހީގެ އިތުރުން، އެމެރިކާއިން އަންނަނީ ކޮވިޑް-19 އާއި ގުޅުންހުރި ރާއްޖޭގެ އެކި ދާއިރާތަކުގެ ބޭނުންތަކަށް ހާއްސަކޮށް 2 މިލިއަން ޑޮލަރުގެ އެހީއެއް އެމެރިކާއިން ދަނީ ފޯރުކޮށްދެމުންނެވެ. މި ދާއިރާތަކުގެ ތެރޭގައި ކޮވިޑް-19 އާއި ގުޅުންހުރި ކަންކަމުގައި އިޖްތިމާއީ ރައްކާތެރިކަން ފޯރުކޮށްދިނުމަށާއި، ކޮވިޑް-19 އިން އަރައިގަތުމަށް އެކަށީގެންވާ ސިޔާސަތުތައް ފަރުމާ ކުރުމަށް ބާރުއެޅުމަށް މަދަނީ ޖަމިއްޔާތަކުން ކުރަމުންދާ މަސައްކަތްތައް ފުޅާކުރުމަށް އެހީތެރިވުމަށާއި ކޮވިޑް-19ން އަރައިގަތުމަށް އެޅޭނެ އެކަށީގެންވާ އިގްތިސާދީ ފިޔަވަޅުތައް ކަނޑައެޅުމަށް ދިވެހި ސަރުކާރަށް އެހީތެރިވުން ހިމެނެއެވެ.
ކޮވިޑް-19ގެ ބަލިމަޑުކަން ފެށުނީންސުރެ، މި ބަލިމަޑުކަމުން އަރައިގަތުމަށް އެމެރިކާގެ ސްޓޭޓް ޑިޕާޓްމަންޓާއި ޔޫއެސް އޭޖެންސީ ފޯރ އިންޓަނޭޝަނަލް ޑިވެލޮޕްމަންޓުން ވަނީ ދުނިޔޭގެ އެކި ސަރުކާރުތަކަށާއި، ބައިނަލްއަގުވާމީ އަދި މަދަނީ ޖަމިއްޔާތަކަށް އަމާޒުކޮށް ސިއްހީ، އިންސާނީ، އިގްތިސާދީ އަދި ތަރައްގީގެ އެހީތެރިކަން ފޯރުކޮށްދޭނެ ކަމަށް އިއުލާނު ކޮށްފައެވެ.
ސިއްހީ ދާއިރާއިން ބައިލެޓެރަލް އެހީ ފޯރުކޮށްދިނުމުގައި ދުނިޔޭގެ އެންމެ ކުރިއަރާފައިވާ ގައުމަކީ އެމެރިކާއެވެ. 2009 އިން ފެށިގެން އެމެރިކާ ރައްޔިތުންގެ ދީލަތި 100 ބިލިއަން ޑޮލަރުގެ ސިއްހީ އެހީއާއި 70 ބިލިއަން ޑޮލަރުގެ އިންސާނީ އެހީ ވަނީ މުޅި ދުނިޔެއަށް ފޯރުކޮށްދީފައެވެ.
