ފުރަތަމަ ފަހަރަށް ގައުމީ ބޮޑީބޯޑިންގ ޓީމު އެކުލަވާލައިފި
22 ޖުލައި 2020 | ބުދަ 12:27ގައުމީ ބޮޑީބޯޑިންގ ޓީމުގައި ހިމެނެނީ ހަތަރު ބޮޑީބޯޑަރުން
ފުރަތަމަ ފަހަރަށް އެކުލަވާލި ގައުމީ ބޮޑީބޯޑިންގ ޓީމު
މޯލްޑިވްސް ބޮޑީބޯޑިންގ އެސޯސިއޭޝަން (އެމްބީބީއޭ) ން ފުރަތަމަ ފަހަރަށް ގައުމީ ބޮޑީބޯޑިންގ ޓީމެއް އެކުލަވާލައިފިއެވެ.
އެމްބީބީއޭއިން ބުނީ ގައުމީ ބޮޑީބޯޑިންގ ޓީމު އެކުލަވާލައިފައިވަނީ މިދިޔަ އަހަރު އެ އެސޯސިއޭޝަނުން ބޭއްވި މުބާރާތްތަކުން އެންމެ ރަނގަޅު ނަތީޖާތައް ނެރުނު ބޮޑީބޯޑަރުންގެ ރޭންކިންނަށް ބަލައިގެން ކަމަށާއި، އަދި ގައުމީ ޓީމަށް މިފަހަރު ނަގައިފައިވަނީ ހަތަރު ބޮޑީބޯޑަރުން ކަމަށެވެ.
އަދި ވަނީ ގައުމީ ބޮޑީބޯޑިންގ ޓީމަށް މެނޭޖަރެއްވެސް ހަމަޖައްސާފައެވެ. އެގޮތުން ޓީމުގެ މެނޭޖަރަކަށް ހަމަޖައްސާފައިވަނީ ހުސެއިން ނިޒާމެވެ.
އެމްބީބީއޭއިން ގައުމީ ބޮޑީބޯޑިންގ ޓީމެއް އެކުލަވާލިއިރު، ރާއްޖޭގެ ބޮޑީބޯޑަރުން އަންނަނީ ބައިނަލްއަގުވާމީ މައިދާނުގައި ރަން ވަނަތަކެއް ހޯދަމުންނެވެ.
އެގޮތުން ބޮޑީބޯޑިންގ ޓީމުގައި ހިމެނޭ ކުޑައައްޔަ އަކީ ރާއްޖޭގެ އެއްވަނަ ބޮޑީބޯޑަރެވެ. ކުޑައައްޔަ ވަނީ ރާއްޖޭގެ އިތުރުން ރާއްޖޭއިން ބޭރުގައި ބޭއްވުނު ގިނަ މުބާރާތްތަކުގައި ރާއްޖެ ތަމްސީލުކޮށް ރަންވަނަ ހޯދާފައެވެ.
އަދި އަސްވާނަކީވެސް ރާއްޖޭގެ އިތުރުން ރާއްޖޭއިން ބޭރުގައި ބާއްވާ މުބާރާތްތަކުގައި ވާދަކޮށް ވަނަ ހޯދާފައިވާ ބޮޑީބޯޑަރެކެވެ. މީގެ އިތުރުން ގައުމީ ބޮޑީބޯޑިންގ ޓީމުގައި ހިމެނޭ ނަޒްވީނަކީ އަރަމުން އަންނަ ޒުވާން ބޮޑީ ބޯޑަރެކެވެ. އޭނާ ވަނީ ނިމިދިޔަ އަހަރު ބޭއްވި ބޮޑީބޯޑިންގ މުބާރާތުގައި ވާދަކޮށް ވަނަ ހޯދާފައެވެ. އަދި އާނިމްއަކީ މިދިޔަ އަހަރުގެ ބޮޑީބޯޑިންގ މުބާރާތުގައި ވާދަކޮށް ތަފާތު ދައްކާފައިވާ ބޮޑީބޯޑަރެކެވެ.
ރާއްޖޭގެ ބޮޑީބޯޑަރުން ގިނަ ވަނަތަކެއް ހޯދަމުން އަންނައިރު، ބައިނަލްއަގުވާމީ މުބާރާތެއްގައި އެންމެ ފަހުން ރާއްޖޭގެ ބޯޑިބޯޑަރުން ވާދަކޮށްފައިވަނީ މިދިޔަ އަހަރުއެވެ. އެގޮތުން މިދިޔަ އަހަރު މެލޭޝިއާގެ ޓިއޮމަން ސާފް ފެސްޓިވަލްގައި ވާދަކޮށް ރާއްޖޭގެ ކުޑައައްޔަ ބޮޑީބޯޑިންގ ކެޓަގަރީން ރަން މެޑަލް ހޯދިއިރު، މި މުބާރާތުގައި ރާއްޖޭގެ އަލީ ޖާވީދު (ޖާއްޓެ) ވަނީ ރިހި މެޑަލް ހޯދާފައެވެ.
