ކޮވިޑް-19 ގެ ސަބަބުން ފްރާންސް ފުޓްބޯލް މަޖައްލާއިން ދޭ ބަލޮންޑޯ އެވޯޑް މިއަހަރު ނުދޭ ގޮތަށް ނިންމައިފިއެވެ.

ދުނިޔޭގެ ފުޓްބޯޅައިގެ އެންމެ މޮޅު ކުޅުންތެރިޔާއަށް ދޭ ބަލޮންޑޯ އެވޯޑަކީ 1956 ވަނަ އަހަރުން ފެށިގެން ދެމުން އަންނަ އެވޯޑެކެވެ. ފްރާންސް ފުޓްބޯލް މަޖައްލާއިން ބަލޮންޑޯ އެވޯޑު ދޭއިރު، މީގެ ކުރިން މި އެވޯޑު ދެމުން އައީ ފީފާއާ ގުޅިގެންނެވެ. މި އެވޯޑާ ފީފާއާ ވަކިވި ނަމަވެސް، 2016 ވަނަ އަހަރުން ފެށިގެން ފްރާންސް ފުޓްބޯލް މަޖައްލާއިން އަންނަނީ ގަވާއިދަށް ބަދަލުގެނެސް އެވޯޑު ދެމުންނެވެ.

ފްރާންސް ފުޓްބޯލް މަޖައްލާގެ އެޑިޓަރު ޕަސްކާލް ފޭރާ ވިދާޅުވީ އެކި ގޮތްގޮތުން ވިސްނުމަށް ފަހު ފުޓްބޯޅައަށް މި އައި ބްރޭކުގެ ސަބަބުން މި އަހަރު ބަލޮންޑޯ އެވޯޑް ނުދޭން ނިންމީ ގިނަ މަޝްވަރާތަކަށް ފަހު، މި އެވޯޑާ ގުޅުންހުރި ގިނަ ސްޕޮންސަރުންނާވެސް ވާހަކަ ދެއްކުމަށް ފަހު ކަމަށެވެ.

އެންމެ ފަހުން މިދިޔަ އަހަރު ބަލޮންޑޯ އެވޯޑް ހާސިލްކުރީ ބާސެލޯނާގެ ތަރި ލިއޮނަލް މެސީއެވެ. މިދިޔަ އަހަރުގެ އެވޯޑް މެސީ ހާސިލުކުރިއިރު، މި އެވޯޑް އެންމެ ގިނައިން މިހާތަނަށް ހޯދި ކުޅުންތެރިޔަކީވެސް މެސީއެވެ. މެސީ ހަ ފަހަރަށް ބަލޮންޑޯ އެވޯޑު ހޯދިއިރު، އޭނައާ އެންމެ ވާދަވެރި ޕޯޗުގަލްގެ ތަރި ކްރިސްޓިއާނޯ ރޮނާލްޑޯ ވަނީ މި އެވޯޑު ފަސް ފަހަރު ހޯދާފައެވެ.

މެސީ މި އެވޯޑް ހާސިލުކޮށްފައިވަނީ 2009، 2010، 2011، 2012، 2015 އަދި 2019 ވަނަ އަހަރުއެވެ.

ކޮވިޑް-19 އާ ގުޅިގެން ބަލޮންޑޯ އެވޯޑު މިއަހަރު ނުދޭން ނިންމިއިރު، އަންނަ ސެޕްޓެމްބަރު މަހު ބާއްވަން ނިންމާފައިވާ ފީފާގެ "ދަ ބެސްޓް ފީފާ ފުޓްބޯލް އެވޯޑްސް" ވަނީ ފަސްކޮށްފައެވެ.