ވައިރަހުން ރައްކާތެރިވުމަށް ކުރެވިދާނެ ކަންތައްތަކެއް ހިމެނޭ ވީޑިއޯއެއް ފީފާ އާއި ޑަބްލިއުއެޗްއޯއިން ނެރެފި

ދުނިޔޭގެ އެކި ކަންކޮޅުތަކުގައި މިހާރު ފެތުރެމުންދާ ކޮރޯނާވައިރަސް (ކޮވިޑް-19) އިން ރައްކާތެރިވުމަށް ކުރެވިދާނެ ފަސްކަމެއް ހިމެނޭ ވީޑިއޯއެއް ފީފާ އަދި ވޯލްޑް ހެލްތު އޯގަނައިޒޭޝަން (ޑަބްލިއުއެޗްއޯ) އިން ނެރެފިއެވެ.

ފީފާ އަދި ޑަބްލިއުއެޗްއޯ ގުޅިގެން ނެރުނު ވީޑިއޯގައި މަޝްހޫރު ކޯޗުންނާއި ފީފާގެ ވެރިންނާއި އަދި ކުރީގެ މަޝްހޫރު ފުޓްބޯޅަ ކުޅުންތެރިން ފެނެއެވެ. އޭގެ ތެރޭގައި އާސެނަލްގެ ކުރީގެ ކޯޗު އަދި ފީފާގެ މިހާރުގެ ޓެކްނިކަލް ޑިވެލޮޕްމަންޓްގެ ހެޑް އާސެން ވެންގާ އާއި ޓޮޓެންހަމްގެ ކޯޗު ހޯސޭ މޮރީނިއޯ އާއި ފީފާގެ ރައީސް ޖިއާނީ އިންފަންޓީނޯ ހިމެނެއެވެ.

ޑަބްލިއުއެޗްއޯ އާއި ފީފާ ގުޅިގެން ނެރުނު ވީޑިއޯ މެސެޖުގައި ކޮވިޑުން ރައްކާތެރިވުމަށް އެޅިދާނެ ފަރުދީ ޒިންމާތައް ވަނީ ކިޔައިދީފައެވެ. އޭގެ ތެރޭގައި ގިނަގިނައިން އަތް ދޮވުން، ކެއްސާ ކިނބިހި އަޅާއިރު އުޅަނބޮށިން އަނގަމަތި ނިވާކުރުން ނުވަތަ ޓިޝޫ ބޭނުންކުރާނަމަ ވަގުތުން ޓިޝޫ ޑަސްބިނަށްލުން، މޫނާއި ނޭފަތާއި އަދި އަނގައިގައި އަތް ނުހޭކުން، ކެއްސާ ކިނބިހި އަޅާ މީހަކު ކައިރީގައި ހުންނަނަމަ އެއް މީޓަރު ދުރުގައި ހުރުން އަދި ބަލީގެ އަލާމަތެއް ފެންނަނަމަ ގޭގައި މަޑުކުރުން ހިމެނެއެވެ. މީގެ އިތުރުން މި ވީޑިއޯގައިވަނީ ޑަބްލިއުއެޗްއޯގެ އެންގުންތަކަށް އަމަލުކުރުމަށްވެސް ގޮވާލައިފައެވެ.

ކޮރޯނާވައިރަސް (ކޮވިޑް-19) ގެ ސަބަބުން ދުނިޔޭގެ ފުޓްބޯޅަ ހުއްޓުމަކަށް އައިސަފައިވާއިރު، ޔޫރަޕުގެ ބޮޑު ފަސް ލީގުގެ މެޗުތައް ވަނީ ފަސްކޮށްފައެވެ. އަދި މި ބައްޔަށް ބައެއް ކުޅުންތެރިންނާއި ކޯޗުން ވަނީ ޕޮޒިޓިވްވެފައެވެ. އަދި ޔޫރޯ އާއި ކޮޕާ އެމެރިކާ މުބާރާތްވެސް ވަނީ ފަސްކޮށްފައެވެ.

މިވައިރަސް ޖެހުނު މީހުންގެ އަދަދު މިހާރު 198،737 އަށް އަރައިފައިވާއިރު މި ވައިރަހުގެ ސަބަބުން މަރުވި މީހުންގެ އަދަދު 7،989 އަކަށްވަނީ އަރައިފައެވެ.