ކޮވިޑް-19 އާ ގުޅިގެން ބަންދުކުރި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ބެލުމުގެ ދަށުގައިވާ ދަނޑުތައް އަލުން ހުޅުވާލައިފިއެވެ.
ކޮވިޑް-19 އާ ކުޅިވަރު ކުޅޭ ތަންތައް ބަންދުކުރިއިރު، އެފްއޭއެމުންވެސް ވަނީ އެ އިދާރާގެ ބެލުމުގެ ދަށުގައި ހުރި ދަނޑުތައް ބްނަދުކޮށްފައެވެ. އެފްއޭއެމްގެ ބެލުމުގެ ދަށުގައި އޮންނަނީ މާފަންނު ޓާފް ދެ ދަނޑުގެ އިތުރު މިނި ޓާފް ދަނޑެވެ.
އެފްއޭއެމުން ނެރުނު ބަޔާނެއްގައި ބުނީ ހޯމަ ދުވަހުން ފެށިގެން އެ އިދާރާގެ ބެލުމުގެ ދަށުގައިވާ ދަނޑުތައް، އާންމުންނަށާއި ޓީމުތަކުގެ ފަރިތަކުރުންތަކަށް ހާއްސަ އުސޫލުތަކެއްގެ ދަށުން ހުޅުވާލެވިފައިވާ ކަމަށެވެ.
އެފްއޭއެމްގެ ދަނޑުތައް ހުޅުވާލުމަށް އުސޫލުތަކެއް ކަނޑައެޅިއިރު، ޓީމުތަކުން ފަރިތަކުރުމަށް ހަމަޖައްސާފައިވަނީ ހެނދުނު 6:00 ން 8:00 ށް އަދި ހަވީރު 16:00 އިން 20:00 ށެވެ. އަދި ފަރިތަކުރުންތައް ކުރިއަށްދާއިރު، ކޯޗުންނާއި އޮފިޝަލުންނާއި އަދި ކުޅުންތެރިންނާ ދެމެދު މަދުވެގެން ތިން ފޫޓުގެ ގައިދުރުމިން ބެހެއްޓުމަށްވެސް ވަނީ ކަނޑައަޅާފައެވެ.
އެފްއޭއެމުން ކަނޑައަޅާފައިވާ އުސޫލުތައް:
- ޕްރެކްޓިސްއަށް ދާއިރު މާސްކް އެޅުން. މާސްކް އެޅުމުގައި ކޮވިޑް-19 ވެބްސައިޓުގައިވާ އުސޫލާ އެއްގޮތަށް އަމަލުކުރުން.
- ކޮވިޑް-19 ގެ އަލާމާތެއް (ކެއްސާ ކިނބިހި އެޅުން ހުންއުން) ފަދަ ކަމެއް ހުރިނަމަ ޕްރެކްޓިސްއަށް ނައުން. އަދި އެ ކުޅުންތެރިއެއްގެ ނުވަތަ އެ އޮފިޝަލެއްގެ ގޭގައި އުޅޭ އެއްވެސް މީހެއްގެ ކިބައިން މިފަދަ އަލާމާތެއް ފެނިއްޖެނަމަވެސް، ޕްރެކްޓިސްއަށް ނައުން.
- ޕްރެކްޓިސްއަށް ގެންނަ ދަބަސް ފަދަ ތަކެތި ދުރުދުރުގައި ބެހެއްޓުން.
- ގެއިން ނިކުތުމުގެ ކުރިންނާއި ކުޅެ ނިމުމަށްފަހުގައި ސައިބޯނި ލައިގެން މަދުވެގެން 20 ސިކުންތު ވަންދެން ރަނގަޅަށް އަތްދޮވުން ނުވަތަ އަތުގައި އެއްވެސް އެއްޗެއް ހޭކި ހަޑިވެފައި ނުވާނަމަ ސެނިޓައިޒާ ބޭނުންކޮށްގެން އަތް ސާފުކުރުން.
- ތަންތަނުގައި އަތްލުމަށްފަހު އަތްސާފުނުކޮށް ނޭފަތާއި އަނގަޔާއި ލޮލުގައި އަތްނުލުން.
- ކުޅެ ނިމުމުން ގެއަށް ގޮސް ޖާޒީ ބަދަލުކުރުމާއި އެއެއްޗެހި ދޮވެގެން ނޫނީ އަލުން ބޭނުން ނުކުރުން.
- އެއްވެސް ކުޅުންތެރިއަކު މަގުމައްޗަށް އަދި ގްރައުންޑަށް ކުޅު ނުޖެހުން.
- އަމިއްލަ ފެންފުޅި ބޭނުންކުރުން.
- ސާފުތާހިރުކަމަށް އިސްކަންދިނުމާއި، ކޮންމެ އޮފިޝަލަކުވެސް އަދި ކުޅުންތެރިއަކުވެސް ވަކިން ސެނިޓައިޒާ ގެންގުޅުން.
- ކޮވިޑް-19 އާ ގުޅިގެން އެޗްޕީއޭ ގެ އެންގުންތަކާއި އާންމު ކުރަމުންގެންދާ އުސޫލުތަކާ އެއްގޮތަށް އަމަލުތައް ބެހެއްޓުން.
އެފްއޭއެމުން ދަނޑުތައް ހުޅުވާލިއިރު، މީގެ ކުރިން މި މަހުގެ އެއްވަނަ ދުވަހު ކުޅިވަރާ ބެހޭ ވުޒާރާއިން ވަނީ އެ ވުޒާރާގެ ބެލުމުގެ ދަށުގައިވާ ކުޅިވަރު ކުޅޭ ތަންތަން އަލުން ހުޅުވާލާފައެވެ. އެއާއެކު ގައުމީ ފުޓްބޯޅަ ޓީމުން އަންނަނީ ގައުމީ ފުޓްބޯޅަ ދަނޑުގައި ފަރިތަކުރުންތައް ކުރިއަށް ގެންދަމުންނެވެ.
ކޮވިޑް-19 އާ ގުޅިގެން 2020-2021 ވަނަ އަހަރުގެ ފުޓްބޯޅަ ސީޒަން ފެށުން ލަސްވެފައިވާއިރު، ޑިސެމްބަރު މަހުގެ ތެރޭގައި ފުޓްބޯޅަ ސީޒަން ފަށަން އެފްއޭއެމުން މިހާރު އަންނަނީ މަސައްކަތް ކުރަމުންނެވެ.
