މާޒިޔާ ސްޕޯޓްސް އެންޑްރެކްރިއޭޝަނާއެކު ހަދާފައިވާ އެއްބަސްވުން އިތުރު އެއް އަހަރަށް ތަޖުރިބާކާރު ޑިފެންޑަރު އަޙުމަދު އަބްދުﷲ (ލިލީ) އާކޮށްފިއެވެ.
މިދިޔަ އަހަރުގެ މާޗު މަހު މާޒިޔާއާ ގުޅުނު ލިލީ، އެޓީމުގެ އެއްބަސްވުން ކުރިއަށް އޮތް 2020-2021 ވަނަ އަހަރުގެ ސީޒަނުގެ ނިޔަލަށް އާކޮށްފައިވާކަން އެ ކްލަބުން ވަނީ ހާމަކޮށްފައެވެ.
މިދިޔަ ސީޒަނުގެ މާޒިޔާގެ ފަހަތުގައި މުހިންމު ދައުރެއް އަދާކުރި ލިލީ ވަނީ އެ ކްލަބާއެކު މިދިޔަ ސީޒަނުގެ ދިރާގު ދިވެހި ޕްރިމިއާ ލީގު ކާމިޔާބުކޮށްފައެވެ. އަދި ވަނީ މާޒިޔާއިން މިއަހަރުގެ އޭއެފްސީ ކަޕްގެ ގްރޫޕް ސްޓޭޖުން ޖާގައެއް ހޯދިއިރު، ކޮލިފައިންގ ބުރުގައި މާޒިޔާއިން ކުޅުނު މެޗުތަކުގައިވެސް މޮޅު ކުޅުމެއް ދައްކާފައެވެ.
ޅ. ހިންނަވަރަށް އުފަން ލިލީ އޭނާގެ ކެރިއަރު ފަށާފައިވަނީ 2009 ވަނަ އަހަރު ނިއުރޭޑިއަންޓް ސްޕޯޓްސް ކްލަބުންނެވެ. ނިއުރޭޑިއަންޓް ދޫކޮށް 2016 ވަނަ އަހަރު ޓީސީ ސްޕޯޓްސް ކްލަބާ ގުޅުނު ލިލީ ވަނީ 2017 ވަނަ އަހަރު އަލުން ނިއުރޭޑިއަންޓަށް ބަދަލުވެ، އެޓީމުގައި ދެ އަހަރު ހޭދަކޮށްފައެވެ.
ގައުމީ ޓީމަށްވެސް ގިނަ މެޗުތަކެއް ކުޅެދީފައިވާ ލިލީ ވަނީ ނިއުރޭޑިއަންޓާއެކު ރާއްޖޭގެ ހުރިހާ މުބާރާތެއް ކާމިޔާބު ކޮށްފައެވެ.
މާޒިޔާގެ އެއްބަސްވުން ލިލީ އާކުރިއިރު، ދާދި ފަހުން މާޒިޔާއަށް ކުޅެމުން އަންނަ ސެއިންޓް ވިންސެންޓްގެ ފޯވާޑް ކޯނެލިއަސް ސްޓެވާޓް (ކޯނޭ) ވެސް ވަނީ އަންނަ ސީޒަނުގެ ނިޔަލަށް އެއްބަސްވުން އާކޮށްފައެވެ.
ކޮވިޑް-19 އާ ގުޅިގެން ރާއްޖޭގެ ފުޓްބޯޅަ ސީޒަން ފެށުން ލަސްވެފައިވާއިރު، ޑިސެމްބަރު މަހުގެ ތެރޭގައި ފުޓްބޯޅަ ސީޒަން ފެށުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ން އަންނަނީ މަސައްކަތް ކުރަމުންނެވެ.
