ރާއްޖޭގެ ފުޓްބޯޅަ ސީޒަން ހަތަރު ފަސް އަހަރު އެއްގޮތަކަށް ކުރިއަށް ގެންދަން ޖެހޭ ކަމަށާއި، އެ ނޫން ގޮތަކަށް ދިވެހި ފުޓްބޯޅައަށް ސަޕޯޓަރުންނާއި ސްޕޮންސަރުންގެ އިތުބާރު ހޯދަން ފަސޭހަ ނުވާނެ ކަމަށް މަޝްހޫރު ފުޓްބޯޅަ ކޯޗު އަދި ގައުމީ ޓީމުގެ އެސިސްޓަންޓް ކޯޗު އަލީ ސުޒޭން ބުނެފިއެވެ.
ރާއްޖެޓީވީގެ "ކުޅިވަރު ފައިލް" ޕްރޮގްރާމުގައި ވާހަކަ ދައްކަމުން ސުޒޭން ބުނީ ދެ އަހަރަށް ދެމިގެންދާ ގޮތަށް ފުޓްބޯޅަ ސީޒަން ކުރިއަށް ގެންދިޔަ ފުރަތަމަ އަހަރު އެހާ ކާމިޔާބު ނޫން ކަމަށާއި އެ ގޮތަށް އެކަން ދިމާވީ ރާއްޖެ އާއި މުޅި ދުނިޔެއަށް ކުރިމަތިވި ކޮވިޑް-19ގެ ސަބަބުން ގިނަ ބަދަލުތައް ގެންނަންޖެހުމުން ކަމަށެވެ.
ދިވެހި ފުޓްބޯޅަ ސީޒަނަކީ އެއްމެންނަށް ފަރިތަ ސީޒަނަކަށް ވެގެންދާނީ އެއްގޮތަކަށް ސީޒަން ހިފެހެއްޓިގެން ކަމަށާއި އެހެން ނަމަވެސް މީގެ ކުރިން ފެނިފައިވަނީ އަވަސް އަވަހަށް ބަދަލުވާ ސީޒަންތަކެއް ކަމަށްވެސް ސުޒޭން ވިދާޅުވިއެވެ.
މި ކުރިމަތިވި ކަންތައްތަކާއި އެކު ދިވެހި ފުޓްބޯޅަ ކްލަބުތަކަށް ވަރަށް ބޮޑު ދަތިކަމަކާއި ކުރިތިލާންޖެހޭނެ. ޑިސެމްބަރުގައި ސީޒަން ފެށިއަސް ނޫނީ ޖެނުއަރީގައި ސީޒަން ފެށިއަސް ގެއްލުން ފޫބެއްދުމަށް ކްލަބުތަކުން ކުރިއަށްދާން ޖެހޭނީ އިތުރު ޕްލޭނަކާއެކު. ކުޅުންތެރިންގެ މުސާރަތަކަށްވެސް ބަދަލުތަކެއް ގެންނަން ޖެހޭ. އޭރުން 2021 ވަނަ އަހަރު ރަނގަޅު ސީޒަނެއް ލިބިގެންދާނެ.އަލީ ސުޒޭން
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސްގެ މަގާމަށް ދެވަނަ ދައުރަކަށް އިންތިޚާބުވުމަށްފަހު ކުރިއަށް އޮތް ދައުރުގައި އެންމެ ބޮޑު އިސްކަމެއްދީގެން ކުރާނެ އެއް ކަމަކީ 2023-2024 ވަނަ އަހަރުގެ ދިވެހި ޕްރިމިއާ ލީގު މުޅި ރާއްޖެއަށް ފުޅާކޮށްލައިގެން، ހޯމް އެންޑް އަވޭ އުސޫލުން ކުރިއަށް ގެންދިއުން ކަމަށް ބައްސާމް މީގެ ކުރިން ވަނީ ވިދާޅުވެފައެވެ. ބައްސާމް ވިދާޅުވީ އެ މަސައްކަތްކުރަން އެކުލަވާލާ ޕްލޭނުގައި އެންމެ އިސްކޮށް ހަރަކާތްތެރިވާނީ ސުޒޭނާއި އެފްއޭއެމްގެ ސީނިއާ ނައިބު ރައީސް އަލީ އުމަރު ކަމަށެވެ.
ސުޒޭން ބުނީ މުޅި ރާއްޖޭގައި ތާފތު ހަތަރު ފަސް ދަނޑުތަކެއްގައި މެޗުތައް ކުޅެމުން ދިޔުމަކީ ބައްސާމުގެ ވަރަށް ބޮޑު ހުވަފެނެއް ކަމަށާއި، އެއީ ދިވެހި ފުޓްބޯޅަ އާއިލާގެވެސް ވަރަށް ބޮޑު އުންމީދެއް ކަމަށެވެ.
ފުޓްބޯޅަ ސީޒަން ގައުމީ ފުޓްބޯޅަ ދަނޑު ދޫކޮށް މުޅި ރާއްޖެއަށް ފެތުރިގެންދާނެ ގޮތަކަށް ކުރިއަށް ގެންދިޔުމަށް މިހާރު ފަށާފައިވާ މަސައްކަތަކީ ވަރަށް މުހިންމު މަސައްކަތެއް ކަމަށާއި، އެކަން ކުރިއަށް ގެންދިޔުމަށް މުޅި ރާއްޖެ އާއި ދިވެހި ފުޓްބޯޅައިގެ ހުރިހާ ފަރާތްތަކެއްގެ ލަފާ ހޯދާނެކަން ސުޒޭން ފާހަގަކުރިއެވެ. އަދި އެންމެން އަތުގުޅާލައިގެން މަސައްކަތް ކޮށްފިނަމަ، މިކަން ކާމިޔާބުވާނެ ކަމަށްވެސް ސުޒޭން ބުންޏެވެ.
މީގެ ކުރިން އެފްއޭއެމުން ވަނީ ކޮވިޑް-19ގެ ސަބަބުން 2019-2020 ވަނަ އަހަރުގެ ފުޓްބޯޅަ ސީޒަންގެ ބާކީބައި ކެންސަލް ކޮށްފައެވެ. މި ސީޒަންގެ ބާކީބައި އެފްއޭއެމުން ކެންސަލް ކުރީ އެފްއޭ ކަޕްގެ ކުއާޓާ ފައިނަލް މެޗުތައް ކުޅުމަށްފަހުއެވެ.
އައު ސީޒަން ޖޫން މަހު ފަށަން ކަލަންޑަރުގައި ހިމަނާފައި އޮތް ނަމަވެސް، ކޮވިޑް-19 އާ ގުޅިގެން ސީޒަން ފެށުން ލަސްވާނެއެވެ. ބައްސާމް މީގެ ކުރިން ވިދާޅުވީ ފުޓްބޯޅަ ސީޒަން އަލުން ފަށާނެ ތާރީޚެއް އަދި ކަނޑައަޅާފައި ނުވި ނަމަވެސް، އެފްއޭއެމުން ވިސްނުން ގެންގުޅެނީ ޑިސެމްބަރު މަހު ފުޓްބޯޅަ ސީޒަން އަލުން ފެށުމަށް ކަމަށެވެ.
