ނައިފަރުގެ ނަރުދަމާގެ ނިޒާމު ޤާއިމު ކުރުމުގެ މަސައްކަތް ދެން ކުރާނީ އެމްޑަބްލިއުއެސްސީން
ކޮންޓްރެކްޓު ޓަރމިނޭޓް ކޮށްފައިވަނީ 2020 ވަނަ އަހަރު
ޅ. ނައިފަރު : ނަރުދަމާގެ މަސައްކަތް ނިންމާނީ އެމްޑަބްލިއުއެސްސީން
ޅ. ނައިފަރުގެ ފެނާއި ނަރުދަމާގެ ނިޒާމު ޤާއިމުކުރުމުގެ މަސައްކަތް ދެން ކުރާނީ މާލެ ވޯޓަރ އެންޑް ސްވަރޭޖް ކޮމްޕެނީ ޕްރައިވެޓް ލިމިޓެޑް (އެމްޑަބްލިއުއެސްސީން) ކަމަށް މިނިސްޓަރު އޮފް ޕްލޭނިންގް ހައުންސިންގް އެންޑް އިންފްރާންސްޓްރަކްޗަ މިނިސްޓަރު މުހައްމަދު އަސްލަމް ވިދާޅުވެއްޖެއެވެ.
އަސްލަމް މިގޮތަށް ވިދާޅުވެފައިވަނީ ނައިފަރު ދާއިރާގެ މެމްބަރު، އެ ރަށުގެ ނަރުދަމާގެ ނިޒާމާއި ގުޅިގެން ކުރެއްވި ސުވާލަށް ޖަވާބުދެއްވަމުންނެވެ. މެމްބަރު ކުރެއްވި ސުވާލަކީ ނައިފަރުގެ ފެނާއި ނަރުދަމާގެ ނިޒާމު ޤާއިމުކުރުމުގެ މަސައްކަތް 2017 ގައި ބަޔަކާ ޙަވާލުކުރެވި، އެ މަސައްކަތުގެ %90 ނިމިފައި ވަނިކޮށް އެއް މަސައްކަތްކުރުމަށް ވެފައިވާ އެއްބަސްވުން 23 ޖަނަވަރީ 2020 ގައި އުވާލާ، ރައްޔިތުންނާ ސީދާ ގުޅުން ހުރި މިފަދަ މުހިންމު އަސާސީ ޚިދުމަތެއް ޙައްލެއް ނުހޯއްދަވައި ހުއްޓާ ލެއްވީ ކީއްވެތޯއެވެ. އަދި މި އަހަރު ރަމަޟާން މަހުގެ ކުރިން މި މަސައްކަތް ނިންމާނެކަމަށް ކޮންޓްރެކްޓަރ އަންގާފައިވަނިކޮށް، ރައްޔިތުންގެ ޚިޔާލު ނުހޯއްދަވައި މި މަސައްކަތް ހުއްޓާލެއްވީ ކީއްވެތޯއެވެ.
މި ސުވާލުތަކަށް ޖަވާބުދެއްވަމުން މިނިސްޓަރ ވިދާޅުވެފައިވަނީ ނައިފަރުގެ ފެނާއި ނަރުދަމާގެ މަސައްކަތް ކުރުމަށް އިންޑިއާގެ ލަކީ އެކްސްޕޯޓު ކުންފުންޏާއި ހަވާލުކޮށްފައިވަނީ 2017 ވަނަ އަހަރުގެ ޖޫން މަހުގެ 17 ވަނަ ދުވަހު، 550 ދުވަހުގެ ތެރޭގައި ނިންމާގޮތަށެވެ. 2019 ވަނަ އަހަރުގެ ޖެނުއަރީ މަހުގެ 3 ވަނަ ދުވަހަށް މި މަސައްކަތް ނިންމަން ޖެހޭކަމަށް ކޮންޓްރެކްޓުގައި އޮތް ނަމަވެސް، މަސައްކަތްތައް ލަސްވުމުގެ ސަބަބުން ތިން ފަހަރެއްގެ މަތިން ކޮންޓްރެކްޓަރަށް މުއްދަތު އިތުރުކޮށްދީފައިވާ ކަމަށެވެ.
މިނިސްޓަރ ވިދާޅުވީ ކޮންޓްރެކްޓު އުވާލާނެ ކަމުގެ އިންޒާރު 2019 ވަނަ އަހަރު ކޮންޓްރެކްޓަރަށް ދީފައިވާނެ ކަމަށާއި އެހެންނަމަވެސް މަސައްކަަތަށް އެއްވެސް ކުރިއެރުމެއް ލިބިފައިނުވާ ކަމަށެވެ. އެހެންކަމުން ކޮންޓްރެކްޓުގައިވާ އުސޫލުން ކޮންޓްރެކްޓު ޓަރމިނޭޓް ކޮށްފައިވަނީ 2020 ވަނަ އަހަރު، އެޓަރނީ ޖެނެރަލްގެ ވެސް ލަފާ ހޯދުމަށް ފަހު ކަމަށް ވެސް އަސްލަމް ވިދާޅުވިއެވެ.
ނައިފަރުގެ ނަރުދަމާގެ ނިޒާމު ގާއިމުކުރަނީ އައިޑީބީ އަދި އޮފިޑުގެ އެހީގެ ދަށުން ކަން ފާހަގަކުރައްވާ މިނިސްޓަރ ވިދާޅުވީ އެ ފަރާތްތަކާއި ވެސް މަޝްވަރާކޮށް، މި މަސައްކަތް ކުރިއަށް ގެންދިއުމަށް ހަމަޖެހިފައިވާ ކަމަށެވެ. އަދި އެރަށުގެ ނަރުދަމާގެ މަސައްކަތް ނިންމުމަށް ހަމަޖެހިފައިވަނީ އެމްޑަބްލިއުއެސްސީ އާއިި ހަވާލުކޮށްގެން ކަމަށާއި އެ ކުންފުނިން ޖުލައި މަހުގެ 9 ވަނަ ދުވަހު ޕްރޮޕޯސަލް އެއް ހުށަހަޅާފައިވާކަމަށެވެ. މަޝްވަރާ ކުރަންޖެހޭ ބައެއް ކަންތައްތައް ޕްރޮޕޯސަލްގައި ހުރި ނަމަވެސް މި މަސައްކަތް އަލުން ފަށާނެ ކަމަށް ވަނީ ވިދާޅުވެފައެވެ.
