އެއްވުންތައް ބޭއްވޭނީ ކާނިވާ ސަރަހައްދުގައި: ހޯމް މިނިސްޓްރީ
މީގެ ކުރިން ވެސް އެއްވުންތައް ބޭއްވެނީ އެ ސަރަހައްދުގައި އެކަނި
ވޮއިސް އޮފް ޗިލްޑްރެން (ވީއޯސީ) އިން ރޭޕް އާ ދެކޮޅަށް ބޭއްވި މުޒާހަރާއެއްގެ ތެރެއިން
ދިވެހިރާއްޖޭގެ ވެރިކަން ކުރާ ރަށް މާލެސިޓީގައި އެއްވެސް ބާވަތެއްގެ އެއްވުންތައް ބޭއްވޭނީ ހެންވޭރު ކާނިވާ ސަރަހައްދުގައި އެކަނި ކަމަށް ބުނެ އެކަން ރައްޔިތުންގެ ސަމާލު ކަމަށް ހޯމް މިނިސްޓްރީން ގެނެސްފިއެވެ.
ހޯމް މިނިސްޓްރީން އަންގާރަ ދުވަހު ނެރުނު އިއުލާނެއްގައި ބުނީ "ސުލްހަވެރިކަމާ އެކު އެއްވެއުޅުމާ ބެހޭ" ގާނޫނުގެ 24 ވަނަ މާއްދާގެ ޅ ގެ ދަށުން، އުޅަނދު ބުރުތަކާއި އެއްވުންތައް އަދި ހިނގާލުންތައް މާލޭގައި ބޭއްވޭނީ ހަމައެކަނި ކާނިވާ ސަރަހައްދުގައި ކަމަށެވެ.
ފުލުހުން ލިޔުމުން ދޭ ހުއްދަ ފިޔަވާ މާލޭގައި އެއްވުންތައް ބޭއްވޭނީ ކާނިވާ ސަރަހައްދުގައި އެކަނި ކަމަށް ކަނޑައަޅާފައިވަނީ ކުރީގެ ރައީސުލްޖުމްހޫރިއްޔާ އަބްދުﷲ ޔާމީން އަބްދުލްޤައްޔޫމްގެ ވެރިކަމުގައި އެއްވެ އުޅުމާ ބެހޭ ގާނޫނަށް ރައްޔިތުންގެ މަޖިލީހުން ގެނައި އިސްލާހުގެ ދަށުންނެވެ. މިއީ އޭރު ޕީޕީއެމްގެ މަޖިލިސް މެންބަރު އަބްދުﷲ ރިފާއު ހުށަހެޅުއްވި އިސްލާހެކެވެ. އެ އިސްލާހު ފާސްވީ ޔާމީން ސަރުކާރަށް ތާއީދު ކުރި މެންބަރުންގެ ބޮޑު އަގުލަބިއްޔަތަކުންނެވެ.
އޭރުގެ އިދިކޮޅު އެމްޑީޕީން ވަނީ މިކަމާއި ވަރަށް ބޮޑަށް ދެކޮޅު ހަދާފައެވެ. އަދި އެ ބިލަށް އޭރު ދެކޮޅު ހަދާ އެމްޑީޕީއަށް ތާއިދުކުރާ މެމްބަރުން ވިދާޅުވެފައިވަނީ އެއްވެ އުޅުމުގެ ހައްގަކީ ދައުލަތުގެ ހުއްދަ ނެތި ވެސް ގާނޫނު އަސާސީ އިން ލިބިދީފައިވާ ހައްގަކަށްވާއިރު އެ އިސްލާހު ގާނޫނު އަސާސީއާ ހިލާފު ކަމަށެވެ.
މާލޭގައި މިފަހަކަށް އައިސް ބާއްވާ އެއްވުންތައް ގިނައެވެ. އެގޮތުން އަންހެނުންނާއި އަންހެން ކުދިންނަށް ކުރިމަތިވާ ޖިންސީ ގޯނާއާއި ފުރައްސާރައާ ދެކޮޅަށް އަމިއްލަ ޖަމިއްޔާތަކުން އަންނަނީ އެއްވުންތައް ބާއްވާ މިފަދަ މައްސަލަތަކުގައި އިންސާފު ޤާއިމުކޮށްދިނުމަށް ގޮވާލަމުންނެވެ. އަދި މިގޮތުން ހުށަހެޅޭ ގިނަ މައްސަލަތައް އެތައް ދުވަހެއްވަންދެން ދިގުލައިގެން ގޮސް، އެ ކުށްކުރާ މީހަކު މުޖުތަމައަށް ދޫވެފައި ހުރުމަކީ ވެސް އެ ޖަމިއްޔާތަކުން ނުހަނު ކަންބޮޑުވާ ކަމެކެވެ.
ރާއްޖޭގައި އިސްލާމީ ޝަރީއަތް ތަންފީޒު ނުވާހާ ހިނދަކު މިފަދަ އިޖްތިމާއީ މައްސަލަތަކަށް ހައްލެއް ލިބިގެން ނުދާނެ ކަމަށް ގިނަ ފަރާތްތަކުން ޤަބޫލު ކުރެއެވެ.
