ސްޓޫޑެންޓް- ޓީޗަރ ރޭޝިއޯއެއް ތައުލީމީ ބިލުގައި ހިމެނުމަށް ފަސްޓްލޭޑީގެ ޙިޔާލުފުޅެއް!

ތައުލީމާބެހޭ ބިލު ޤާނޫނަކަށް ވެގެން އަންނައިރު، ސްޓޫޑެންޓް- ޓީޗަރ ރޭޝިއޯއެއް (ޓީޗަރަކަށް ޙަވާލު ކުރެވޭނެ ދަރިވަރުންގެ ވަކި އަދަދެއް) ހިމެނުމަށް ފަސްޓްލޭޑީ ފަޒްނާ އަޙުމަދު ހިޔާލު ހުށައަޅުއްވައިފިއެވެ.

ތައުލީމުގެ ބިލަށް އާންމުންގެ ޚިޔާލު ހޯދުމަށް އާދިއްތަ ދުވަހުގެ ރޭ މަޖިލިސް އިދާރާގައި ބޭއްވި ބައްދަލުވުމުގައި ޙިޔާލު ހުށައަޅުއްވަމުން ފަޒްނާ ވިދާޅުވީ، ތައުލީމީ ދާއިރާގައި ގިނަ ދުވަސްތަކެއް ހޭދަކުރައްވާފައިވާ ކަމަށާއި، މިއީ އެކަމަނާއާ ވަރަށް ގާތް ދާއިރާއެއް ކަމަށެވެ.

އޭގެ އިތުރުން، ސްޓޫޑެންޓް-ޓީޗަރ ރޭޝިއޯއެއްގެ މުހިއްމުކަން ފާހަގަ ކުރައްވައި ފަޒްނާ ވިދާޅުވީ، ބައެއް ފަހަރު ސްކޫލަށް ކުދިން ވައްދަން އެދުމުން ޖާގަ ނެތް ކަމަށް ބުނާ ކަމަށެވެ. އަދި އެކަން ޙައްލު ކުރުމަށް އެފަދަ ރޭޝިއޯއެއް ޤާއިމުކޮށް، ރޭޝިއޯގައި ވާ އަދަދު ފުރިހަމަ ވުމުން އެހެން ކްލާހެއްގައި ދަރިވަރުންނަށް ބައިވެރިވެވިދާނެ ގޮތް ހެދިދާނެ ކަމަށެވެ.

މެޑަމް ފަޒްނާ ހުށައެޅުއްވި ޙިޔާލަކީ ތައުލީމީ ބިލުގެ ކޮލިޓީ ހިފެހެއްޓުމަށް ބިލުގައި ހިމަނަން ޖެހޭ ޕޮއިންޓެއްގެ ގޮތުގައި އެޑިއުކޭޝަން މިނިސްޓްރީގެ ސްޓޭޓް މިނިސްޓަރު ޑރ. އަބްދުﷲ ރަޝީދު ވެސް ފާހަގަ ކުރެއްވިއެވެ. އަދި ތައުލީމީ ބިލުގައި އެފަދަ ޕޮއިންޓެއް ހިމެނުމަށް މިނިސްޓްރީން ވަނީ ތާއީދު ކުރައްވާފައެވެ.

މި ބައްދަލުވުމުގައި ޕެނަލިސްޓުންގެ ގޮތުގައި ބައިވެރިވެ ވަޑައިގެންފައިވަނީ ބިލް ހުށަހެޅުއްވި ފުވައްމުލަކު ދެކުނު ދާއިރާގެ މެމްބަރު މުޙައްމަދު މުމްތާޒް އާއި، ބާރަށު ދާއިރާގެ މެމްބަރ އަހުމަދު އަބްދުﷲ އެވެ. އަދި މިނިސްޓަރ އޮފް ސްޓޭޓް ފޯރ އެޑިޔުކޭޝަން ޑރ އަބްދުﷲ ރަޝީދު އަހުމަދު އާއި އެމްއެންޔޫގެ ލެކްޗަރަރ ލީލާ އަހުމަދުގެ އިތުރުން އިބްރާހީމް އިސްމާއީލް (އިބްރާ) ވެސް މި ބައްދަލުވުމުގައި ޕެނަލިސްޓުންގެ ގޮތުގައި ބައިވެރިވެ ވަޑައިގެންފައިވެއެވެ.

ތައުލީމުގެ ބިލުގައިވާ ގޮތުން އުމުރުން ހަތަރު އަހަރުން ފެށިގެން 16 އަހަރާ ދެމެދުގެ ކޮންމެ ކުއްޖަކީ ތައުލީމު ލާޒިމުވާ އުމުރުގެ ކުއްޖެކެވެ. ބިލުގައި ޕްރީ ސްކޫލް ތައުލީމާއި ސާނަވީ ތައުލީމާއި މަތީ ސާނަވީ ތައުލީމު ހިލޭ ކޮށްދިނުމުގެ އުސޫލުތައް ބަޔާން ކޮށްފައިވެއެވެ. އަދި ދަރިވަރުންގެ ހައްގުތަކާއި ބެލެނިވެރިންނާއި ޓީޗަރުންނާއި ސަރުކާރުގެ ޒިންމާތައް ވެސް އެ ބިލުގައި ބަޔާންކޮށްފައިވެއެވެ.