ޓޮޓެންހަމްގެ ޑިފެންޑަރު ސާޖް އޯރިއޭގެ ކޮއްކޮ މަރާލައިފި
ކްރިސްޓޮފާ މަރާލާފައިވަނީ ޓުލޫސް ސިޓީގެ ނައިޓް ކްލަބެއްގެ ބޭރުގައި
ޓޮޓެންހަމް ހޮޓްސްޕާގެ ޑިފެންޑަރު ސާޖް އޯރިއޭ: ފްރާންސްގެ ޓުލޫސްގައި އޯރިއޭގެ ކޮއްކޮ ވަނީ މަރާލާފައި
ޓޮޓެންހަމް ހޮޓްސްޕާގެ ފަހަތަށް ކުޅެމުން އަންނަ ސާޖް އޯރިއޭގެ ކޮއްކޮއަށް ބަޑިން ހަމަލާދީ މަރާލައިފިއެވެ.
ސާޖް އޯރިއޭގެ ކޮއްކޮ ކްރިސްޓޮފާ އޯރިއޭ މަރާލާފައިވަނީ ފްރާންސްގެ ސިޓީއެއް ކަމުގައިވާ ޓުލޫސްގައި ހުރި ނައިޓް ކްލަބުގެ ބޭރުގައި ހިނގި ހަމަނުޖެހުމެއްގައި ބަޑިން ހަމަލާ ދިނުމަށްފަހުއެވެ.
ރިޕޯޓުތައް ބުނާ ގޮތުން އޭނާއަށް ހަމަލާދިން މީހާ ވަނީ ފިލާފައެވެ.
ޓޮޓެންހެމުން ނެރުނު ބަޔާނެއްގައި ބުނެފައިވަނީ މި ހިތާމަވެރި ދަނޑިވަޅުގައި ކްލަބާއި ކްލަބުގެ ކުޅުންތެރިން ތިބީ ސާޖް އޯރިއޭ އާއި އެކުގައި ކަމަށާއި އަދި އޯރިއޭ ބޭނުންވާ ވަގުތު އޭނާއަށް ދިނުމަށް ކްލަބުން ނިންމާފައިވާ ކަމަށެވެ.
ސާޖް އޯރިއޭގެ ކޮއްކޮ ކްރިސްޓޮފާ އަކީ ފްރާންސްގެ ފަސްވަނަ ޑިވިޝަނުގެ ކްލަބެއް ކަމަށްވާ އާރުސީ ލެންސްއަށް ކުޅެމުން އަންނަ ކުޅުންތެރިއެކެވެ. މީގެ އިތުރުން ކްރިސްޓޮފާ ވަނީ އައިވަރީ ކޯސްޓްގެ ޒުވާން ގައުމީ ފުޓްބޯޅަ ޓީމަށް ވެސް ކުޅެދީފައެވެ.
