ސަޢޫދީ ޢަރަބިއްޔާއަށް ދިން ޙަމަލާތައް ދިވެހިރާއްޖެއިން ކުށްވެރިކޮށްފި
13 ޖުލައި 2020 | ހޯމަ 08:41ހަމަނުޖެހުންތަކަށް ހައްލެއް ގެނައުމަށް ހުރިހާ ފަރާތްތަކުން މަޝްވަރާކުރުން މުހިއްމުކަމަށް ފާހަގަކޮށްފައިވޭ
މި 2 ދުވަހު ހޫތީ ހަނގުރާމަވެރިން ސައުދީއަށް ފޮނުވި ހަމަލާތަކުގައި ބޭނުންކުރި މިސައިލެއް
ސަޢޫދީ ޢަރަބިއްޔާއަށް އަމާޒުކޮށްގެން އިއްޔެ ދިން ބެލެސްޓިކް މިސައިލް އަދި ޑްރޯން ޙަމަލާ ދިވެހި ސަރުކާރުން ހަރުކަށި އިބާރާތުން ކުށްވެރިކޮށްފިއެވެ.
މެދުކެނޑުމެއް ނެތި މިގޮތަށް ދޭ ޙަމަލާތަކަކީ އެސަރަހައްދުގެ ހަމަޖެހުމަށް އޮތް ނުރައްކަލެއްކަމަށާއި، ހަމަނުޖެހުންތަކަށް ހައްލެއް ގެނައުމަށް ހުރިހާ ފަރާތްތަކުން މަޝްވަރާކުރުން މުހިއްމުކަމަށް ދިވެހިރާއްޖެއިން ފާހަގަކޮށްފައިވެއެވެ.
މި ފުރުސަތުގައި ދިވެހިރާއްޖެއިން އަބަދުވެސް ސަޢޫދީ ޢަރަބިއްޔާއާއެކު ވާކަމާއި، ޓެރަރިޒަމާ ދެކޮޅަށް ކުރެވޭ ބައިނަލްއަޤްވާމީ މަސައްކަތުގައި ފަހަތަށް ނުޖެހި އަބަދުވެސް ދެމިއޮންނާނެކަމުގެ ޔަޤީންކަން ދިވެހިރާއްޖެއިން ވަނީ އަރުވާފައެވެ.
ސައުދީން ބުނެފައިވަނީ އާދީއްތަ އަދި ހޯމަ ދުވަހު މިސައިލް ހަމަލާ ދީފައިވާ ކަމަށެވެ. ހަތަރު މިސައިލާ 7 ޑްރޯންއިން ހަމަލާ ދީފައިވަނީ ޔަމަނުގައި ތިބި އީރާނުން ވާގިވެރިވާ ހޫތީ ހަނގުރާމަވެރިން ކަމަށް ސައުދީން ވަނީ ބުނެފައެވެ.
