ރޭޕްއާ ދެކޮޅަށް މިއަދު ވެސް އަޑުއުފުލައިފި
މުޒާހަރާ ފެށީ މެންދުރު
މުޒާހަރާގެ ތެރެއިން
ރާއްޖޭގައި މި ފަހަކަށް އައިސް ރޭޕްގެ މައްސަލަތައް ގިނަވާތީވެ، އެކަމާއި ދެކޮޅަށް މާލޭގައި އަނެއްކާވެސް އަޑު އުފުލައިފިއެވެ.
ދާދި ފަހުން ވުޖޫދަށް އައި ވޮއިސް އޮފް ޗިލްޑްރެން (ވީއޯސީ) އިން އިންތިޒާމު ކޮށްގެން ބޭއްވި މުޒާހަރާ ފެށީ ހޮޓެލް ޖެން ސަރަހައްދުންނެވެ.
މެންދުރު 01:30 ގައި ފެށި މުޒާހަރާ ނިންމާލާފައިވަނީ ވެލާނާގެ ކުރިމަތިންނެވެ. މުޒާހަރާގެ ބައިވެރިންނަށް ހުރަސް ނާޅާ ފުލުހުން ވަނީ އެ މީހުންނަށް މުޒާހަރާ ކުރުމުގެ ފުރުސަތު ދީފައެވެ.
މުޒާހަރާގެ ބައިވެރިން މައިގަނޑު ގޮތެއްގައި ގޮވާލާފައިވަނީ ޖިންސީ ގޯނާ އާއި ޖިންސީ ފުރައްސާރައާ ދެކޮޅަށް ހުށަހެޅޭ މައްސަލަތައް ތަހުޤީޤު ނުކުރެވި ލަސްވާތީއެވެ. މިފަދަ މައްސަލަތަކުގައި އިންސާފު ލިބުން ލަސްވެ، ކުށްކުރާ މީހުން މުޖުތަމައުއަށް ދޫވެފައި ހުރުމަކީ ނުހަނު ކަންބޮޑުވާކަމެއް ކަމަށް ބުނެ މުޒާހަރާގެ ބައިވެރިން ވަނީ އަޑު އުފުލާފައެވެ.
ރޭޕްގެ މައްސަލަ ތަކުގައި ހައްޔަރު ކުރާ މީހުންނަށް އެންމެ އެކަށީގެންވާ އަދަބު ނުލިބުމަކީ ގިނަ ބައެއްގެ ހުރި ކަންބޮޑުވުމެކެވެ. ދޭތެރޭ ދޭތެރެއިން މައްސަލަތައް ހޫނުވެ ރައްޔިތުން ރުޅިގަދަވާ ހިސާބަށް ދިޔުމުން ފިޔަވަޅު އެޅުމަށް ފަހު އަނެއްކާ ވެސް، އެކަމަށް މާ ބޮޑު ސަމާލުކަމެއް އެއްވެސް މުއައްސަސާއަކުން ދޭ ތަނެއް ނުފެންނަ ކަމަށް ބުނެ ރައްޔިތުންނާއި ކަމާބެހޭ ޖަމިއްޔާތަކުން އަންނަނީ ކަންބޮޑުވުން ފާޅުކުރަމުންނެވެ.
