މާސްކް އަޅަން މަޖުބޫރު ކުރަން އަދި ނުވިސްނަން: އެޗްއީއޯސީ
10 ޖުލައި 2020 | ހުކުރު 08:18މާސްކު އަޅަން މަޖުބޫރު ކުރަން ޖެހިއްޖެ ނަމަ އެކަން ކުރާނީ މަޝްވަރާއަށްފަހު
އެޗްއީއޯސީގެ ތަރުޖަމާނު ޑރ. ފާތިމަތު ނަޒްލަ ރަފީގް؛ މާސްކް އަޅަން މަޖުބޫރު ނުކުރަނީ ވަކި ކަންތަކަށް ބެލުމަށްފަހުގައި ކަމަށް ނަޒްލަ ވިދާޅުވި
ރާއްޖޭގައި މާސްކް އަޅަން މަޖުބޫރު ކުރުމުގެ ވިސްނުމެއް އަދި ނުގެންގުޅުއްވާ ކަމަށް ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ) އިން ހާމަކޮށްފިއެވެ.
ބުރާސްފަތި ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެޗްއީއޯސީގެ ތަރުޖަމާނު ޑރ. ނަޒްލާ ރަފީގު ވިދާޅުވީ ބައެއް ކަންތައްތައް މަޖުބޫރު ކުރާ އިރު އެކަމުގައި ވިސްނަން ޖެހޭ ވަރަށް ބައިވަރު ކަންތައްތަކެއް ހުންނަ ކަމަށެވެ. އަދި މާސްކް މަޖުބޫރު ކުރުމުން މާސްކް ނާޅާ އެންމެން ހޯދޭނެތޯ އަދި އެމީހުންނާ ދޭތެރޭގައި ފިޔަވަޅުތައް އެޅިދާނެތޯ އެއީ އުފައްދަން ޖެހޭ ސުވާލެއް ކަމަށް ނަޒްލާ ވިދާޅުވިއެވެ.
ނަޒްލާ ވިދާޅުވީ މިހާރު ވެސް މާސްކް ނާޅާ ނުވަދެވޭނެ ވަރަށް ގިނަ ތަންތަން ހުންނާނެ ކަމަށާއި، އޭގެ ތެރޭގައި ބަންދު ކުރެވިފައި ހުރި އެއްވެސް ތަނަކަށް ވަންނަ އިރު މާސްކް އަޅަން މަޖުބޫރުވާނެ ކަމަށެވެ.
ނަޒްލާ ވިދާޅުވީ އެންމެން ވެސް މިކަމުގެ މުހިންމުކަން ދަނެގެން އެންމެން ވެސް އެ ފިޔަވަޅުތައް އެޅުން މުހިންމު ކަމަށާއި، މަސައްކަތް ކުރައްވަމުން ގެންދަވަނީ އެންމެންގެ ވެސް ރައްކާތެރި ކަމަށް ކަމަށެވެ. އަދި މިވަގުތަކު މާސްކު އެޅުން މަޖުބޫރު ކުރުމުގެ ވިސްނުމެއް ނެތް ކަމަށާއި، ކުރިއަށް އޮތްތާގައި އެކަން އެހެން ނުވެދާނޭ ނުދަންނަވާނެ ކަމަށް ނަޒްލާ ވިދާޅުވިއެވެ.
އަދި ދުނިޔޭގެ އެހެން ތަންތަނުގެ ތަޖުރިބާއަށް ބަލާ ރާއްޖޭގެ ކަންތައްތައް ވެސް ކުރިއަށްދާ ގޮތަށް ބަލާފައި އެޗްއީއޯސީގެ ޑިސްކަޝަންސްތައް ވެސް ކުރިއަށްދާނެ ކަމަށާއި، ނަމަވެސް މިވަގުތު މާސްކު އެޅުން މަޖުބޫރު ކުރަން ވިސްނާފައި ނެތް ކަމަށެވެ.
