ގަދަ ހަތަރެއްގެ ޖާގަ ހޯދުމުގެ ރޭހުގައި ޔުނައިޓެޑް ކުރިއަށް

އިނގިރޭސި ޕްރިމިއާ ލީގުގައި ބުރާސްފަތި ދުވަހުގެރޭ އެސްޓަން ވިލާ ބަލިކޮށް ގަދަ ހަތަރެއްގެ ޖާގަ ހޯދުމުގެ ރޭހުގައި މެންޗެސްޓާ ޔުނައިޓެޑް ކުރިއަށް ޖެހިލައިފިއެވެ.

ލީގުގައި ބުރާސްފަތި ދުވަހުގެރޭ ރަށުން ބޭރުގައި ކުޅުނު މި މެޗުން ޔުނައިޓެޑް މޮޅުވީ 3-0 ންނެވެ.

މި މެޗުގައި ޔުނައިޓެޑުން ލީޑު ނެގީ މެޗުގެ 27 ވަނަ މިނެޓުގައެވެ. ލިބުނު ޕެނަލްޓީއަކުން މި ލަނޑު އެޓީމަށް ކާމިޔާބުކޮށްދިނީ ބްރޫނޯ ފެނާންޑޭސްއެވެ. އެކަމަކު މި ޕެނަލްޓީ ދޭން ނުޖެހޭ ކަމަށް ބުނެ އެސްޓަން ވިލާ ކުޅުންތެރިން ވަނީ ވަރަށް ބޮޑަށް އެޕީލް ކޮށްފައެވެ. މިއީ މި ސީޒަނުގައި ޔުނައިޓެޑަށް ލީގުގައި ދިން 13 ވަނަ ޕެނަލްޓީއެވެ.

މި މެޗުގެ ފުރަތަމަ ހާފު ނިމުމުގެ ކުރިން ޔުނައިޓެޑުން ވަނީ އެޓީމުގެ ލީޑު ފުޅާކޮށްފައެވެ. ފުރަތަމަ ހާފުގެ އިތުރު ވަގުތުގައި މި ލަނޑު ޔުނައިޓެޑަށް ކާމިޔާބުކޮށްދިނީ ޒުވާން ފޯވާޑް މޭސަން ގްރީންވުޑްއެވެ. މި މެޗުގައި ޔުނައިޓެޑުން ކާމިޔާބުކުރި ތިންވަނަ ލަނޑު މެޗުގެ 58 ވަނަ މިނެޓުގައި ކާމިޔާބުކޮށްދިނީ ޕައުލް ޕޮގްބާއެވެ.

މި މޮޅާއެކު ތާވަލުގެ ފަސްވަނައިގައި އޮތް ޔުނައިޓެޑް ވަނީ ހަތަރުވަނައިގައި އޮތް ލެސްޓާ ސިޓީއާ އެއް ޕޮއިންޓު ގާތަށް ޖެހިލާފައެވެ. ލެސްޓާއަށް 34 މެޗުން 59 ޕޮއިންޓު ލިބިފައިވާއިރު، ޔުނައިޓެޑަށް ވަނީ 34 މެޗުން 58 ޕޮއިންޓު ލިބިފައެވެ.

މީގެ އިތުރުން ލީގުގައި ބުރާސްފަތި ދުވަހުގެރޭ ކުޅުނު އަނެއް ދެ މެޗަށް ބަލާއިރ، ބޯންމަތާއި ޓޮޓެންހަމް ހޮޓްސްޕާ ވަނީ ލަނޑެއް ނުޖެހި އެއްވަރުވެފައެވެ. އަދި އެވަޓަން އާއި ސައުތެމްޓަން ކުޅުނު މެޗު ނިމުނީ 1-1 ން އެއްވަރުވެގެންނެވެ.