ޓޫރިޒަމް މިނިސްޓްރީގެ ސީނިއާ ޕޮލިސީ ޑިރެކްޓަރުވެސް މަގާމުން ވަކިކޮށްފި
9 ޖުލައި 2020 | ބުރާސްފަތި 12:09ހައްސާން މަގާމުން ވަކިކޮށްފައިވަނީ، މިނިސްޓަރަކަށް ހުންނެވި އަލީ ވަހީދު ވަކިކުރުމަށް ފަހު
ސީނިއާ ޕޮލިސީ ޑިރެކްޓަރ މުހައްމަދު ހައްސާން
ޓޫރިޒަމް މިނިސްޓްރީގެ ސީނިއާ ޕޮލިސީ ޑިރެކްޓަރ މުހައްމަދު ހައްސާން މަގާމުން ވަކިކޮށްފިއެވެ.
އޭނާ މަގާމުން ވަކިކޮށްފައިވާކަން ރައީސް އޮފީހުން ވަނީ ކަށަވަރު ކޮށްދީފައެވެ. ހައްސާން ވަކިކުރި ސީދާ ސަބަބެއް ރައީސް އޮފީހުން ހާމައެއް ނުކުރެއެވެ.
ހައްސާން މަގާމުން ވަކިކޮށްފައިވަނީ، މުވައްޒަފުންތަކަކަށް ޖިންސީ ގޯނާކުރި ކަމުގެ ސީރިއަސް މައްސަލަތަކެއް ފެންމަތިވެ، ޓޫރިޒަމް މިނިސްޓަރު ކަމުގެ މަގާމުން އަލީ ވަހީދު ވަކިކޮށްފައި ވަނިކޮށެވެ.
އަލީ ވަހީދުއަށް ކުރެވޭ ތުހުމަތުތަކުގެ ތެރޭގައި މިނިސްޓްރީގެ މުވައްޒަފުންނަށް ޖިންސީ ފުރައްސާރަކުރުމާއި ގޯނާކުރުން ހިމެނެއެވެ. މަގާމުން އިސްތިއުފާ ދެއްވުމަށް އަލީ ވަހީދަށް ރައީސް އެންގެވީ، އަނިޔާކުރި ކަމަށް ތުހުމަތުކުރާ މުވައްޒަފުންނަށް ކުރި ޖިންސީ ގޯނާގެ ވާހަކަތައް އެ މުވައްޒަފުން ރައީސްއާ ބައްދަލުކޮށް ހިއްސާކުރުމުންނެވެ.
ބުރާސްފަތި ދުވަހު ހެނދުނާ ހަމަޔަށް ވެސް އަލީ ވަހީދު އިސްތިއުފާ ދެއްވާފައިނުވާތީ، ރައީސް ވަނީ އޭނާ މަގާމުން ވަނީ ވަކިކޮށްފައެވެ. މިއީ ރާއްޖޭގެ ދިމުގްރާތީ ތާރީހުގައި، ޖިންސީ ގޯނާގެ މައްސަލައަކާއި ގުޅިގެން ވަޒީރަކު މަގާމުން ވަކިކުރެވުނު ފުރަތަމަ ފަހަރެވެ.
އަލީ ވަހީދު މަގާމުން ވަކިކުރުމާއި ގުޅިގެން، ވަގުތީ ގޮތުން ޓޫރިޒަމް މިނިސްޓްރީ ހިންގުމަށް އިކޮނޮމިކް މިނިސްޓަރު ފައްޔާޒް އިސްމާއިލްއާ ވަނީ ހަވާލުކޮށްފައެވެ.
