ކޮވިޑް-19 ވައިގެ ޒަރިއްޔާ އިން ފެތުރޭކަމުގެ ހެކި އެބަހުރި، ސަމާލުވޭ: ޑަބްލިއުއެޗްއޯ
8 ޖުލައި 2020 | ބުދަ 08:14މީގެކުރިން ޑަބްލިއުއެޗްއޯ އިން ބުނެފައިވަނީ މި ބަލި ފެތުރެނީ ޑްރޮޕްލެޓްތަކުގެ ޒަރިއްޔާއިން ކަމަށް
ޑަބްލިއުއެޗްއޯގެ ޑިރެކްޓަރ ޖެނެރަލް ޓެޑްރޯސް އެދްނޯމް
މިހާރު މުޅި ދުނިޔޭގައިވެސް ފެތުރެމުންދާ ކޮވިޑް-19 ވައިގެ ޒަރިއްޔާއިން ފެތުރޭ ކަމުގެ ހެކި ލިބިފައިވާ ކަމަށް ދުނިޔޭގެ ސިއްހަތު ޖަމިއްޔާ ޑަބްލިއުއެޗްއޯ އިން ބުނެފިއެވެ.
މީގެކުރިން ޑަބްލިއުއެޗްއޯ އިން ބުނެފައިވަނީ މި ބަލި ފެތުރެނީ ޑްރޮޕްލެޓްތަކުގެ ޒަރިއްޔާއިން ކަމަށެވެ.
އެހެންނަމަވެސް 32 ގައުމެއްގެ 239 ސައިންޓިސްޓުން ވަނީ މި ވައިރަސް އަކީ ވައިގެ ޒަރިއްޔާއިން ފެތުރޭ ބައްޔެއް ކަމުގެ ހެކި، އެ ޖަމިއްޔާއަށް ހުށަހަޅާފައި ކަމަށެވެ.
ޑަބްލިއުއެޗްއޯ އިން މިކަން ހާމަކޮށްފައިމިވަނީ އޮސްޓްރޭލިއާގެ މެލްބަން ސިޓީގައި ކޮވިޑް-19 ކޮންޓްރޯލްވެފައި އޮތުމަށްފަހު ކުއްލިއަކަށް ކޭސްތައް އިތުރުވުމާއި ގުޅިގެން ދެވަނަ ފަހަރަކަށް ލޮކްޑައުން ކުރަން ޖެހުމާޢި ގުޅިގެންނެވެ.
މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި ޑަބްލިއުއެޗްއޯގެ ޑިރެކްޓަރ ޖެނެރަލް ޓެޑްރޯސް އެދްނޯމް ވިދާޅުވެފައިވަނީ ކޮވިޑް-19 ގެ ކޭސްތައް ދުވާލެއްގައި މައްޗަށް ރިޕޯޓްކުރާ މިންވަރު ރެކޯޑް މިންވަރަކަށް އިތުރުވަމުން އަންނަ ކަމަށެވެ. އަދި ވައިރަސް ކޮންޓްރޯލް ކުރުމަށް އޭނާ ވަނީ ގައުމުތަކަށް ގޮވާލައްވާފައެވެ.
