2019 ގެ ކުރިން ބިދޭސީން ގެނައުމުގައި ކޮރަޕްޝަނަށް މަގުފަހިވާ އެތައް ކަމެއް ކޮށްފައި އެބަހުރި: އިމިގްރޭޝަން
8 ޖުލައި 2020 | ބުދަ 04:2128 ކުންފުންޏަކުން 16000ށް ވުރެ ގިނަ ބިދޭސީން ގެނެސް ދޫކޮށްލާފައިވޭ
ރާއްޖޭގައި މަސައްކަތް ކުރާ ބިދޭސީންގެ ތެރެއިން ގަވާއިދާ ހިލާފަށް އުޅޭ ބިދޭސީން ހޯދުމަށް ކުރި މަސައްކަތުގެ ތެރެއިން
2019 ވަނަ އަހަރުގެ ކުރިން އިމިގްރޭޝަންގެ ތެރޭގައި ހިނގާފައި ހުރި ވަރަށް ގިނަ ކަންކަން ބަލަމުން ދާ ކަމަށާއި، ކޮރަޕްޝަނަށް މަގުފަހިވާ ކަންކަމުގެ އިތުރުން ގަވާއިދާ ހިލާފަށް ބިދޭސީން ގެނެސް ދޫކޮށްލާފައިވާ މައްސަލަތައް ވެސް ބަލަމުން އަންނަ ކަމަށް އިމިގްރޭޝަނުން ހާމަކޮށްފިއެވެ.
ރާއްޖެ ޓީވީގެ ފަލަ ސުރުހީ ޕްރޮގްރާމުގައި ވާހަކަ ދައްކަވަމުން އިމިގްރޭޝަންގެ ޑެޕިއުޓީ ޗީފް އިމިގްރޭޝަން އޮފިސަރ މުހައްމަދު ޝިފާން ވިދާޅުވީ 2019 ވަނަ އަހަރުގެ ކުރިން އިމިގްރޭޝަންގެ ތެރޭގައި ހިނގާފައި ހުރި ވަރަށް ގިނަ ކަންކަން ބަލަމުންދާ ކަމަށާއި، އޭގެ ތެރޭގައި މަކަރާއި ހީލަތް ހެދުމުގެ މައްސަލަތަކާއި، އިންސާނީ ވަގުފާރި އަދި ކޮރަޕްޝަނަށް މަގުފަހިވާ ގޮތަށް ގިނަ ކަންކަމެއް ހިނގާފައިވާ ކަމަށެވެ. އޭނާ ވިދާޅުވީ މިފަދަ ކަންކަން ފާހަގަ ކުރެވިގެން 28 ކުންފުންޏެއްގެ މައްސަލަ އަދި އިމިގްރޭޝަންގެ ތެރޭގައި ވެސް ކަންކަން ނުރަނގަޅުން ހިނގާފައި އޮވެގެން އެ މައްސަލަތައް ބަލަމުން އަންނަ ކަމަށެވެ.
ޝިފާން ވިދާޅުވީ މި 28 ކުންފުނިން 16،000ށް ވުރެ ގިނަ ބިދޭސީން އެތެރެ ކުރުމަށް ފަހު ދޫކޮށްލާފައިވާ ކަމަށް ބެލެވޭ ކަމަށާއި، 2019 ގެ ކުރީގެ ލިޔެކިޔުންތައް ވެސް ހޯދުމުގައި ދަތިތަކެއް އެބަހުރި ކަމަށެވެ.
ޝިފާން ވިދާޅުވީ މައްސަލަތައް ބަލަން ފެށިފަހުން މިކަމުގައި ބައިވަރު ކަންކަން ފާހަގަވެފައި އެބަހުރި ކަމަށެވެ. އެގޮތުން ކުރިން ހިނގާފައި ހުރި ކަންކަމަށް ބަލާނަމަ ނިޒާމުގެ ތެރެއިން ރޭވިގެން ބައެއް ކަހަލަ ކަންކަން ކުރެވިފައި ހުރުމުން ތަހުގީގަށް ބޭނުންވާ ވަރަށް ގިނަ ލިޔެކިޔުންތައް ހޯދުމުގައި ދަތިތަކެއް އެބަހުރި ކަމަށެވެ.
ބިދޭސީން ރާއްޖެއަށް ގެނައުމުގައި އޮޅުވާލާ މަކަރު ހަދައިގެން ގެނައުމުގެ މައްސަލަތަކެއް މީގެ ކުރިން ވެސް ވަނީ ފާހަގަ ކުރެވިފައެވެ. އަދި މިކަމުގައި އިމިގްރޭޝަންގެ މުވައްޒަފުންގެ ޝާމިލްވުން ހިމެނޭ ކަމަށް އިމިގްރޭޝަނުން މީގެ ކުރިން ބުނެފައިވާ އިރު ގަވާއިދާ ހިލާފަށް 60 ހާހަށްވުރެ ގިނަ ބިދޭސީން ރާއްޖޭގައި އެބަތިބި ކަމަށް އިމިގްރޭޝަނުން ވަނީ ހާމަކޮށްފައެވެ.
