އެކި ދާއިރާތަކުން ތަމްރީނުވެފައިވާ ފުލުހުން ތިބުން މުހިއްމު: ޕީޖީ
ޕީޖީ ވިދާޅުވީ ފުލުހުންނަކީ ހުރިހާ ދާއިރާތަކާއި ގުޅުން ހުރި ތަހުގީގުކުރަން ޖެހޭ ކަމަށް
ޕްރޮސެކިއުޓަރ ޖެނެރަލް ހުސެއިން ޝަމީމް، މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމިޓީގެ ބައްދަލުވުމގައި
އެކި ދާއިރާތަކުން ތަމްރީނުވެފައިވާ ފުލުހުން، ޚިދުމަތުގައި ތިބުން މުހިއްމުކަމަށް ޕްރޮސެކިއުޓަރ ޖެނެރަލް ހުސެއިން ޝަމީމް ވިދާޅުވެއްޖެއެވެ.
މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމިޓީން ފުލުހުންގެ ޚިދުމަތުގެ ބިލު ދިރާސާ ކުރަމުންދާއިރު، މި ބިލާއި ގުޅިގެން ކަމާއި ބެހޭ އިދާރާތަކާއި އެކު ކޮމެޓީން ދަނީ މަޝްވަރާކުރަމުންނެވެ. އެގޮތުން އަންގާރަ ދުވަހު ޕީޖީއާއި އެކު މި ބިލާއި ގުޅިގެން މަޝްވަރާކުރެވުނުއިރު، އޭނާ ވަނީ ފުލުހުންގެ ޚިދުމަތް ހަރުދަނާ ކުރުމާއި ގުޅިގެން މުހިއްމު ކަންތައްތަކެއް ހިއްސާ ކުރައްވާފައެވެ.
ޕީޖީ ވިދާޅުވީ ފުލުހުންނަކީ ހުރިހާ ދާއިރާތަކާއި ގުޅުން ހުރި ތަހުގީގުކުރަން ޖެހޭ ފަރާތްތައް ކަމަށެވެ. ޕީޖީ ވިދާޅުވީ ކޮންމެ ފުލުހަކު ހުރިހާ ދާއިރާއަކުން ތަމްރީނު ނުވިނަމަވެސް ކޮންމެވެސް ދާއިރާއަކުން ތަމްރީނު ލިބުމަކީ ވަރަށް މުހިއްމުކަމެއް ކަމަށެވެ.
މިކަން އިދާރީ ގޮތުން ނުވާނަމަ ގާނޫނުގައި ހިމަނައިގެން ވެސް ކުރަންޖެހޭކަން ޕީޖީ ފާހަގަކުރެއްވިއެވެ.
މީގެއިތުރުން، ޕީޖީ ވިދާޅުވީ އުސޫލާއި ޚިލާފުވާ ފުލުހުންނާއި މެދު ފިޔަވަޅު އަޅަން ވެސް ޖެހޭ ކަމަށެވެ. އަދި އެކަން ހަރުދަނާކޮށް ކުރެވޭނަމަ، އެފަދަ މައްސަލަތައް ވަރަށް ބޮޑަށް މަދުވެގެންދާނެ ކަމަށެވެ.
ޕީޖީގެ ތަޖުރިބާ ހިއްސާ ކުރައްވަމުން އޭނާ ވިދާޅުވީ ގިނަ ޕޮލިސް އިންވެސްޓިގޭޓަރުންނަކީ ވަރަށް ޝައުގުވެރިކަމާއިއެކު އެ މަސައްކަތް ރަނގަޅަށް ކުރައްވާ ފަރާތްތައް ކަމަށެވެ. ފުލުހުންނާއި މެދު ފިޔަވަޅު އަޅާ ނިޒާމު ހަރުދަނާ ކުރުމާއި ޖަލުތަކުގައި އަމަލުކުރަންޖެހޭ އެސްއޯޕީތަކަށް އަމަލުކުރޭތޯ ކަށަވަރުކުރުމަކީ މި މައްސަލައަށް ލިބޭނެ ހައްލެއްކަމަށްވެސް ޕީޖީ ވިދާޅުވި އެވެ.
