މައުމޫނުގެ ތެދުވެރިކަން ނެތްކަން ކޯލިޝަނަށް ސާބިތުކޮށްދޭނަން: ޖާބިރު

ކުރީގެ ރައީސް މައުމޫން އަބްދުލް ގައްޔޫމްގެ މޯލްޑިވްސް ރިފޯމް މޫވްމެންޓް (އެމްއާރްއެމް)، ސަރުކާރު ކޯލިޝަަނުން ވަކި ކުރުމުގެ މަސައްކަތް ފަށައިފި ކަމަށް ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވެއްޖެއެވެ.

ރިޔާސީ އިންތިހާބުގެ ކެމްޕޭނު ދުވަސްވަރު، ޖާބިރު އަތުން ރައީސް މައުމޫން ނެންގެވި 29 މިލިއަން ރުފިޔާ ހޯދަން ސިވިލް ކޯޓަށް ވަނީ މައްސަލައެއް ހުށައަޅުއްވާފައެވެ. ނަމަވެސް އެފަދަ އެއްވެސް މުއާމަލާތެއް ކޮށްފައިނުވާނެ ކަމަށް ރައީސް މައުމޫން ވަނީ ވިދާޅުވެފައެވެ.

ރައީސް މައުމޫން އަށް ފޮނުއްވެވި ސިޓީއެއްގައި ޖާބިރު ވިދާޅުވީ، 30 އަހަރުގެ ވެރިކަމެއް ކުރެއްވި ބޭފުޅަކު، ވެވަޑައިގެންފައިވާ ވައުދުތަކަށް އިހްތިރާމް ނުކުރައްވާ އެއްވެސް ފައިސާއެއް ނުނަންގަވާ ކަމަށް ވިދާޅުވެ އިތުރުފުޅު ހައްދަވާފައިވާ ކަމަށެވެ. އަދި މައުމޫން ވަނީ، އޭނާގެ ހައްގުތަކަށް އަރައިވަޑައިގެންފައިވާ ކަމަށް ވެސް ޖާބިރު ވިދާޅުވިއެވެ.

29 މިލިއަން ރުފިޔާ ސިވިލް ކޯޓަށް ހުށައަޅާފައިވާ މައްސަލައާ ގުޅުވައި ޖާބިރު ވިދާޅުވީ، މައުމޫން އަކީ ވައުދަށް ހުރުމަތްތެރިކޮށް ނުހިއްތަވާ އިތުރުފުޅާއި ހީލަތް ހައްދަވާ، ބަހުގައި ތެދުވެރިކަން ނެތް ބޭފުޅެއްކަމަށެވެ. އަދި އެކަން ކޯލިޝަންގެ އެންމެހާ ޕާޓީތަކަށް ސާބިތުކޮށް ދެއްވާނެ ކަމަށެވެ. ޑީއާރްޕީގެ ލީޑަރު ވިދާޅުވީ، ދިވެހި ސަރުކާރު އެކުލެވިފައިވާ ކޯލިޝަނުން މައުމޫންގެ އެމްއާރްއެމް ވަކި ކުރަން ކުރަންޖެހޭ މަސައްކަތް، އެ ޕާޓީން ފަށާފައިވާ ކަމަށެވެ.

ރާއްޖެއެމްވީއަށް ކުރިން ދެއްވި އިންޓަވިއުއެއްގައި މެމްބަރު ޖާބިރު ވިދާޅުވީ އެ ފައިސާ ރައީސް މައުމޫނަށް ދެއްވީ ޑިމޮކްރެސީ އަށް ކުރާ މަސައްކަތަށް އެހީވުމުގެ ގޮތުން ކަމަށެވެ. ޖާބިރު ވިދާޅުވީ ރައީސް މައުމޫނަށް ދެއްވި ފައިސާ އަނބުރާ އިންޓްރެސްޓާއި އެއްކޮށް ދެއްވާނެ ކަމަށް ވިދާޅުވި ކަމަށެވެ. ރައީސް މައުމޫނަށް ސިޔާސީ ގޮތުން ލިބިލައްވާ ފައިސާއިން 50 އިންސައްތަ ޖާބިރު އަށް ދެއްވާނެ ކަމުގެ ޔަގީންކަން އެރުވިކަމަށް ޖާބިރު ވަނީ ވިދާޅުވެފައިވެއެވެ.